பூமருவு தண்டலையும் பொன்னனையார் பூங்கரமுங்

காமருவண் டார்க்குங் கதிரையே—ஓமருவும்

அத்தமறை தந்தா னறியா னனுங்கமுடி

யத்தமறை தந்தா னகம்.

பாவலருங் கண்டும் பணிமொழியா ருஞ்சுரும்புங்

காவலரைக் கூடுங் கதிரையே—தேவ

னுருக்குளத்து வந்தா னொருமுருகா காவென்

றுருக்குளத்து வந்தா னுறை.

பூப்பயிலும் பொன்னன்னார் பொன்புனைவார் பூங்கரத்தைக்

காப்பணியுஞ் செல்வக் கதிரையே—மாப்பிறவி

யாறக் கரத்தா னணைத்தெம்மை யாள்குமரன்

ஆறக் கரத்தா னரண்.

மங்கலிமார் வாண்முகமும் வண்டலைபூந் தண்டலையுங்

கங்கண மேவுங் கதிரையே—வெங்கலிதீர்

காசரவ ணத்தன் கமலத்தன் கைகுவிக்கு

மாசரவ ணத்தன் மலை.

உண்ணேய மிக்கோரு மோங்குமிளங் காவுமலர்க்

கண்ணீர் சொரியுங் கதிரையே—யெண்ணுமறை

பன்னிருகை யாரின்பம் பாவமறுத் தீயுமருட்

பன்னிருகை யாரின் பதி.

பாயிருள்சீக் கும்பகலும் பண்ணைவாய்ப் பைங்கூழூங்

காய்கதிரைக் காட்டுங் கதிரையே—மேயசடை

ஆறா னனத்தனவ னத்தற் கிறைமைதரும்

ஆறா னனத்த னகம்.

விற்கொண்ட காளையர்கண் மெல்லியலார் தோண்மொழியிற்

கற்கண்டங் கூறுங் கதிரையே—அற்பார்

உறுவர்பய முண்டாண் டொருவாவின் பீந்தான்

அறுவர்பய முண்டா னகம்.

வாசமடத் தேழையரும் வாவியிடைத் தாமரையுங்

காசிலன முண்ணுங் கதிரையே—மோசக்

கருவிளையாட் டம்மாயக் காமருல கெல்லாந்

திருவிளையாட் டம்மான் சிலம்பு.

அற்பூரு மன்பர் சிரத்து மலையகத்துங்

கற்பூர மேவுங் கதிரையே—பொற்பூரு

மஞ்சத்தான் றோற்று மறுகவரு வானடியே

மஞ்சத்தான் றோற்று மரண்.

மேயகொடி மாளிகையு மெய்யடியார் கூட்டமுமா

காயங் கடக்குங் கதிரையே—தீய

மடக்குஞ் சரத்தானை மாமுகனைப் போரின்

மடக்குஞ் சரத்தான் மலை.

மிக்க குறத்தியரு மென்புனப்புள் ளோப்புநருங்

கைக்குறி பார்க்குங் கதிரையே—கைக்குங்

கடமலையு மையற் கடமு மழித்துப்

படமலையு மையன் பதி.

அஞ்சுநடை யார்கதுப்பு மம்மவிணை யுஞ்செயிரில்

கஞ்சனை கடுக்குங் கதிரையே—விஞ்சுபல

மாயத்தா னாடல் வரைபகவை வேல்விடுமு

பாயத்தா னாடற் பதி.

வெண்ணகையார் கூந்தலிலும் வேடுவர்கள் காட்டினிலுங்

கண்ணி வளைக்குங் கதிரையே—நண்ணுங்

கருமாயச் சூரறுத்துக் காப்பான்சூர் வேலாற்

கருமாயச் சூரறுத்தான் காப்பு.

இந்துவத னத்த ரிளமுலையும் வீரர்களும்

கந்துகத்தே ரோட்டுங் கதிரையே—முந்தும்

பவமா வினையிடித்தான் பாதனலை மேலுற்

பவமா வினையிடித்தான் பற்று.

மன்னுகா ரிற்கடம்பு மாமணத்தி லாடவருங்

கன்னிகையை யேற்குங் கதிரையே—முன்னமலை

மாவர சத்தியத்த மால்கொளசூர் மைந்தடக்கு

மாவர சத்தியத்தன் வாழ்வு.

