திருத்தங் கிணுவை திகழ்நொச்சி யம்பதி சேர்முருகன்

கருத்தங்கு போதென் கருத்தில் இனித்திடும் கந்தனையென்

வருத்தும் பிறவிப் பெரும்பிணிக் காய மருந்தெனக்கொண்

டருத்தியிற் றாளிணை கண்டேன் அவையெற் கருந்துணையே.

துணைநன் மலர்ப்பதம் சூடுவன் நாளும் துணைபுரிந்து

இணையில் மனிதப் பிறவியெடுத்த இணையிலின்பம்

அணையும் சிவநெறி பாலித் திடும்அருள் நல்லிணுவை

அணைமின் அறுமுகன் அம்பொற் பதங்கள் அநுதினமே.

அநுதினம் நாண்மலர் அங்கைக்கொண் டேத்தும் அடியவர்க்கே

அநுசிதம் நீக்கி அளவில்திருவும் அருள்நிதியும்

தநுகரணப் புவனம் பெரும்போகம் தழைக்குமின்பம்

அநவர தம்அருள் வான்நல் லிணுவை அறுமுகனே.

அறுமுகன் செந்தி யனைய திருவளர் நல்லிணுவை

நறுமலர்ச் சோலை நகுநொச்சி யம்பதி நண்ணியன்பர்

மறுவுறும் உள்ள மலர்மணிப் பீடம் மகிழ்ந்துறைவான்

பெறுவது வேண்டிற் பெருஞ்சாத் தொடன்பர் பெயர்மின்களே.

அன்பா லடிபணி வார்க்கின்ப வாழ்வு அருளுஞ்சுற்றம்

இன்பான செல்வ இருநிதிப் பேரருள் இன்பம்நல்கும்

நன்பான லன்ற னளிவிழி வள்ளிநற் றெய்வமகள்

தன்பால் மருவ இணுவை நகருறை சண்முகனே.

சண்முக நாதன் சரவணப் பூந்தடஞ் சார்ந்துவளர்ந்(து)

எண்முக மாறுயர் கார்த்திகைப் பெண்கள் உவந்தெடுத்து

உண்முக மாகநற் பாலமு தூட்ட உவந்தருந்தி

நண்ணி நயந்துறை வான்வந்திப் பார்க்கின்பம் நல்கிடவே.

வந்திக்கும் அன்பர் மருளொழித் தின்பம் மலர்கவென்று

புந்திக் கிலேசமும் முந்தை வினைமுழு தும்மழித்து

சிந்தைக் கினிய செவிக்கினியதாஞ் சொல்லும் வாய்க்கினிய

கந்தன் இணுவை நயந்தனன் கல்யாண வேலவனே.

வேலவன் கோல மயில்விளை யாடுங் குகன்அடியார்ச்(கு)

ஏல உயிர்க்குயி ராயுள் புகுந்தளித் தோங்குமின்பம்

சால அருள்பவன் சங்கரன் அம்பிகை தந்தசுதன்

சீல இணுவை முருகன் திருவடி சேர்மின்களே.

மின்னிகர் நுண்ணிடை வேல்விழி வள்ளி விரும்புங்குகன்

தன்னிக ரில்தகர் ஊர்ந்தவு ணர்குலம் சாய்த்துவைவேல்

கொன்னிலைச் சூர்முதல் வேறறத் தொட்ட குமரன்நெடும்

பொன்னிலை மாட மலியிணு வைப்பதிப் புங்கவனே.

புங்கவன் பொன்னடி போற்றமெய்ஞ் ஞானநற் போதமருள்

சங்கரன் சண்முகன் சங்கரி அம்பிகை சேய்குடிலை

ஐங்கரன் தம்பி அணிவள்ளி தெய்வ யானைமகிழ்

மங்கல நல்லிணு வைக்குகன் வாழ்வருள் மாணிக்கமே.

மாணிக்கக் கூத்தன் மகிழ்சிவ காமி மணாளனுயர்

ஆணிப்பொன் னம்பலத் தாடி யழகியார் மாமதுரை

மாணி யிருவர் வணங்கக் கால்மாறி மருவும்நடன்

வேணிப்பி ரான்மகன் வேள்இணு வைப்பதி மேவினனே.

மேவார் புரங்கள் அழித்தன் றருளினோன் விண்ணவர்க்குச்

சாவா மருந்தருள் சங்கரன் நெற்றி தனிலுதித்து

மூவா முகுந்தன் விரிஞ்சற் கருளவெஞ் சூர்தடிந்தான்

பூவார் பொழிலிணு வைப்பதி மேவிய புண்ணியனே.

புண்ணியம் முன்பல கோடிசெய் தேன்முப் புரங்கள்அட

மண்ணியற் றேர்வரு வான்திரி சூலிநன் மைந்தன்புனப்

பண்ணியல் வள்ளி பதம்பணி வேலன் பழமறையோர்

நண்ணிய நல்லிணு வைக்கந்தன் நற்பதம் நாடுமினே

நாடரி தாகுமுன் நல்லடித் தாமரை நாண்மலர்தூய்ப்

பாடவல் லார்க்கரு ளும்பத பங்கயம் பைஞ்செழுந்தேன்

ஏடலர் நீப மலர்த்தொடை யான்நொச்சி யம்பதிவாழ்

ஆடக நன்மணி மந்திரம் மேவும் அறுமுகனே.

