பூதலத்தே யென்னைப் பிறப்பித்த தேனறியேன்

ஓதலற்றே னுந்நாமம் உன்னுகிலே னுன்னுருவம்

காதலற்றே னுன்பாற் கனிந்தடையே னென்றுமனக்

கூதலற்றே வாழ்வேன் குறுக்குத் துறையானே.

வாழும் பதமறியேன் வல்வினையா லென்னையிவண்

சூழும் பரிசனர்க்குஞ் சூழேன் நலமெதுவும்

பாழும் பிறவியிதால் பாரில் பயன்காணேன்

கோழும் பரேற்றுங் குறுக்குத் துறையானே.

நீதமுடன் போத நெறிநின்று நின்னரிய

பாதமலர் போற்றிப் பணிந்துருகி வாழ்வேனேல்

வேதனெனை யாக்கும் வினையிழப்பான் என்றென்றும்

கோதறுசீர் விஞ்சுங் குறுக்குத் துறையானே.

பொன்னை விரும்புவேன் புகழ்விரும்புவேன் பேதமுடன்

என்னை விரும்பா திடர்சூழ்வார் செய்மாயந்

தன்னை விரும்புவேன் தடுத்தருள வேண்டுகின்றேன்

கொன்னை விரும்புவேன் குறுக்குத் துறையானே.

ஆட்டி யெனைப்படைக்க ஆண்மை படைத்தவன்நீ

போட்டி யுனக்கதனிற் புல்லர் சிலர்முளைத்தார்

காட்டிக் கொடாதே கயவ ரவர்பிறகே

கூட்டி விடாதே குறுக்குத் துறையானே.

தப்பவர்பாற் செய்யேன் தனித்தேயான் வாழுகின்றேன்

எப்படியு மின்னல் எனக்கவரோ சூழுகின்றார்

இப்படிநீ ஏனோ எனைவிடுத்தா யன்னவர்பால்

கொப்படரும் மாவார் குறுக்குத் துறையானே.

என்னெனக்கு நேர்ந்தாலும் ஏதவத்தை பட்டாலும்

நின்னருளென் றெண்ணியான் நெஞ்சுரங் கொள்வதுடன்

அன்னவையெ லாம்நலத்திற் காமென் றறிந்திடவும்

கொன்னறவும் பாராய் குறுக்குத் துறையானே.

ஒதுங்கிநான் வாழ்ந்திடினும் ஓயா தெனைவிரட்டிப்

பதுங்குமா றாக்கிப் பதங்குலைப்ப தல்லாற்சீர்

எதுங்கொளாப் பேயரிடம் ஏனோ விடுத்தனையென்

கொதுங்கொளாய் வேலா குறுக்குத் துறையானே.

பாடுமிகக் காட்டிப் பயங்காட்டிப் பின்னரவர்

கோடுமனங் காட்டிக் குணக்கேடு காட்டியுன்றன்

பீடுமறந் தாட்டமிடும் புல்லரிடம் ஏனெனைநீ

கூடுமாறு விட்டாய் குறுக்குத் துறையானே.

காலமெல்லா முன்னைக் கரங்குவித்தும் என்னையிந்தச்

சீலமில்லார் பால்விடுத்துச் சீரழிப்ப தாமாமோ

வேலவனே மாந்தர் விரும்புகின்ற வாறுபல

கோலமெல்லாம் காட்டுங் குறுக்குத் துறையானே.

பெண்டுபிள்ளை கூட்டிப் பெருமிடியாம் பேய்கூட்டி

மண்டுகிளை கூட்டி மனச்சாட்சி யில்லவர்பால்

தொண்டுசெயக் கூட்டிச் சுகமளித்த என்விதியை

கொண்டுபுகழ் வேனோ குறுக்குத் துறையானே.