சொற்புலவர் தூக்கினிலுந் தூயமலர்ச் சோலையிலுங்

கற்பு மலருங் கதிரையே—வெற்புடனே

மாமூல வேரறுத்து வாழ்வமரர்க் கீந்தவஞ்ச

மாமூல வேரறுப்பான் வைப்பு.

நல்லார் மதிமுகத்து நாடு முலைமுகத்துங்

கல்லாரம் பூக்குங் கதிரையே—மல்லாடி

வந்தே விழுந்தோரன் மாயவடி வேற்பணித்த

வந்தே விழுந்தோரன் வாழ்வு.

நற்குணமு ளோருமரு ணாடுசிவ யோகியருங்

கற்பங் கடக்குங் கதிரையே—வெற்பரிந்தோன்

துரவியா கத்தற் சுமப்பா னருள்புரிந்த

மாவியா கத்தன் மலை.

மாலேறு சோலை மலையருகும் வண்டுகளுங்

காலாறு காட்டுங் கதிரையே—சேலேவை

மாவடுவை வேலைமலை மானோக்கி யார்தழுவு

மாவடுவை வேலை மலை.

துப்பிதழி யாரிடையுஞ் சூலுடையார் மென்னடையுங்

கைப்பிடியை யொக்குங் கதிரையே—செப்புமொழி

கண்டடக்குங் கோலம் பகப்பிடிசேர் கற்பகமென்

கண்டடக்குங் கோலனமர் காப்பு.

தண்டைக்கால் கண்டவருந் தானோர்ந்து கொண்டவருங்

கண்ட மறுக்குங் கதிரையே—பண்டொருநாள்

மானிடமா னார்க்கு மறைமொழிந்து மானுக்காய்

மானிட மானார் வரை.

ஐயர்க் கிகுளை யடைந்தோருக் கில்வாழ்வோர்

கையடை யீயுங் கதிரையே—செய்ய

புலிமரமா னான்சேர் பொருப்பிடத்து முன்னாட்

புலிமரமா னான்சேர் பொருப்பு.

வைத்த படைப்பையிலு மாமணிநீர்ப் பாறையிலுங்

கத்தரி மேவுங் கதிரையே—நத்திச்

சிவவேட மாகித் திருந்திழையைச் சேர்ந்த

சிவவேட னாதிச் சிலம்பு.

கொண்டுபொருள் விற்போருங் கூறுசெபஞ் செய்வோருங்

கண்டிகையிற் சுற்றுங் கதிரையே—பண்டொருநாண்

மாப்பிடியை யுண்டநடை வள்ளியள்ளி யீந்ததினை

மாப்பிடியை யுண்டான் மலை.

சொற்கிளியை யோட்டுபசுந் தோகையரு மாய்ச்சியருங்

கற்கரத்தைச் சுற்றுங் கதிரையே—நற்புனமே

வாசுகமே வென்றவிழி வள்ளியைய டைந்தெனுடன்

வாசுகமே வென்றான் வரை.

நல்லார்கள் சுந்தரமு நாறுமலர்ப் பூந்தடமுங்

கல்லாரங் காட்டுங் கதிரையே—அல்லல்கெட

மாதேவா வென்றார் வினைதுடைத்து வள்ளிபின்போய்

மாதேவா வென்றார் மலை.

மட்டுவிரி தாழைகளும் வாய்த்தநடைத் தொண்டர்களுங்

கட்டுச்சோ றேந்துங் கதிரையே—யுட்டெளிவால்

ஐயவா வென்றார்க் கருளியொரு மான்பிடிக்க

ஐயவா வென்றா ரகம்.

கும்பமுலை மங்கையருங் கோதிலடி யாருமுருக்

கம்பிடித் தார்க்குங் கதிரையே—இம்பர்

வடக்கோடு வையகத்தன் மைத்துனன்மால் யானை

வடக்கோடு வையகத்தன் வாழ்வு.

கொட்டிக் குளத்தலவன் கூறுகற்பி னோர்கணவன்

கட்டளையில் வாழுங் கதிரையே—இட்டிடையாய்!