அறுமுகன் சங்கத் தலைமை யனாய்த்தமி ழாய்ந்துணர

உறுபுல வோர்க்கரு ளீந்தவன் நல்லி ணுவைமுருகன்

மறுவுறு வள்ளிதெய் வானை மருவ மகிழ்சிறந்து

நறுமலர் நாட்பதந் தந்தெமை வாழ்விக்கும் நாயகனே.

நாயகன் நாரணன் நான்முகன் நாடரும் நன்மருகன்

வேயன தோள்வள்ளி தெய்வத மாது மணாளன்சிவ

மாய பரஞ்சுட ரான குமாரன் அறிவறிந்த

தூயவர் வாழிணு வைப்பதி மேய சுடர்க்கொழுந்தே.

சுடர்நெடு வேலன் சுரர்குல காவலன் தோகைமஞ்ஞை

படர்கும ரேசன் பழநிசெந் தூர்பரங் குன்றம்வைகும்

இடர்கடிந் தின்றமிழ் பாட இனிதுகந் தின்பருளும்

கடமலி யைங்கரன் வாழிணு வைப்பதிக் காவலனே.

காவலன் கோல மயிலழ கன்கடம் பங்குகன்கோ

தேவ குலாதிபன் குஞ்சரி வள்ளி மணாளான்உயர்

மூவரு மாகிய மூல முதற்பொருள் முற்றுணர்ந்த

பாவலர் வாழிணு வைப்பதி வேலோன் பரஞ்சுடரே.

சுடர்வடி வேலோன் துடியிடை வள்ளி துணைவன்தெய்வ

மடமகள் குஞ்சரி மங்கை மணாளன் மலைமகள்சேய்

படவர வேரிடைக் கார்த்திகை மங்கையர் பாலயின்றோன்

தடமதில் சூழிணு வைப்பதி வாழ்சிவ சண்முகனே.

சண்முகன் பன்னிரு கையினன் அன்பர்க் கருள்கருணைக்

கண்ணினன் கார்மயில் வாகனன் கற்பகம் காமவல்லி

பெண்ணமிர் தாகிய வள்ளிதெய் வானை மருவுதமிழ்ப்

பண்ணியற் பாவலர் சேரிணு வைவாழ் பரஞ்சுடரே.

பரஞ்சுடர் நெற்றியங் கண்ணிடைத் தோன்றிப் பவனன்அங்கி

வரந்தரு கங்கை சுமந்துய்ப்ப வான்சிமய விமயச்

சரந்திகழ் தெய்வச் சரவணப் பூந்தடஞ் சார்ந்தசெவ்வேள்

வரந்தர நல்லிணு வைப்பதி வாழும் அறுமுகனே.

அறுமுகன் அம்பிகை தன்சுதன் ஆரல் அரியகற்பின்

மறுவறு கார்த்திகை மங்கையர் பாலமு துண்டகந்தன்

இறுதிசெய் சூர்ப்பகை மாற்றி இமையவர்க் கின்பருளி

உறுதவர் வாழிணு வைப்பதி மேவி உறைந்தனனே.

உறைந்தென துள்ளத் துயிர்க்குயி ராயுணர் வுள்ளுணர்வாய்

நிறைந்தின்ப வெள்ளம் நிறைய வுள்கந்தன் நீலமஞ்ஞை

உறைந்தன்ப ருள்ள முவப்ப இணுவை உகந்துறைவான்

அறைந்து மறைநற் சிவாகமம் போற்றும் அருந்துணையே.

துணையும் துயர்துடைக் கும்வடி வேல்கொள் தொழுந்தெய்வமும்

கணையொன் றியவிழிக் கன்னி யுமையருள் கண்மணியும்

பணையொன் றியதனக் குஞ்சரி வள்ளி மருவுமின்பத்

தணையும் இணுவையிற் கல்யாண வேலர் அருட்குருவே.

குருபரன் மால்மரு கன்கய மாமுக னைக்கடிந்த

ஒருமருப் பானை முகற்கிளை யோன்உம்பர் நாடழித்த

வெருவரு சூர்தடிந் திந்திரற் கன்றவ் வுலகளித்த

திருமுரு கன்இணு வைப்பதி சேர்சிவ சண்முகனே.

முகமல ராயும்முந் நான்குயர் தோளும்நன் முண்டகத்தின்

அகவிதழ் நேரு மருவிழி பன்னிரண் டுங்கனகம்

தகதக வென்றொளி பாலிக்கு மாறு தனிமுடியும்

புகலிணு வைக்கந்த வேள்பத மும்என்றன் புந்தியவே.

புந்திக் கிலேசமும் மாயப் பிறவியும் போக்கவுன்றன்

சிந்தைக் கினிய திருவடி தந்தின்பச் சீர்தருவாய்

அந்திப் பிறையணிந் தம்பலத் தாடி அருட்குமரா

செந்திற் பதிநிகர் சீரிணு வைச்சிவ சண்முகனே.

