அப்பன் பழனி அப்பனடா - அவன்

அரும் பெரும் திரவியக் கப்பலடா

அற்புதம் காட்டும் தலைவனடா - அவன்

அன்புக்குப் பணிசெயும் இறைவனடா!

காண்போம் நாம் அவன் படைவீடு - தம்பி

கால்வலி மறந்து நடைபோடு

கண்டால் நமக்கிலை ஒருகேடு - நீ

காவடி எடுத்து நடமாடு!

வணிகனின் குலத்துக்குத் தாயாவான் - அவர்

வளைவினில் ஓடிடும் சேயாவான்

கவிஞர்கள் பாட்டுக்கு வாயாவான் - எங்கு

கடும்பகை கண்டாலும் தீயாவான்!

ஆண்டிக்குப் பாரடி சாத்துபடி - நாம்

ஆடிடப் பழனியில் தீர்த்தமடி

வேண்டிடும் வரம்தரும் தீபமடி - இதில்

வேதனையே இலை லாபமடி!

பழனிக்குப் போவதில் சுகம் அதிகம் - அவன்

பார்வையில் நிற்பதில் குணமதிகம்

விழுந்து வணங்கினால் வயததிகம் - அந்த

வீரன் தருவான் பணமதிகம்!

செட்டிமக்கள் இந்தப் பூமியிலே - பல

தெய்வத்துக் களித்தது கோடியம்மா

கட்டிய கோயில்கள் ஆயிரமே - அதில்

கந்தனின் கோயில்கள் யாவையுமே!

முருகப்ப னில்லாத ஊருமில்லை - ஒரு

முத்தைய னில்லாத வீடுமில்லை

பழனியப்ப னின்றி வம்சமில்லை - எங்கள்

பரம்பரைக் கவனின்றி அம்சமில்லை!

கால்நடைப் பயணத்தில் ஓடிவந்தோம் - உன்

கருணைக்குத் தானுனைத் தேடிவந்தோம்

வேலெமைக் காக்கட்டும் வேலவனே - உன்

விழிஎமைக் காக்கட்டும் நாயகனே!