பூந்தழைசேர் கஞ்சப் புரிகுழலாட் கிவ்வரிய

மாந்தழைசே ரென்றான் வரை.

பேசுகா ணிக்கையிடும் பேருமலை வாணர்களுங்

காசறையிற் சேர்க்குங் கதிரையே—தூசங்

கொருகுருந்து கொண்டாண் டொழித்தான் தங்கச்சித்

தருகுருந்து கொண்ட தலம்.

வேட்டுவனாய்க் கேட்டதுநீர் வேட்டுவினாய் வேண்டியதுங்

காட்டுவா வாகுங் கதிரையே—நாட்டமுடன்

தாமரையா மத்துத் தனித்துவள்ளி யைக்கொளும்பொற்

றாமரையா மத்தர் சரண்.

செம்பொனளிப் போர்கரமுஞ் சேயிழையார் கந்தரமுங்

கம்பொருவுஞ் சீர்சால் கதிரையே—பம்புவலி

போகத் திருந்தார் புரமழித்தார் வள்ளியுடன்

போகத் திருந்தார் புரம்.

அச்சங்கத் தாமரைவா யன்பர்மலர்த் தாமரைவாய்க்

கைச்சங்க மூதுங் கதிரையே—மெச்சுதிருக்

கோலங்கை யானமரர் கோனுதவு வாரணத்தின்

கோலங்கை யானமருங் குன்று.

பாலனசொல் லாரிடைமுன் பக்கமுமைக் காவுமறு

காலரவங் காட்டுங் கதிரையே—நீலநிற

மானபரங் குன்றத்தான் மன்னுங் கருணைவடி

வானபரங் குன்றத்தான் வாழ்வு.

செப்புமறை யோர்சுடர்க்குந் தேற்றிஞர் மங்கையர்க்குங்

கைப்பதிகங் காட்டுங் கதிரையே—மெய்ப்பொருளை

ஏரகத்தார்க் கொன்று மிடரிருக்கா தாளுமரு

ளேரகத்தார்க் கொன்று மிடம்.

பொற்கொடியார் நெஞ்சகமும் புன்னகையுங் கந்தரமுங்

கற்பணியைக் காட்டுங் கதிரையே—வெற்பிற்

பழநிமலை மைந்தன் பணிந்தார்க் கருளும்

பழநிமலை மைந்தன் பதி.

செல்வர்களுங் கானடையிற் செல்வோரும் வந்திரவிற்

கல்வீடு சேருங் கதிரையே—வல்லியொரு

பாலாவி னன்குடிலை பன்னுகென முன்பகரும்

பாலாவி னன்குடியான் பற்று.

பூண்டவடி யார்சிரத்திற் போர்புரிவோர் செங்கரத்திற்

காண்டப மேந்துங் கதிரையே—யாண்டுமனக்

கோதணிகை யாளரிடங் கூடாக் குருபரனெங்

கோதணிகை யாளன் குலம்.

சொற்புலவர் தூக்கினிலே தோழியறத் திற்றலைவி

கற்பனைபா ராட்டுங் கதிரையே—சுற்றுதிரை

தெள்ளிமுத் தங்கொடுக்குஞ் சீரலைவா யானணைத்து

வள்ளிமுத் தங்கொடுத்தான் வாழ்வு.

தூயதவத் தார்மனமுந் தோகையர்கள் சேல்விழியுங்

காயம் பழிக்குங் கதிரையே—மாய

மலையு மலைவாயா மாமரமு மாய

மலையுமலை வாயான் மலை.

மெய்யன்பர் செய்யுளிலும் வேடுவர்கள் சாணையிலுந்

கையம்பு தீட்டுங் கதிரையே—துய்ய

மழமுதிருஞ் சொல்லமுதம் வள்ளிதா வென்ற

பழமுதிருஞ் சோலையான் பற்று.

வித்தார் வயல்வரம்பில் வேடர் சிறுகுடியிற்

கத்தூரி வாழுங் கதிரையே—பத்துடைய

மாவடியார் கந்த மலர்தூவி வாழ்த்துகச்சி

மாவடியார் கந்தன் மலை.

தொண்டர் திருவுருவிற் றொல்வீரர் கச்சுடையிற்

கண்டகம் மேவுங் கதிரையே—அண்டுபவங்

குன்றக் குடிமுழுது மாளுங் குமரகுரு

குன்றக் குடிமுருகன் குன்று.

