பாடல்

முருகக் கடவுள் மீது கிளித்தூது

சி. சுப்பிரமணிய பாரதியார்

பாடல்1 / 1

முருகக் கடவுள் மீது கிளித்தூது · சி. சுப்பிரமணிய பாரதியார்

பல்லவி✓

சொல்ல வல்லாயோ?-கிளியே

சொல்லநீ வல்லாயோ?

அனுபல்லவி✓

வல்லவேல் முருகன்-தனையிங்கு

வந்து கலந்து மகிழ்ந்து குலாவென்று (சொல்ல)

1சரணங்கள்✓

தில்லை யம்பலத்தே-நடனம்

செய்யும் அமரர்பிரான்-அவன்

செல்வத் திருமகனை-இங்கு வந்து

சேர்ந்து கலந்து மகிழ்ந்திடு வாயென்று (சொல்ல)

2✓

அல்லிக் குளத்தருகே-ஒரு நாள்

அந்திப் பொழுதினிலே-அங்கொர்

முல்லைச் செடியதன்பாற்-செய்த வினை

முற்று மறந்திடக் கற்றதென் னேயென்று (சொல்ல)

3✓

பாலை வனத்திடையே-தனைக்கைப்

பற்றி நடக்கையிலே-தன் கை

வேலின் மிசையாணை-வைத்துச் சொன்ன

விந்தை மொழிகளைச் சிந்தைசெய்வா யென்று(சொல்ல)