சண்முகங் கொண்ட தனிவடி வேல சரவணத்துக்

கண்ணுதல் நெற்றிக் கனலிடைப் பூத்தவென் கண்மணியே

பண்முகன் நான்மறை யுண்மகிழ்ந் தோதப் பவந்துடைப்பாய்

பண்ணவர் போற்றிணு வைப்பதி வேல்கொண்ட பாலகனே.

பால குமரன் பகீரதி தாங்கும்பா சைக்குழந்தை

வால கிராதன் மகள்வள்ளி காந்தன் வலம்புரிசூழ்

கோல வெழிற்செந்தி வந்தெமை வாழ்விக்க கோலமிகு

நீல மயின்மிசை வந்திணு வைப்பதி நிற்பவனே.

நிற்கு மெனவெண்ணி நில்லாத வற்றை நினைவிற்கொண்டு

அற்ப அறிவால் அருட்பதங் கள்மறந் தேன்அறுகால்

நிற்கும்பொன் னாண்மலர் சேரும் பழமுதிர் சோலை நின்று

பொற்பதி நல்லிணு வைக்கோயில் கொண்டருள் பூரணனே.

பூரண சந்திரன் போன்முக மாறுடைப் புங்கவன்றாள்

ஆரண வேதவண் டோலிட்டும் காணற் கரியனவாம்

காரண னாய்ப்பரி பூரண னாய்அயில் கையிற்கொண்டு

தோரண வாயி லிணுவைப் பதிமேய செங்குன்றனே.

குன்றொடு தாரகச் சூர்முதல் சாடிச் சுரர்பதங்கள்

அன்றம ரர்க்கருள் செய்த அறுகரு வேலுமுண்டாம்

மன்றமர் தாதை மகிழப் பிரணவ மாண்பொருளை

அன்றுப தேசித் திணுவை நகர்கொண்ட அற்புதற்கே.

கொண்டல் தவழ்சிம யக்கந்த வெற்பினிற் கோவில்கொண்டு

தெண்டிரை சூழ்செந்தில் மேவி மகேந்திரஞ் சென்றவுணர்

பண்டுரை வீர மகேந்திரம் அட்ட பரம்பொருளே

எண்டிசை போற்றிணு வைப்பதி மேய எழிற்கந்தனே.

கந்தன் கடம்பன்நற் காங்கேயன் கார்த்திகை மங்கையர்கள்

வந்தமு தூட்ட வளர்கார்த்தி கேயன் மயிலழகன்

சுந்தரத் தேவநற் குஞ்சரி காந்தன் சுடர்வடிவேல்

மைந்தன் இணுவை வளநகர் சேர்சூர் பயங்கரனே.

சூர்இனம் மாளத் தொடுவடி வேலன் துணைமலர்த்தாள்

சீர்தரும் செல்வம் தரும்இன்ப வாழ்வு சிறக்கநல்கும்

ஏர்தரும் செந்திநின் றெண்டிசை போற்ற இணுவைநகர்

சேர்சிவ சண்முகன் பன்னிரு தோள்கொண்ட சேவகனே.

சேவகன் செந்தில் திருப்பரங் குன்றம்நற் சோலைமலை

மேவு பழநி திருவாவி னன்குடி ஏரகஞ்சேர்

பாவகன் அங்கி பகீரதி தாங்கிய பாலகுகன்

நாவலர் வாழ்இணு வைப்பதி மேவிய நாயகனே.

நாயக மான மலர யனைச்சிறை செய்துலக

நாயக னாக உலகளித் தோன்நவை தீர்த்தெமையாள்

நாயகன் வேல்கொண்டு வெஞ்சூர் தடிந்த வளரிணுவை

நாயகன் மாயன் மருகன் சிவமகிழ் நற்சுதனே.

மகிழ்கொன்றை பாதிரி மல்லிகை முல்லை மகிழ்துளவு

முகிழ்சண் பகம் கடம் பார்நொச்சி வில்வம் முகிழ்மலர்கள்

நெகிழ்மந்த காச மருமலர்ச் சோலை நிலவிணுவை

மகிழ்கந்த வேள்பதஞ் சூட வொழியும் மறுபிறப்பே.

பிறந்து மொழியபின் றுன்திருப் பாதம் பிணித்தஅன்பின்

சிறந்த திருப்பணி செய்து வணங்கிடச் சிந்தைகொண்டேன்

மறந்தும் மறுபிற வித்தளை பூணா வகையருள்வாய்

சிறந்து விளங்கிணு வைப்பதி மேய சிவகுருவே.

குருபர னேவடி வேல்கரங் கொண்ட சிவக்கொழுந்தே

இருவர்நன் மாதர் இருபுடை மேவ எழுந்தருளும்

திருமுரு காசெந்தில் வந்தெமை யாளிணு வைக்குமரா

கருவிடை மீண்டும் புகுதா வகைவந்து காத்தருளே.

