மாவைக் கந்தா மலரடி போற்றி

தேவர் சேனா பதியே போற்றி

சிந்தா குலம்தீர் செவ்வேள் போற்றி

வந்தனை செய்வார் வாழ்வே போற்றி

நந்தா விளக்கா யொளிர்வாய் போற்றி

கொந்தார் கடம்பணி கோவே போற்றி

ஆரா வியற்கை யவாவினை நீக்கும்

பேரா வின்பப் பேறே போற்றி

ஏறு மயிலினி லேறி விளையாடும்

ஆறு முகத்தெம் மையா போற்றி

கோயிற் கடவை யிறங்கு துறையின்

நேயப் பெயர்பொறி நிர்மலா போற்றி

கொடித்திரு விழாவிற் கோலங் காட்டி

அடியரைக் காக்கு மருளுரு போற்றி

சங்காபி டேகத் தீர்த்த மாடித்

துங்க நடம்புரி தூயோய் போற்றி

வேட்டை விழாவில் வீரங் காட்டி

யாடல் புரியு மமலா போற்றி

கார்த்திகை விழாவில் தேனுடன் தினையும்

சேர்ந்தமா விளக்கிற் றிகழ்வோய் போற்றி

பூஞ்சப் பரத்திற் பொலிவுடன் றோன்றிக்

காஞ்சன மலர்ப்பதம் காட்டுவாய் போற்றி

தில்லையந் தணரின் றிருக்கரப் பூசையிற்

சொல்லு மந்திரப் பொருளே போற்றி

தேர்ப்பவ னிதனில் தேவி யருடனே

நேர்த்தத் துவத்தை விளக்கினை போற்றி

ஆட்கொளும் வண்ணம் வருவாய் போற்றி

பூட்கைநன் றாகப் பொலிவாய் போற்றி

பேரியற் சப்பர மீதினி லமர்ந்து

பாரியல் காட்டும் பரனே போற்றி

தேர்முட் டிதனிற் றேவரும் யாவரும்

சேர்ந்தே பரவச் சிறந்தனை போற்றி

தேரடி யிருப்பிற் சேவக னாகிச்

சீரடி யார்க்கருள் சேந்தா போற்றி

ஆரா வியற்கை யழகா போற்றி

பேரா வியற்கைப் பேறே போற்றி

மாம்பழ விழாவில் மாதவம் காட்டி

நாற்பழம் பொருளென நாட்டினை போற்றி

முத்துக் குமரா முதல்வா போற்றி

வித்தகம் விளக்கும் விமலா போற்றி

ஞானப் பழமாய் நின்றாய் போற்றி

ஊனப் பிறவி யொழிப்பாய் போற்றி

குன்றமர்ந் தாடுங் குமாரா போற்றி

வன்றிற லவுணரை வதைத்தோய் போற்றி

காவடி கரகம் ஆடுவோர் தமக்குச்

சேவடி யருளும் செல்வா போற்றி

நன்னடங் கொண்டு நகுல கிரிக்கடல்

மன்னியே தீர்த்தம் மகிழ்ந்தே யாடி

யடியவர்க் கருள்புரி யமலா போற்றி

மிடிதனைப் போக்கு மேலோய் போற்றி

கந்த சட்டியைக் கருத்துடன் நோற்பவர்

பந்த மறுத்தருள் கந்தா போற்றி

விளக்கி டதனில் வியங்கொளி காட்டித்

துளக்கம் தீர்க்கும் சுடரே போற்றி

சங்கப் புலவனா யமர்ந்தாய் போற்றி

தங்கத் தமிழைத் தந்தாய் போற்றி

குன்றெறிந் தாண்ட குமரவேள் போற்றி

வென்றிவேல் ஞான விகிர்தா போற்றி

கதிதந் தருள்புரி கற்பகம் போற்றி

விதிதனைச் சிறையிடு விமலா போற்றி

மயில்மிசை யேறி மகிழ்வோய் போற்றி

அயில்வே லேந்து மழகா போற்றி

ஒளவையின் தமிழுக் கருளினை போற்றி

செவ்விய அறுமுகச் சேயே போற்றி

அருண கரிக்கரு ளையா போற்றி

கருணைத் திருப்புகழ் களித்தாய் போற்றி

சொக்கே சன்றரு சுகிர்தா போற்றி

நக்கீ ரர்க்கருள் நம்பா போற்றி

அகத்தியர்க் கருளுங் குருமணி போற்றி

சகத்தினி லழகொளிர் தற்பரா போற்றி

சரவணப் பொய்கையிற் றவழ்ந்தோய் போற்றி

பிரணவந் தந்தைக் குரைத்தோய் போற்றி

கலியுக வரதனாய் வருவாய் போற்றி

வலிமையைத் தந்தே வளர்ப்பாய் போற்றி

பத்தர்க் கருளும் பாலா போற்றி

முத்தி கொடுக்கும் முதல்வா போற்றி

வள்ளி மணாளா வரதா போற்றி

கள்ளங் கெடுக்கும் கதிரே போற்றி

தேவசே னைக்கருள் சேயே போற்றி

ஏவருந் துதிக்கு மெழிலோய் போற்றி

செங்கடம் பணியும் செல்வா போற்றி

சங்கரன் பாலா சண்முகா போற்றி

உமைதரு மைந்தா வுத்தமா போற்றி

இமையவர்க் காக்கு மேந்தலே போற்றி

கெஞ்சு மடியரைக் கொஞ்சுவாய் போற்றி

மிஞ்சுங் கொடியரை மிதிப்பாய் போற்றி

குரைகட லொளித்த சூர்முதல் தடிந்தோய்

நரைதிரை யில்லா வாழ்வருள் போற்றி

உள்ளங் கவருங் கள்வா போற்றி

அள்ளக் குறையா வருளே போற்றி

தெள்ளமு தத்தின் றெளிவே போற்றி

உள்ளங் கோயில்கொள் குகனே போற்றி

ஆசா பாசம் தூசாய்ப் போக

நேசந் தந்தெமை யாளுவாய் போற்றி

சச்சிதா னந்தச் சிவகுரு போற்றி

விச்சையின் மூலப் பொருளே போற்றி

மாருத வல்லியின் மாமுகம் நீக்கி

மாவையி லமர்ந்தருள் மணியே போற்றி

சாவைத் தடுக்கும் சண்முகா போற்றி

சரவண பவஓம் சரவண பவஓம்

திருவடி தந்தாள் சரணஞ் சரணம்