இன்மொழிகள் பேசும் எழிலார் குழல்சேரும்

பொன்மலரை என்மனத்தேன் போயடையா துன்னடியாம்

நன்மலரை நாடியமர் நற்பணியைச் செய்யுமெனின்

கொன்மயக்க முண்டோ குறுக்குத் துறையானே.

குன்றுருவ ஏமன் கொலைவேடன் என்னுயிர்ப்புள்

நன்றுகுறி வைத்துவரும் நாளெண்ணிக் காத்துநின்றான்

என்றவன்கை சேராமல் என்றனைநீ காப்பாயோ

குன்றுருவும் வேலோய் குறுக்குத் துறையானே.

வாளென்ன செய்யும் வலிந்தென்பால் வஞ்சமெண்ணும்

ஆளென்ன செய்யும் அலகையென் செய்திடுந்தீ

நாளென்ன செய்யும் நலமார்நின் வேல்தோன்றின்

கோளென்ன செய்யும் குறுக்குத் துறையானே.

ஆலமணி கண்டனருள் ஆறுமுகா வஞ்சகரென்

பாலமளி செய்யின் பலியா தெனைக்காக்கும்

வேலயிலாம் வன்னெருப்பில் வந்துபுழு பற்றிடுமோ

கோலமயி லானே குறுக்குத் துறையானே.

எல்லாமுன் தண்ணருளென் றெண்ணி யுலாவுகின்றேன்

பொல்லாரென் பாற்புரியும் பொல்லாங்கிற் கஞ்சுவனோ

கல்லான தூணைக் கரையா னரித்திடுமோ

கொல்லா தருள்வோய் குறுக்குத் துறையானே.

பல்லார் பகைமலிந்து பாரிலிடர் சூழ்ந்தாலும்

நல்லா யுனைப்பிரியேன் நாயகனே என்மயக்கம்

எல்லாம் அறிந்தவன்நீ என்னுயிரே மன்னுயிரைக்

கொல்லா வரந்தா குறுக்குத் துறையானே.

காமநெருப் பாலே கருகி யழிவேனுக்

கேமமெனத் தண்ணா ரினிய அருண்மழையை

நாமவடி வேலா நயந்து பொழியாயோ

கோமளம யூரா குறுக்குத் துறையானே.

பெற்றதுணை வித்தை புகட்டுதுணை தாரமென

உற்றதுணை பின்ன ருதித்ததுணை சுற்றமெனும்

மற்றதுணை யாவும் மதியேன் நிலைத்திருக்குங்

கொற்றதுணை நீயே குறுக்குத் துறையானே.

குண்டுவிழி யந்தகனின் கோரப் பிடியிலென்னைக்

கொண்டுவிடுத் தாலுங் கொடுங்கலிபாற் றள்ளாதே

கண்டுமொழி மானைக் கலந்தவனே நாயெனையாட்

கொண்டவனே நாதா குறுக்குத் துறையானே.

தீராதோ என்மிடியுந் தீர்த்துவைத்தா லாகாதோ

ஊராரோ காசுபண முள்ளவரை யேதுதிப்பர்

யாராரோ வாழுகின்றார் யானொருவன் தான்விலக்கோ

கூறாய்நீ வேலா குறுக்குத் துறையானே.

அமரநாட் டாவினிடம் அந்தோமோர் கேட்டவன்போல்

நமதுபாற் பொன்பொருளை நாடினனென் றெள்ளாதே

குமரனே வேலா குறுக்குத் துறையானே.

மற்றவரிம் மாநிலத்தே மாண்பொருளை யீட்டிமிகக்

கொற்றமுடன் வாழ்ந்தனரக் கூறெனக்கே காட்டாமல்

சுற்றமெலாந் தூற்றவெனைத் தோற்றுவித்த தேனறியேன்

கொற்றவனே வேலா குறுக்குத் துறையானே.