அருக்க னொளிகண் ணொளிக்கலந் தாங்குன் அருட்கருணைத்

திருக்கடைக் கண்ணல்கு தேன்நல்கு வாய்செந்தி யம்பதியும்

திருத்தகு மாளிகை சூழிணு வைநொச்சி யம்பதியும்

திருக்கெழு மிச்சிந்தை யுங்குடி கொள்சிவ சண்முகனே.

சண்முக லிங்கம் சரவணம் மேவும் சகளலிங்கம்

எண்முக மாம்பத மெண்பத்து நான்குக்கொண் டிழிபிறவி

மண்ணுறக் கொண்டஎன் காயக் கிலேசமும் மாற்றியுன்றாள்

நண்ணுதற் கென்னை நயந்தருள் நல்லிணு வைக்கந்தனே.

கந்தனைக் கார்மயில் வாகன னைக்கடம் பாடவித்தோன்

உந்து மருமலர் மாலை தவழுந் திண்ணிய புயத்(து)

எந்தை யறுபடை வீடுடை யான்எழிற் செந்திவளர்

மைந்தனை நல்லிணு வைப்பதி வாழ்வை வழுத்துநெஞ்சே.

நெஞ்சம் புகுந்த குகன்நெடு மான்மக ளைப்புணர்ந்த

கஞ்ச மலர்ப்பதக் கண்ணுதல் மைந்தனைக் கற்பகநா

குஞ்சர மாம்பிடி தாங்கி யுயர்செந்தி யுற்றுகந்த

மஞ்சனை நல்லிணு வைப்பதி கண்டு வழுத்துமினே.

வழுத்துமின் நுங்கள் வருபிற விக்கு மருந்ததுவே

மழுத்தரித் தம்பலத் தாடி நுதலிடை வந்தருளி

முழுத்தழ லாகிச் சரவணம் புக்க குகனைமுன்னி

அழுத்தும் வினைகெடுப் பீர்இணு வைக்குகற் கன்புசெய்தே.

அன்புசெய் துன்னடித் தாமரை போற்றும் அருணகிரி

தென்பொதி கைக்குறு மாமுனி தெய்வப்பொய் யாமொழிநல்

தென்றமிழ்ச் சங்கத் தலைவன்நக் கீரன் கவிக்குகந்தோன்

என்றனிப் புன்கவி ஏற்குங்கொல் நல்லிணு வைக்கந்தனே.

குகனே குமரா குழகா குறிஞ்சிக் கிழவசிவன்

மகனே மலைமகள் மைந்தா கடம்பா மயிலழகா

நாக நா டுடைய மகவான் பதமருள் மால்மருகா

சுகமே தருவாய் இணுவை வளர்சிவ சண்முகனே.

சிவஞான சற்குரு கிண்கிணி தண்டை கிளர்மலர்த்தாள்

தவஞான பூபதி சங்கரி அம்பிகை தன்சுதனே

பவமாய வல்வினை பாறவை வேல்கொள் பரம்பொருளே

தவமாக வந்திணு வைப்பதி மேவும் சரவணனே.

மேவிநன் மெய்யடி யார்போல் நடித்து வினைநலியும்

பாவியென் நெஞ்சிற் பரிபவம் தீரும் பரிசருள்வாய்

தூவியந் தோகை மிசைவரு தெய்வத் துணைமலர்த்தாள்

ஆவியுள் நிற்பநல் லானந்த முற்றுற அருள்பரனே.

பரனே சிமய இமயப் பராபரை பாலகனே

அரனே அறுமுக னேயல ரம்புயத் தோன்தெருள

உரனே தரும்சிறை செய்தருள் நல்கிப்பின் உய்யத்தந்த

வரனே இணுவை மருவுதெய் வானை மணவாளனே.

மணவாளக் கோலத்து வந்துவள் ளிக்கன்று மால்செய்துபின்

கணநாத ரான கணபதி தன்றுணை கொண்டணைந்தோய்

பணமா சுணப்பள்ளிப் பார்மகள் கேள்வன்நன் மால்மருகா

தணியாத பேரன்பு தந்தெனை யாள்இணு வைக்கந்தனே.

கந்தனை வாசக் கடம்பனைக் கார்மயில் வாகனனைச்

சிந்தனை செய்யச் சிவபதம் சித்திக்கும் தீமைதரும்

பந்தனை பாறும் பராபரை பாலற் பராவிநிதம்

வந்தனை செய்வீர் வளரிணு வைப்பதி வம்மின்களே.

வம்பணி பூண்முலை வள்ளி தெய்வானை மகிழ்நகரிக்

கொம்பணி பூண்முலைக் கார்த்திகைப் பெண்கள் குலவுமன்பால்

நம்பணி யீதெனப் பாலூட்ட வுண்டு நனிவளர்த்த

வெம்பணி பூணிறை தன்சுத நல்லிணு வைக்குகனே.

குகனே குறமகள் கொண்க கொடிய குலவவுணன்

சகமே லழியவை வேல்தொட்டுத் தேவர்க் கருள்துணைவா

அகமே மணிபொன் னருஞ்செல்வம் தேடி அவலமுறா(து)

இகமே பரசுகம் நல்காய் இணுவைவை வேற்கரனே.

