வண்ணமுறக் காண்பதற்கே செந்தில்வாழ் முருகா

வழிநடந்து வருகின்றோம் எந்தையே முருகா

கண்ணிறையக் காட்சிதரும் கவினுருவே முருகா

களிப்பருள வேண்டுகின்றோம் தந்தருள்வாய் முருகா!

வள்ளிதெய்வ யானையுடன் செந்தில்வாழ் முருகா

வழிநெடுகத் துணையாகி வருபவனே முருகா

துள்ளுமத வேலெமக்குத் துணைதருவாய் முருகா

துயர்களைய மயிலமர்ந்து வந்தருள்வாய் முருகா!

நீலநிறக் கடலலையின் மேலெழுந்து வருவாய்

நிகரற்ற செஞ்சுடராய்ப் பேரொளியைத் தருவாய்

கோலமயில் மீதிருக்கும் குமரனுனைக் காண்போம்

கொடுந்துயரம் பறந்தகல விரைந்துநடை நடந்தோம்!

வாழ்க்கைஒரு நடைப்பயணம் என்பதனை உணர்ந்தோம்

வழிநடந்து வழிநடந்து வருவதென விரைந்தோம்

துழ்ந்திருக்கும் வளங்களெலாம் வழிப்பயணக் காட்சி

சுடர்வேலன் திருவடியை அடைவதுநும் மாட்சி!

வளங்கொழிக்க வரம்தருவாய் வேலவனே முருகா!

கடைக்கணித்தால் பொன்குவியும் மாலவனின் மருகா!

நினைத்ததெலாம் நடக்கவைக்கும் வேலவனே முருகா!

அனைத்தையுமே எமக்களிக்கும் மாலவனின் மருகா!

ஆணவத்தை விட்டுவிட்டுப் புறப்பட்டோம் முருகா

அறியாமை மும்மலத்தை அகற்றிவிட்டு வந்தோம்

காணுமுன்னிற் கலப்பதற்கே கடுகிநடை நடந்தோம்

காவடிகள், பாற்குடங்கள் தோள்ஏந்தி விரைந்தோம்!

வாயில்வழி தேடிவரும் அடியரெமைப் பார்ப்பாய்

தாயனையாய் எம்சோர்வைத் தாங்கிவர வழைப்பாய்

பனிபடர்ந்த சோலையில்உன் பசுமையினைக் காண்போம்

கனிநிறைந்த காவிலுன்றன் கருணையினைக் காண்போம்!

இருள்நிறைந்த வழியில்நீ ஒளியாகி வருவாய்

இடர்மிகுந்த பாதையில்நீ துணையாகி வருவாய்

வெயில்நிறைந்த போதினிலே நிழலாகி நிற்பாய்

வேட்கைமிகும் போதில்நீர்த் தடமாகி நிற்பாய்!

காலைஒளி ஆகிவரும் காவலனே முருகா

வேலின்ஒளி நண்பகலில் விளைப்பவனே முருகா

மாலைஒளி ஆகிவரும் மாலவனின் மருகா

மதியிலும்உன் தண்ணருளை வடித்தளிக்கும் முருகா!

ஏர்திகழும் கார்முகிலின் எழிலுருவே முருகா

பார்புரக்கும் வயற்பரப்பின் பசுஞ்சுடரே முருகா

உன்னடியை நாடிவந்தோம் ஓங்கார முருகா

பொன்னடியைத் தந்தெம்மைப் புரந்தருள்வாய் முருகா!