கிள்ளை உரை செய்நீ கிளி மொழியாள் வள்ளி பங்கன்

தெள்ளு தமிழ் முருகன் தேனார் கடம்பணியும்

பிள்ளை கதிரை நகர் பேசும் அடியவர்க்கு

உள்ளும் பகையுளதோ உறு துயரம் உண்டாமோ!

அஞ்சுகமே செம்பவள அணிவாய் மணிக்கிள்ளாய்

கெஞ்சுகின்றேன் உன்னைக் கிளர்வான் படர்ந்தேகி

மஞ்சை வடிவேலான் மாணிக்கக் கங்கையிடைத்

தங்கத் தமிழருக்குத் தடையுளவோ கண்டிடுக,

கீழை நெடுவான் படர்ந்து கொடுமுடியும்

காடும் கடந்து கதிர்காமம் - நாடியே

வந்து மணிக்கிள்ளை வாய்திறந்து பேசுமொழி

சிந்தைதனை உருக்கும் சீர்த்து.

வள்ளிதனை அணைந்தான் மறைந்தேன் அவள்பகர்வாள்

கள்வா கதிரையுறை கந்தா தமிழர்பயம்

கொல்வாய் எனமுருகன் கூர்வேல் நுதிதொட்டான்

விள்ளும் பயம்உளதோ வேல்வேல் எனஎழுந்தேன்.

முருகன் அருள்தெய்வம் மூவே ழுலகுக்கும்

ஒருவன் அவன்தீமை ஒன்றும் அணுகவிடான்

தருவன் கதிர்வேல் தம்முள் துணைகொண்டு

வருவீர் கதிர்காமம் மனச்சோர்வு வேண்டாமே.