சீலமுறு யோகியருஞ் சேவடியைப் பூணுநருங்

காலங் கடக்குங் கதிரையே—நேயமுள

வாச வனத்தன் மடவார் மணவாளன்

வாச வனத்தன் வரை.

ஒண்டொடி நல்லா ருரைநடையு நெல்வயலுங்

கண்டனங் காட்டுங் கதிரையே—கண்டபடி

பாவையான் பாடப் பரிந்துகேட் டின்பருளு

மாவையான் பாடன் மலை.

சீர்முகம்பூ வன்னார் திருநுதலுந் தாழ்குழலுங்

கார்முகங் காட்டுங் கதிரையே—சேரு

மயில்வாக னத்த னருமருக னேறு

மயில்வா கனத்தன் மலை.

தூவியிள மஞ்ஞைகளுந் தொண்டர்களு மாவின்பாற்

காவடிவைத் தாடுங் கதிரையே—தாவுமடல்

அஞ்சே வலத்தனங்கை மாங்கனிக்குப் பூவலஞ்செய்

அஞ்சே வலத்த னகம்.

ஆராம முல்லை யணிவரையி லாவணத்திற்

காரா மணிசேர் கதிரையே—சேரு

மகரமுதல் வன்னங்க ளாயினான் வாரி

மகரமுதல் வன்னன் வரை.

வாய்ச்ச தருநிரையும் வண்டமிழோர் வெண்கவியுங்

காய்ச்சசீர் விரவுங் கதிரையே—ஓய்ச்சலிலாப்

பந்தத் திருக்குடையப் பார்த்ததெனையாள் பன்னிரண்டு

பந்தத் திருக்குடையான் பற்று.

மண்மீ தணிநதியு மாதர்முகத் தாமரையுங்

கண்மீ னுலாவுங் கதிரையே—யுண்ணெகிழ்வாற்

பாற்கா வடியாடும் பத்தர்க் கருளுமறை

பாற்கா வடியான் பதி.

முட்செறியுஞ் சாரலிலு மொய்குழலார் வாண்முகத்துங்

கட்செவி யோடுங் கதிரையே—அச்ச

மறுத்தாழாத் தாளார்தம் மாயவஞ் ஞான

மறுத்தாளாத் தாளார்தம் வாழ்வு.

நம்பனுறை பேடகமு நல்லாவி னெய்விளக்குங்

கம்பமா வேறுங் கதிரையே—கும்பிடுவோர்

சங்கடம்ப னாளுஞ் சிதைத்தருளைத் தந்தகந்தன்

செங்கடம்ப னாளுஞ் சிலம்பு.

தந்தமணிப் பேடகத்திற் சார்புனத்துப் பாத்திகளிற்

கந்தமு லஞ்சேர் கதிரையே—தந்தமணி

கைக்கும்ப கம்பக் கடகளிற்றை யேறியு

கைக்கும் பகவனுறை காப்பு.

பேணிப் பணிகுநரும் பெட்பார் மதவேளுங்

காணிக்கை யேந்துங் கதிரையே—பேணித்

திருவோண தீர்த்தன் றிசைமுகன்சே விக்குந்

திருவோண தீர்த்தன் சிலம்பு.

வைத்தமணிப் பந்தர்களு மானமலி வீரர்களுங்

கத்திகை தூக்குங் கதிரையே—குத்திச்

செருப்பா லடித்தானைச் சேர்வித்தான் துரைச்

செருப்பா லடித்தான் சிலம்பு.

நிட்டைபுரி வோர்பிறவி நீர்ப்பெருக்கம் நெற்கழனிக்

கட்டங் கழிக்குங் கதிரையே—உட்டெளியப்

போதமருந் திட்டிப் புருடோத் தமர்க்கன்று

போதமருந் திட்டான் புரம்.

குட்டமலர் தாமரையுங் கோதிலடி யார்மலமுங்

கட்டவிழக் காலுங் கதிரையே—யுட்டெளிவில்

அஞ்சத்தா னானுன் னடைக்கலமென் றேத்தவருள்

அஞ்சத்தா னானுன் னகம்.