செந்திருவார் பெண்ணெனினுஞ் செப்புமுலை யில்லாளேல்

எந்தவிதம் பெண்ணாவாள் இன்பமவ ளாலுமுண்டோ

நந்தலிலாப் பொன்னிலையேல் நன்னடைக்குப் பீடுளதோ

கொந்தடர்க டம்பா குறுக்குத் துறையானே.

நாளமிலாப் பொய்கை நறுமணமில் லாதமலர்

தாளமிலாப் பாட்டு தயவளியி லாவீரம்

ஆளனிலாள் பேரழகோ டாஸ்தியிலான் கூர்மதியும்

கூளமன்றோ வேலா குறுக்குத் துறையானே.

உருக்கிடுமன் பேனோ உணர்வேனோ பன்னூலாற்

பெருக்குமறி வேனோ பிறர்புகழும் பண்பேனோ

நெருக்குமிடி தீர்க்கும் நிதிமிகவே யான்குவிக்கக்

குறுக்குவழி காட்டாய் குறுக்குத் துறையானே.

கற்பகம ரத்தடியிற் காஞ்சிரங் காய்விரும்பும்

அற்பனிவ னென்றே அறிஞர் எனைப்பழிப்பர்

பொற்புடையன் னார்வறுமைப் பேழ்வாயிற் பட்டிருப்பின்

குற்றமெனைக் கூறார் குறுக்குத் துறையானே.

ஆகூ ழொருநூறா யாக்கிவைத்த அக்கணமே

போகூ ழிருநூறாய்ப் பெம்மானே போக்கிவைத்தாய்

மாகூ ழெனக்குறுமோ மாளாக் கடன்சுமந்து

கோகூ ழடைந்தேன் குறுக்குத் துறையானே.

கருமாதி நோயிழவு கல்யாணம் என்றிவைக்கே

பெருவாரி யாய்ப்பொருளும் போய்விடுவ தாயினெனக்

குறுவாழ்வு நன்றுறுமோ உம்பரிடர் தீரரனின்

குருநாதா தேவே குறுக்குத் துறையானே.

விஞ்சுமிடி தன்னை விரட்டியரு ளல்லதுன்றன்

கஞ்சமலர்ப் பாதம் கடிதிலெனைச் சேர்த்துவிடு

பஞ்சமென மற்றவர்பாற் பற்காட்டிப் பட்டவெலாங்

கொஞ்சமல வேலா குறுக்குத் துறையானே.

ஆவி யடங்கியபின் அங்கிதனக் கிந்தனமாம்

பாவி யுடலமிதைப் பற்றியின்றே ஓர்கமனல்

மேவி யுணுமாறு விடுத்தனையே வேறெவர்பாற்

கூவி யழுவேன் குறுக்குத் துறையானே.

வெம்பிடுமென் நெஞ்சமுறு வேதனைதீர்ப் பாயுனையே

நம்பிடுமென் பாற்படர்ந்த நல்குரவை வேரறுப்பாய்

தும்பியருள் கொண்டுவள்ளி தோளணைந்த வேடனுனைக்

கும்பிடுதல் வீணோ குறுக்குத் துறையானே.

கழுத்தை முறிக்குங் கடன்சுமந்து கண்டவர்பால்

இழுத்து மொழிபேசி ஏற்கக் கரம்நீட்டும்

எழுத்தைத் திருத்தியமைத் தென்னிடஞ்சேர் நல்குரவைக்

கொளுத்த வருவாய் குறுக்குத் துறையானே.

நாய்புரைய வாழவென்னை நானிலத்தேன் நீவிடுத்தாய்

தாய்புரியு மன்பவள்தன் சேய்தனையே பேணாமல்

வாய்பிளந்த பின்னர் வயிற்றிலறைந் தேங்குவதோ

கோய்பிளந்த வேலா குறுக்குத் துறையானே.