வேலுண் டெமது வினைதீர்க்க மேலைப் பிறப்பறுக்க

ஆலும் பிணிமுக வூர்தியுண் டன்பர் அகங்குளிர்ப்ப

நூலும் கடம்பும் புரள்பன் னிருதோட் குமரனிரு

காலுண் டிணுவையிற் கந்தவே ளுண்டு கருணையுண்டே.

கருணைத் திருவுரு வாய்வந்து தோன்றிக் கருதுசிவ

அருணைத் திருப்பதி யாண்டினு வைப்பதி வாழ்முருகா

சரணம் பணிந்துய்யச் சாரும்பல் கோடி அடியருய்ய

அருணன் ஒளிசேர் அருட்பதந் தந்தெமை ஆண்டருளே.

ஆண்டுபல் கோடி யருச்சித் தடிமுடி தேடியன்று

காண்டலி லாதார் கவலுறும் மாலயன் கற்பவெல்லை

மாண்டு மடிவார் அவர்பதம் வேண்டேன் மதுதுளிக்கும்

ஈண்டு புகழிணு வைக்கந்த வேள்தாள் எமக்கினிதே.

இனிது கனிகன்னல் கற்கண் டதனில் இனிதமிர்தம்

இனிது மலர்த்தே னதனி னினிதுபஞ் சாமிருதம்

இனிது மலரணை இன்மனை மக்கள் இனிதரசு

இனிதி னினிதிணு வைக்கந்த னின்னருள் தேனமிர்தே.

தேன்துளிக் கும்மலர்க் கற்பகச் சோலைகொள் செல்வமலி

வான்பனிப் பெய்த வளரெரி யூட்டி வயங்குசெல்வம்

தான்பெற வன்றம ரச்சிறை செய்த தனிநெடுஞ்சூர்

ஊன்கெட வேல்தொட் டிணுவை மகிழ்ந்திங் குறைந்தனனே.

மகிழ்நகை வள்ளிதெய் வானை மருவ மயிலின்மிசை

முகிழ்நகை நன்மதி நேர்முக மாறும்முந் நான்குகையும்

அகிலமெல் லாம்பர வும்கிண் கிணிதண்டை யார்பதமும்

முகில்தவழ் சோலை யிணுவை பணிபவர் முன்னிற்குமே.

முன்செய் தவப்பய னாற்றன் னிருபத முண்டகங்கள்

இன்பம் பெறப்பணிந் தேத்தச் சிறந்தந் திணையடிகள்

அன்புற் றிடமனந் தந்து பரவக் கரங்கள்தந்து

என்சற் குருகுகன் இன்புற் றிணுவை இருந்தனனே.

இருந்துய ரங்கெடுத் தென்றும் அமரர் இனிதுறையப்

பெருந்திரு வும்தரு வும்பத மும்கொடுத் தென்றும்வையம்

விருந்தும் விழவும் பொலிய அறுபடை வீடுகொண்ட

குருந்தை இணுவைக் குமரனை வந்திக்கக் கூடுமின்பே.

கூடுமின் மெய்யடி யார்பதம் வந்திக்கக் கூடுமின்பம்

பாடுமின் பண்டை வினைகெடப் பந்தனை வீடுபெறத்

தேடுமின் செஞ்சுடர் வேலனைச் செல்வ மலியிணுவை

நாடுமின் நாடநல் லானந்த வாழ்வென்றும் நல்குவனே.

நல்குர வென்னும் நவையிடைப் பட்டு நலிவுபெறார்

மல்குறு செல்வம் வளர்மக்கள் நன்மனை வாழ்வுறுவார்

செல்வமெல் லாம்மலி நல்லிணு வைக்கந்தன் நாண்மலர்த்தாள்

அல்குறு பேரருட் செல்வம் பெறவந் தடையின்களே.

பெறலரும் கண்டா மணியொலி யோடியல் பேர்மழவம்

உறவுகொள் நல்லடி யார்பண் ணொலியொடு கீதவொலி

அறமலி பூசை மலியொலி அர்ச்சகர் கீதவொலி

பெறலரும் சீரிணு வைப்பதி தன்னொலிக் கும்பெரிதே.

ஒலிதெங்கு வாழை உயர்கமு காசினி ஓங்குபலா

மலிதுங்க வான்பயிர். சேர்தெய்வ வாழ்பதி வான்கங்கைபோல்

கலியுறு கூவல்நன் னீர்மலி நல்லிணு வைதொழவே

நலிதரு நோயில்லை நல்குர வில்லை நவையில்லையே.

நவையில் நவமணி நக்கொளி காலும் நளிமுடியும்

சிவையின் னொளிர்வெற்றி வேலும் ஒளிசேர் தினகரரின்

குவையன்ன மாமுக மாறுமீ ராறு புயமுந்தண்டை

கவைகொள் சிலம்படி யும்தந் தருள்இணு வைக்கந்தனே.

கந்தன் கடம்பன் களிமயில் வாகனன் கானவள்ளி

கொந்துண் குழற்றெய்வ யானை மணாளன் கொலையவுணர்

நந்தும் படிவடி வேல்தொட்டுத் தேவர்க்கு வாழ்வளித்த

மைந்தன் இணுவை வளர்நொச்சி யம்பதி வாழ்குகனே.