பொற்பார் கழகத்தும் போகும் வழியகத்துங்

கற்பா ரிருக்குங் கதிரையே—நற்புலவன்

வேன்முட்டை யென்றூழ் மிகுசுரத்துப் பேர்வினவு

நான்முட்டை யென்றா னகம்.

மாமயல்கூர் காமுகரில் வண்பொருளி லன்பருருக்

காமனம்பு தைக்குங் கதிரையே-தேமருவு

நன்னா வலங்கனி நாவலத் தாட்கீந்த

நன்னா வலங்க னகம்.

மல்லனீர் மூழ்குநரு மாசிறவ ருங்காவிக்

கல்லுடை தோய்க்குங் கதிரையே—சொல்லிறைவர்

மாவின் பழப்போரில் வண்பழனி போயெவர்க்கு

மாவின் பளப்போன் மலை.

பட்டா ரிடையார் பருவிழியு மேம்பாலுங்

கட்டா ரிவருங் கதிரையே—கட்டிளமைக்

கும்பமுனி யத்தனத்துக் கொம்பனையாட் கின்பமருள்

கும்பமுனி யத்தனத்துங் குன்று.

பொங்கு மணிநதியும் பூட்கைக் கொடிச்சியருங்

கங்கங் கிடிக்குங் கதிரையே—சங்கப்

பலகையுடை யார்க்குப் பனுவலுரை தேற்றும்

பலகை யுடையார் பதி.

மால்விழியார் வாண்முகத்தின் மைந்தர்வலச் செங்கரத்திற்

காலயில் காட்டுங் கதிரையே—சேலறுக்குங்

கண்ணா றிருங்கூந்தற் கண்ணியரோ டாடுமலர்க்

கண்ணா றிரண்டுடையான் காப்பு.

கொம்பாற் கொடிச்சியருங் கோபமத யானைகளுங்

கம்ப மிடிக்குங் கதிரையே—கொம்பெருமை

மாட்டானென் பான்வாள் வயவீரர்க் கஞ்சிவர

மாட்டானென் பான்வாள் வரை.

செய்யமட வாரணியுஞ் செல்வத் திருவடியுங்

கைவலமே காட்டுங் கதிரையே—செய்ய

கருப்புரச் சோதிதலைக் காட்டினார் மாட்டு

விருப்புரச் சோதிதலை வெற்பு.

வஞ்சியர்கள் மார்பகத்து மாமலையின் சார்பகத்துங்

கஞ்சுகச்சீர் மேவுங் கதிரையே—கொஞ்சுமொழி

மஞ்சோதி வள்ளி மணவாள னாகியப

ரஞ்சோதி வாழு மரண்.

எண்ணுநருக் கின்னருளால் ஞாலத்துக் கோர்முகத்தாற்

கண்ணிருள் சீக்குங் கதிரையே—எண்ணி

யுருவேற்று மையர்க் குளமாசு தீர்த்தின்

னுருவேற்று மைய னுறைவு.

ஆற்றாச் சிறுவர்களு மம்மான் றிருமகனுங்

காற்றே ருருட்டுங் கதிரையே—போற்றியே

ஓங்குமா ராயநம வென்றார்க் குளந்திருத்து

மோங்குமா ராயனம ரூர்.

ஓதரக ராவொலியு மொண்டொடியார் கூர்விழியுங்

காதம் பரியுங் கதிரையே—மோதுபவம்

ஏழுமலை யாவா றெமக்கருள்வா னெஞ்ஞான்று

மேழுமலை யாள்வா னிடம்.

இட்டிடையார் வாய்மொழியி லின்பமலி யும்விழவிற்

கட்டியங் கூறுங் கதிரையே—கட்டமழி

நீற்றுமலை யாள நியமமலை நீள்பிறவி

யாற்றுமலை யாள னகம்.

ஆண்டுமலை யேறுநரு மாபரணம் பூணுநருங்

காண்டம தேந்துங் கதிரையே—ஈண்டிவரக்

கோக்குவித்துக் காக்கக் குடைபிடித்த கோன்மருக

னாக்குவித்துக் காப்பா னரண்.

