செல்வச் சந்நிதிச் செவ்வேள் போற்றி

கல்வியும் செல்வமும் அருள்வாய் போற்றி

வெல்லும் தனிவேற் கரத்தாய் போற்றி

வல்வினை நீக்கிக் காப்பாய் போற்றி

அல்லும் பகலும் நினைவார் மனத்தில்

அருளுருத் தாங்கி யமைவாய் போற்றி

நல்லா ருறையும் சந்நிதி யமர்ந்து

எல்லா நலன்களுந் தருவாய் போற்றி

காண்பவர்க் கினிய காட்சிகள் நல்கித்

தாண்டவம் புரியும் தங்கவேல் போற்றி

தோணித் துறையில் தோணி யப்பனாய்

தோன்றாத் துணையருள் சுடர்வேல் போற்றி

வீண்பிற வியினில் வீழ்ந்தழி யாமல்

ஆண்டருள் புரியும் அருள்வேல் போற்றி

மாண்பார் சந்நிதி மருவிய அன்பர்க்(கு)

ஊண்பே றளிக்கும் ஒளிவேல் போற்றி

முத்திக் கரையின் முத்தொளி காட்டும்

முத்துக் குமரன் கைவேல் போற்றி

பத்திசெய் யடியார் சித்திகள் பெறவே

வித்தைகள் புரியும் வீரவேல் போற்றி

சுத்த நெறியில் சித்தம் வைப்பவர்

மெத்திய வினைதீர் வேலே போற்றி

நித்தமும் அடியவர் நேர்த்திகள் விரும்பும்

வித்தக ஞான வெற்றிவேல் போற்றி

அழுவார் தொழுவார் அல்லல் நீக்கி

அருளொளி காட்டும் ஆதிவேல் போற்றி

விழிக்கும் வழிக்கும் பெருந்துணை யாகிய

செழிக்கும் சந்நிதிச் சீர்வேல் போற்றி

அழிக்கும் தீவினை யடுக்கா வண்ணம்

தெழித்தே யுறப்பும் செய்யவேல் போற்றி

அண்டினர்க் கருளும் அருள்வேல் போற்றி

இச்சா ஞானக் கிரியையின் வடிவப்

பச்சை மயிலோன் பருவேல் போற்றி

பண்டைப் பழவினை வேரறுத் தருளும்

தண்டைச் சிலம்பொளிர் தனிவேல் போற்றி

விண்ணவர் துன்பம் விரைவினி லழியத்

திண்ணிய சூர்முதல் தெறுவேல் போற்றி

மண்ணவர் மனங்கரை சந்நிதித் தலத்து

மன்னிய தனிவேல் போற்றி போற்றி

குன்றம்' எறிந்து கொற்றம் தாங்கிய

வன்றிறற் படையோன் வளர்வேல் போற்றி

மன்றிலா டிக்கு மாண்பொரு ளுரைத்த

குன்றமர் குழந்தையின் கூர்வேல் போற்றி

சென்றுறு பிறவியின் வழியடைத் தருளும்

வன்றிறல் குமரன் வடிவேல் போற்றி

செல்வச் சந்நிதி சேர்ந்திடு மடியருக்

கெல்லா நலமுந் தரும்வேல் போற்றி

தெய்வ குஞ்சரியும் சீர்க்குற வள்ளியும்

தைவரு குமரன் தனிவேல் போற்றி

மோன மூர்த்தியா யெழுந்தருள் புரியும்

ஞானப் பழத்தின் நல்லவேல் போற்றி

உள்ளுள ருவக்கும் பேரழ கொளிரும்

தெள்ளிய ஞானத் திருவேல் போற்றி

குறுமுனிக் கினிய தமிழுமு துதவிய

அறுமுகக் குமரனின் அருள்வேல் போற்றி

திருமுரு காற்றுப் படைகொண் டருளி

வருமொரு பூதம் வதைத்தவேல் போற்றி

கற்புங் காதலும் காட்டிய தமிழின்

பொற்புறு குமரனின் போர்வேல் போற்றி

அன்னம் பாலித் தருள்வாய் போற்றி

முன்னிய வெல்லாம் தருதாய் போற்றி

வன்னக் காவடி முரசுடன் சங்கம்

சின்னம் விரும்பும் செவ்வேல் போற்றி

கற்பூ ரத்தொளி யூடே காட்சி

பொற்புட னருளும் புனிதவேல் போற்றி

செல்வச் சந்நிதி வெற்றிவேல் போற்றி

நல்குர வொழிக்கும் நல்வேல் போற்றி

கடம்பணி குமரன் கைவேல் போற்றி

இடம்பல விலங்கும் எழில்வேல் போற்றி

ஞான வடிவச் சத்திவேல் போற்றி

மோனத்தி னுள்ளே முளைத்தவேல் போற்றி

அன்னக் கந்தனின் அருள்வேல் போற்றி

சொன்ன மருளும் சுடர்வேல் போற்றி

முன்னம் குறிஞ்சியில் மோகம் விளைத்த

தன்னொளிக் கந்தன் தனிவேல் போற்றி

கணபதிக் கிளையோன் கரவேல் போற்றி

குணங்கடந் தொளிரும் கூர்வேல் போற்றி

சிவசின் மயனின் சீர்வேல் போற்றி

நவகோள் நலியா வண்ணம் நல்லருள்

மிகவே தந்திடும் மிளிர்வேல் போற்றி

சரவணந் தன்னில் தோன்றிய சாமியின்

அரகர ஒலிக்கு அருள்வேல் போற்றி

கார்த்திகைத் தாயர் பாலுண் டவனின்

கீர்த்தி பெருக்கும் கிளர்வேல் போற்றி

நாத விந்தினில் நடனம் புரியும்

ஆதிக் குமரன் அரும்வேல் போற்றி

அன்னசத் திரத்தி லருள்கொடுத் தமரும்

வன்ன வடிவேல் போற்றி போற்றி

சந்நிதிக் கந்தன் சயவேல் போற்றி

உன்னுவார் வினைதீர் ஒளிவேல் போற்றி

சரவண பவனின் சயவேல் போற்றி

அரனருள் முருகனின் ஆதிவேல் போற்றி

அரகர முருக குருபர சரவண

வரந்தர வருக வருக வருக

சந்நிதிச் செல்வனின் சயவேல் காக்க

சரவண பவஓம் சரவண பவஓம்