குகனே அடியர் குறைதவிர்த் தாட்கொள் குருபரனே

அகனே குழையுநல் லம்பிகை பாகன் அளித்தசிவ

மகனே சரவணப் பூந்தடம் மேவி அருளும்அறு

முகனே வடிவேற் கரனேமெய்ஞ் ஞான முழுமுதலே.

முழுமுத லேமுத்தி சித்தி தரும்ஞான சக்திவைவேல்

அழுதடி சேரும்மெய் யன்பர்உள் ளத்துறை அற்புதனே

இழுதென உள்ளம் உருகிநின் னாமம் உவந்துரைப்போர்

பழுதறுத் தாண்டடித் தாமரை தந்தருள் பண்ணவனே.

பண்ணும் தவத்தடி யார்தம தேழ்பிற விக்கும்அருள்

நண்ணும் படியருள் மெய்ஞ்ஞான பண்டித நாயடியேன்

கண்ணும்அக் கண்ணி லுறைமணி யும்மணி யின்ஒளியும்

விண்ணும் புவியும் விரிசுடர் யாவும்நீ மேலவனே.

மேலவ னேவெள்ளை வாரணம் போன்ற அருள்கரந்த

வேலவ னேதெய்வ யானை குறமகள் மேவவருள்

நூலவ னேநுவ லுந்தொறும் பேரின்பம் ஞானசுகம்

பாலக னேஅருள் சண்முக நாத பரம்பொருளே.

பரம்பொரு ளேபங் கயற்சிறை செய்துபல் லண்டசரா

சரங்களைப் பண்டுள வாறு படைத்தருள் பாலகனே

உரந்துணி யாய்விழ ஒள்வடி வேல்துரந் தும்பருய்ய

வரம்பெறு சூர பயங்கரம் மாற்றிய மாணிக்கமே.

மாணிக்க மேனி வயங்குயர் சேவற் கொடியுடையாய்

ஆணிப்பொன் அம்பலத் தாடி யருளும் அறுமுகனே

பேணிப் பணியு மடியர் தமதிடர் சொல்லிநைந்தால்

பாணித் திடாதருள் பாலிக்க வேண்டும் பரைசுதனே.

பரைசுத னேபர மானந்த மெய்ஞ்ஞான பாஸ்கரனே

உரைஉணர் வாதி ஒழிந்த நெறியருள் உத்தமனே

கரையிறந் தோடு கடலிற் பரந்த கடுவினையாம்

வரைபக வைவேல் விடுத்தெமை யாள்மயில் வாகனனே.

மயிலியல் வள்ளி மணாள மரகத மாமலைமேல்

அயிலோடு தோன்றி அடியார்க் கருளும் அறுமுகனே

பயில்தொறும் நூல்நயம போலினி தாமருள் பாலித்திட

வெயிலெறிக் கும்வடி வேல்முரு காவரு வாய்விரைந்தே.

விரைவொடு வந்து மிருககந் தந்தெமை யாண்டருள்வாய்

வரைமகள் தந்த வரைபக வேல்எறி வள்ளிமகிழ்

விரையொலி யும்கடம் பார்தடந் தோள்முரு காஅடியர்

புரைதவிர்த் தாண்டருள் நல்லிணு வைப்பதிப் புண்ணியனே.

புண்ணிய மொன்றுசெய் தேன்என தேழேழ் பிறவியிலும்

கண்ணிய துன்புகழ் கற்றன கேட்டன காதல்செய்து

நண்ணிய துன்திருத் தாமரைத் தாளிணை நல்லவர்வாழ்

பண்ணயந் தேர்புல வோர்வதி நல்லிணு வைக்குகனே.

குகனே சரவணப் பூந்தொட்டில் மேவிக் குதலைமொழி

தகவே பயின்றுமை மென்முலைப் பாலமிர் துண்டுகளி

மிகவே யுயர்தவத் தோருறை நல்லிணு வையுகந்த

மகனே யறுமுக னேபகத் தேயுறை மாமணியே.

மணிவண்ண மேனிநன் மாயன் மருகா மகிழ்வுடம்பி

னணிவண்ணப் பன்னிரு தோளழ காமலை யாள்சுதனே

மணிவண்ண நல்லடி யாருறை நல்லிணு வைக்குகனே

பிணிநண்ணி மூப்படை யாமுன் பருள்கநின் பேரருளே.

பேரா தரத்தொடு பெம்மான்தன் பொன்னடி பேணுபவர்க்

காராத செல்வம் அருளும் அறுமுக அன்பருள்ளம்

ஊராகக் கொண்டுறு சித்தியும் முத்தியும் சேர்க்கும்நின்னை

நேராகும் தெய்வமு முண்டுகொல் ஞான நிருமலனே.

மலபந்த மாசறுத் தாண்டுநின் மாண்பத மேதுதிக்க

உலகம் உனதருள் நோக்கிநின் றேயுரு கும்ஒருசூர்

அலமந்து சேவல் மயிலாய்ப் பணிசெய்ய ஆண்டுகொண்டு

நலமுந்து நல்லிணு வையெம் பதிவளர் நாயகனே.