செய்யு மணத்தினிலுஞ் சேயிழையார் கூடலிலுங்

கையாழி கூட்டுங் கதிரையே—மெய்யாகக்

காலையிலா லத்திகொளுங் கன்னியர்கள் வாழுமொளி

காலயிலா லத்திகொள்வான் காப்பு.

ஏந்துசிலை வீரர்களு மின்றமிழ்ப்பா வாணர்களுங்

காந்தம் பராவுங் கதிரையே—போந்த

கரும்பனைக்கைக் குஞ்சரத்தான் கண்ணுதித்தா னூருங்

கரும்பனைக்கைக் குஞ்சரத்தான் கண்.

கொண்டநிய மத்தினருங் கூறுமகா ரின்மொழியுங்

கண்ட மறுக்குங் கதிரையே—தொண்டர்க்

கறமறைந்த சேய னருளிலா வண்டர்க்

கறமறைந்த சேய னகம்.

ஐயர்புகழ் நாணு மரிவையரும் போதகமுங்

கையமுகங் காட்டுங் கதிரையே—மெய்யன்பர்

செந்தீக் குளமடைந்து தெய்வந் தெரிக்குமிறை

செந்தீக் குளமடைந்தான் சேர்வு.

அஞ்சமலி வாவியிலு மன்பர்துதி பாணியிலுங்

கஞ்ச மலியுங் கதிரையே—நஞ்சத்தாற்

கண்டங் கறுப்பாற் குரைத்தான் கடியவினை

கண்டங் கறுப்பான் கடம்.

அக்கோக் குரவையரு மாறியங்கு மன்பர்களுங்

கைக்கோப்புக் கொள்ளுங் கதிரையே—இக்குவளை

வேளைக் கடைக்கணிப்பால் வென்றவன்சே யஞ்சியழும்

வேளைக் கடைக்கணிப்பான் வெற்பு.

மாமயிலன் னார்குழலில் வண்டலைகைத் தண்டிலிசை

காமரம் பாடுங் கதிரையே—மாமயல்செய்

தண்ணவா வென்றா ரகத்தரொரு மாவாக

அண்ணவா வென்றா ரகம்.

வாரிரும்ப லாவின் மகோததியில் வந்துபயன்

காரினம்வீழ்ந் துண்ணுங் கதிரையே—நேரம்பு

சம்பந்த னுக்குகந்த சந்தமுலை யாள்பயந்த

சம்பந்த னுக்குகந்த சார்பு.

பேசுபிறப் பஞ்சுநரும் பீதகவி னையரும்பொற்

காசுபறி யென்னுங் கதிரையே—நேசமுடன்

பாவடியிற் சிந்தினாற் பாடவருள் வோன்பகையைத்

தாவடியிற் சிந்தினான் சார்பு.

மாயாவே யான்வடிவு மங்கைநல்லார் மென்றோளுங்

காயாவே யொக்குங் கதிரையே—தூயவுமை

மாதிட மீவான் மகன்மறலிக் கஞ்சாத

மாதிட மீவான் மலை.

வேயார் நதிக்கரையும் வெற்பாருஞ் சாரல்களுங்

காயாமா மேவுங் கதிரையே—ஓயாமல்

வேலவா வாவென்று வேண்டிப் பணிகுநர்க்கு

மாலவா வாட்டுவோன் வாழ்வு.

நீலாறு காமலரு நீள்வீதிச் சாருமணி

காலாறு பாயுங் கதிரையே—மாலான

நெஞ்ச மறுப்பான் நினையுமன்பர் மூலமல

வஞ்ச மறுப்பான் மலை.

மாவிரத மாதவரும் வண்ணமலர் வாவிகளுங்

காவி யணியுங் கதிரையே—தூவி

யணிமயிலான் சேவலா னன்பிலார்க் கென்று

மணிமையிலான் சேவலா னன்பு.

போதகங் கொம்பாலும் பூங்கொடியார் வாயாலுங்

காதன்முத் தீயுங் கதிரையே—ஓது

மருவார்க டம்பகையை வாட்டுமணி வைவேல்

மருவார் கடம்பன் வரை.

இட்டபாற் சட்டியினி லேந்துகின்ற காவடியிற்

கட்டளை மேவுங் கதிரையே—முட்டியமர்

ஏற்றினான் வாழ விரங்கியடி யீந்துகரை

யேற்றினான் வாழு மிடம்.