நாயக மான மரைமலர் நாட்டத்தன் வேதனும்பர்

நாயக னான மகபதி யாகிய நல்லிமையோர்

தாயக மாக அறிஞர் வதிநல் லிணுவைவந்து

நாயக னேநினை நாடினர்க் கின்பம் நயந்தருளே.

அருள்தவ மும்கடைக் கட்சிவ காமி யருள்குகனே

இருள்தவழ் நீலகண் டத்திறை நெற்றியில் வந்துலகின்

மருள்கெட ஞானச் சிவசக்தி வேல்கொண்ட நாயகனே

பொருளறம் இன்பம் புகல்வீடு தந்தருள் பூரணனே.

பூரணப் பொற்குடம் நேரும் கனதனப் பூவையர்கள்

நாரணன் தந்த அமிர்தவல் லீயருள் சுந்தரிதன்

காரண மாக உதித்தான் திருமுக மாறுகொண்டு

ஏரண வும்இணு வைக்கிறை கல்யாண வேலவனே.

வேலுண்டு பச்சை மயிலுண்டு குக்குட வெல்கொடியுண்

டாலும் அபய வரதமுண் டன்றயன் சென்னிமொத்தக்

கோலும் அழகிய பன்னிரு கையுண்டு மெய்யுமுண்டு

மாலும் துயரும் வரலுமுண் டோவென்றி வானவனே.

வானவன் காண்குற மாமகள் மேல்மயல் நோய்கதுவக்

கானவ னாகித் தினைப்புனம் மேவிய கற்பகங்காண்

தானவர் வேரொடு சாடத் தனிநெடுஞ் சூர்முடங்க

மானவை வேல்தொட்டு மங்கைதெய் வானைக்கு வாய்த்தவனே.

வாயாரப் பேசுவ துன்திரு நாமங்கள் மன்னுநெஞ்சில்

தாயாக நின்று தலையளித் தாட்கொண்ட சண்முகனே

காயா புரிநெடுங் கோட்டை தகருமுன் காத்தருளே

காயா மலர்நிகர் கண்ணன் மருகாகந் தாகுகனே.

கந்தனைக் கார்மயில் வாகன னைக்கடம் பார்தடந்தோள்

மைந்தனை வேதன் சிரமிசை தாள்வைத்த வானவனை

வந்தனை செய்து வழிபட நில்லா வருவினைகள்

சிந்தனை செய்துய்ந் திடுமின் பரகதி சித்திக்குமே.

சித்திக்கும் முத்தி திருவள ரும்செல்வம் நின்றிலங்கும்

சித்திக்கும் புத்தியும் தெய்வநல் வாழ்வு சிறந்தொளிரும்

பத்திக்கும் ஞான பராபரன் மேவிய நல்லிணுவை

முத்திக்கு வித்தாந் தலம்நொச்சி யம்பதி முந்துமினே.

முந்தும் பிறவிகள் எத்தனை யத்தனை முண்டெழுந்து

பந்தித்து நின்ற பழவினை அத்தனை பாறவருள்

வந்திப்ப வர்க்கருள் வான்வடி வேல்கொண்டு மாதவத்தோர்

சிந்திக்கும் யோகு பயிலிணு வைப்பதி சேர்ந்துய்ம்மினே.

உய்திகண் டாய்நெஞ்ச மேயுனை நானிரந் தேன்பிறவி

எய்திட வேண்டா இனிநின் னடியிணைக் கீழிருந்து

மெய்திகழ் ஞான சிவானந்தத் தேன்மிக மாந்தியன்பின்

உய்தி பெறவருள் வான்இணு வைப்பதி உத்தமனே.

உத்தமன் தாள்பணிந் தேனுயர் கந்தபு ராணம்சொன்ன

மெய்தவ மான விரதம் புரிந்தேன் மிகுகருணை

அத்த னருள்சேர் அறுமுகன் மெல்லடித் தாமரையென்

சித்த மிசைநிறை வாய்நின்ற ஆனந்தத் தேன்சொரிந்தே.

தேனைப் பழித்த மொழிவள்ளி காந்தன் சிறந்தவைவேற்

கோனை கொடுவினை தீரவந் தித்தேன் குளிர்ந்துசெந்தேன்

ஊனை உயிரை உணர்வையென் உள்ளத்தி லின்பருளும்

கோனை அவனென்று கண்டேன் எனக்கோர் குறையுமுண்டே:

குறைமதி செஞ்சடை மேல்வைத்த தெய்வ குமரகுரு

மறையயில் வேதியன் வந்தனை செய்ய வரமருளும்

நிறைமலி செல்வ வளநகர் நல்லிணு வைக்குகற்கே

பொறைமலி சிந்தையி னார்க்கரு ளும்பரி பூரணமே.

பரிவொடு நாரதன் பண்ணிய யாகத்திற் பாய்ந்தெழுந்து

விரிதிரை ஞாலமோர் மூன்றும் படர்தகர் ஏறிவந்து

அரிமுகன் தார்கன் சூர்பட வேல்கொண்ட ஆறுமுகன்

பரிவுசெய் தாண்டிணு வைப்பதி வாழும் பரம்பொருளே.

பரம்பொரு ளேபண்டு நால்வர்க் கறம்சொல் பரமன்தந்த

பெரும்பொரு ளாய பிரணவ மெய்ப்பொருள் பேசியசீர்

வரம்பல வெய்த மகிழ்ந்தருள் பாலிக்கும் மால்மருகன்

கரம்படு வேல்துணை யுண்டென் எழுமையும் காப்புறவே.

காத்தும் படைத்தும் கரந்தும் திருவிளை யாடல்புரி

தீர்த்தன் சரவணப் பூந்தடத் தேவந்த சேந்தன்மகிழ்

பூத்த கடம்பணி தோளழ கன்திருச் செந்திநின்று

நீத்தெமை யாண்டருள் வான்இணு வைப்பதி நின்றனனே.

நின்றும் இருந்துங் கிடந்தும் நினைநெஞ்ச மேகொடிய

கன்று சினமிகு காரவு ணப்படை கட்டழித்து

வென்றி யமரர்க் கருளிய வேற்படை மேலவனை

ஒன்றி யிருந்து நினைபவர்க் கில்லை உறுதுயரே.

உறுபுனற் கங்கை சுமந்தகாங் கேயன் உயர்கயிலை

குறுநடை கொண்டறு மங்கையர் பால்சுரந் தூட்டமகிழ்

அறுமுகன் அம்பிகை ஆர அணைக்க அருளுகந்தன்

நறுமலர்ச் சோலை செறிஇணு வைப்பதி நண்ணினனே.

நண்ணிப் பணிமின் நலிந்திடும் தீவினை ஞானசெபம்

பண்ணிப் பணிபவர் உள்ளக் கமலத் துறைந்தருளும்

பெண்ணிற் பெருமை படைத்த குறமகள் பேதைமகிழ்

ஒண்ணித் திலநகைத் தெய்வத் யானைசேர் உத்தமற்கே.

உத்தம ஞானியர் புத்தியில் மேவுறும் ஞானசக்தி

சித்த மலம்அறச் செங்கதிர் வேல்விடு தெய்வபதி

பத்தர்கள் முத்தர்கள் சித்தர்கள் மேலவர் சேர்ந்தபதி

பத்திமை சேர்இணு வைப்பதி சார்மின் பயனுறவே.

பயனுறு வாழ்க்கையிற் பண்புற வாழ்ந்துபின் பக்குவத்தால்

நயனுறு தெய்வச் சிவசதி சேர நயந்திடுவீர்

கயமுகத் தாரக னைக்கடுஞ் சூரைக் கடந்ததெய்வ

வயமுறு வேற்படை வானவன் றாள்கள் மருவுமினே.

மருவு மறுகரு வேல்கொண்டு வந்தனை செய்பவர்தம்

இருவினை வேரறுத் தாண்டருள் பாலிக்கும் எங்கள்தெய்வம்

மருவளர் சோலை வளமலி நல்லிணு வைப்பதிவாழ்

குருபரன் சண்முக நாதன் பதந்தொழக் கூற்றஞ்சுமே.

அஞ்சுகம் வாய்திறந் தன்ன மொழியியல் வள்ளியெனும்

கிஞ்சுக வாய்மங்கை தன்சர ணம்நறுங் கேழ்கிளரும்

பஞ்சினும் மெல்லடிப் பாவைதெய் வானை பதம்பணியும்

செஞ்சுடர் வேலவன் செஞ்சர ணங்கள்என் சிந்தையவே.

`ந்தைக் கினியன வந்திப் பவர்க்குத் திருவுமின்பும்

முந்தித் தருவன முத்தி தருவன மூண்டவினைப்

பந்தம் அறுப்பன பால முருகன் பதமலர்கள்

புந்திக் கினிய பரமசு கானந்தம் பூப்பனவே.

பூவிற் பொலிதரு பொற்புறு தாண்மலர்ப் போதுமன்பர்

நாவிற் பொலிதரும் நல்லுப தேசமாம் ஆறெழுத்தும்

தேவிற் பொலிதரும் செஞ்சுடர் வேலோன் திருக்கண்களும்

பாவிற் பொலிதர நின்றருள் வாய்கங்கை பாலகனே.

பாலக னேபர மானந்த நற்சுகம் பாலித்திடும்

நூலவ னேயறு மாமுகம் கொண்ட நிருமலனே

மாலவ னேமுத லோர்வினை தீர்த்தெமை யாண்டருளும்

மேலவ னேஇணு வைப்பதிக் கல்யாண வேலவனே.

வேல்கொண்ட கையும் விளங்குநுண் ணூல்பொலி மார்பழகும்

பால்வெள்ளை நீறுறு பன்னிரு தோளும்முந் நான்குகண்ணும்

மால்கொண்ட வள்ளிதெய் வானை மகிழ்வும் வரமருளும்

கால்தந் தருளும் கருணையும் அன்பர்க் கருந்திருவே.