நச்சுமட மின்னாரு நந்துபொரு ளீட்டுநருங்

கச்சவட மேற்கொள் கதிரையே—வச்சிரத்தன்

கைப்பிடியாக் கொண்டானக் கானக் குறத்திதரு

கைப்பிடியாக் கொண்டான்றன் காப்பு.

மன்னிய தோன்றி மலருமதி நூலினருங்

கன்னியத்தங் காட்டுங் கதிரையே—துன்னுபல

கோட்டுவரி மாவுருவங் கோதினான் கொண்டநெடுங்

கோட்டுவரி மாவுருவன் குன்று.

பாற்பாப்பு ளொன்று படைவீர ரோர்நான்கு

காற்பா டலஞ்சேர் கதிரையே—போற்றியருள்

என்னத்தா னென்பா லிடர்களைவா னிக்குவே

ளென்னத்தா னென்பா னிடம்.

விண்ணுறை சோலை வியன்மலரும் வேண்டினருங்

கண்ணறை போக்குங் கதிரையே—கண்ணருளி

வாகா முருகா வரிமருகா பன்னிரண்டு

வாகா வெனவருவான் வைப்பு.

ஆசை மறந்தவரு மண்டிவந்து வேண்டுநருங்

காச மறுக்குங் கதிரையே—ஆசை

விடக்குஞ் சரிக்கும் வினையுமுறுத் தாளுங்

கடக்குஞ் சரிமகிழ்நன் காப்பு.

நல்ல தவரு நடந்து வருவோருங்

கல்லறையிற் றங்குங் கதிரையே—அல்லன்மிகு

கண்டீதி வைத்தென் கரும மலமுடியக்

கண்டீதி வைப்பான்றன் காப்பு.

ஓதுவார் நாவி லுயர்ந்ததே மாமரத்திற்

காதம் பரிவாழ் கதிரையே—போதலரும்

பன்னிரண்டு கண்ணான் பழநிப் பழம்பதியான்

என்னிரண்டு கண்ணா னிடம்.

பாலமரும் பூங்காவிற் பாலிடையர் முன்றில்வயிற்

காலச மேவுங் கதிரையே—ஏலுமுடற்

போக்கும் வரவும் புரிவினையும் பொல்லாப்பும்

போக்கும் வரதன் புகல்.

செவ்வைப் புனத்திற் றிருவிழாக் காலத்திற்

கவ்வை மலியுங் கதிரையே—யெவ்வமறப்

பார்ப்பா னமர்ந்துவிழி பன்னிரண்டாற் பார்த்தவற்றைத்

தீர்ப்பா னமருஞ் சிலம்பு.

சாந்த நிலைத்தொண்டர் தாலுஞ் சிறுகுடியுங்

காந்தாரம் பாடுங் கதிரையே—ஏந்துமுச்சங்

கத்த னமாதிக் கடவுள் பரமசு

கத்தனமா வென்பான்றன் காப்பு.

வாய்ச்ச கணியில் வனவேடர் வாழ்குடியிற்

காய்ச்சுரை மேவுங் கதிரையே—வாய்ச்சமுதன்

மாக்குஞ் சரவணத்தன் மாமனத்தன் மாறிலின்ப

மாக்குஞ் சரவணத்தன் வாழ்வு.

முட்டுவழிச் செல்வோரு மூதறிஞ ருந்தலையிற்

கட்டிறக்கி யாறுங் கதிரையே—முட்டு

மிருமலச் சிக்கறுத்தே யென்னையாண் மும்மைக்

கருமலச் சிக்கறுப்பான் காப்பு.

மேல்கீழ்ப் பிறவிகளில் வீழ்குநரை வேர்த்தோரைக்

காலாறு தல்செய் கதிரையே—நாலாறு

மேழுமைஞ்சி னீங்கி யினிதருள வெம்பிறவி

நாளுமைஞ்சி நீங்கு நகம்.

தெய்வப் பணியுந் திருத்தல யாத்திரையுங்

கைவல்லி யஞ்செய் கதிரையே—செய்யதமிழ்

முன்பாட்டுங் கேட்டான் முதிர்வினைகண் மாற்றவுவந்

தென்பாட்டுங் கேட்டா னிடம்.