உள்ளவதென் என்றே யுணர்வாயென் வேண்டுதலைத்

தள்ளுவையோ அல்லதிவன் தஞ்சமென வந்தவெறும்

வெள்ளைமதி யன்புகலும் வேறறியா னென்றிரங்கிக்

கொள்ளுவையோ தோணேன் குறுக்குத் துறையானே. 35

பூவேறு முன்றனிரு பொற்பதமே யல்லதென்றன்

நாவேறு போற்றி நயந்ததுண்டோ இந்நிலையில்

நீவேறு நெஞ்சுமுறின் நேயனுமென் செய்திடுவேன்

கோவேயென் வேலா குறுக்குத் துறையானே.

முருகாவென் றோர்கால் மொழிந்திடினு மென்வினைகள்

உருகாவோ என்புலம்ப லுன்செவியு ளேறாதோ

சருகாயு லர்ந்தேன் தரித்திரமாம் வெங்கதிரால்

குருகாருஞ் சோலைக் குறுக்குத் துறையானே.

கந்தா முருகா கதிர்வேலா என்றுனையான்

நந்தா விருப்புடனே நாடோறுங் கூவிடினும்

இந்தா வருந்தாதே என்றிரங்கி வந்திலையே

கொந்தார் கடம்பா குறுக்குத் துறையானே.

தஞ்சமென வுன்றனிணை தாட்டா மரையடைந்தும்

அஞ்சலென வந்தெனைநீ ஆதரிக்கக் காணேனே

கஞ்சமலர் வேதன் கனமழித்த சேயவனே

கொஞ்சமிரங் காயோ குறுக்குத் துறையானே.

பட்டவெலாம் போதும் படமுடியா தின்னுமிடர்

அட்டமத்துக் காரியெனை யாட்டி யலைத்திடுங்கால்

எட்டவிருந் தாலுன் இனியவருள் என்னாம்அக்

கொட்டமடக் காயோ குறுக்குத் துறையானே.

வாராத வல்வினைகள் வந்தாலு மோர்நொடியில்

தீராவோ உன்பெயரைச் செப்பி னொருமுறையே

சீராக வாழவெனைச் செப்பனிட லென்றோசொல்

கூராரும் வேலா குறுக்குத் துறையானே.

விரும்புகிலே னாயிடினும் வீண்கடனே கொண்டதனால்

எறும்புகளின் வாய்ப்பட் டிழுபடுமோர் மண்புழுவாய்ப்

பெரும்படரே கொண்டேன் பிணைக்குறத்திக் காகவொரு

குறும்பனெனச் சென்ற குறுக்குத் துறையானே.

நீருங் குறைய நிலைகுலைந்த தாமரைபோல்

சீருங் குறைந்தேன் திரவியங்கு றைந்ததனால்

யாருங் குறையாய் எனைமதிக்கு மாறிவண்யான்

கூறுங் குறைந்தேன் குறுக்குத் துறையானே.

கணப்பொழு தேனுங் கலங்காத நெஞ்சமுடன்

பணப்பொரு ளாசை படர்வழியிற் செல்லாமல்

மணப்பொருள் மூழ்குன் மலரடியெண் ணேனேநிர்க்

குணப்பொரு ளானே குறுக்குத் துறையானே.

மக்கள் நலம்நாடி மல்குபொருள் தான்நாடிப்

ஒக்கல் துணைநாடி உற்றநண்பர் தாம்நாடிப்

பக்கம் வளருமென் பாழ்வயிற்றுக் கூண்நாடிக்

குக்கலு மானேன் குறுக்குத் துறையானே.

ஒன்றினைநி னைப்பேன்மற் றொன்றாகு மென்வாழ்வில்

என்றெனினு மேழையென் எண்ணம்போ லாவதுண்டோ

நன்றெனினுந் தீதெனினும் நாயகனுன் கட்டளையே

குன்றுருவும் வேலோய் குறுக்குத் துறையானே.

வேலா யுடனே வியனுலகில் நொந்துழல

ஏலா தினியும் இரக்கமிலை யோவுமையின்

பாலா குமரா படுகிழமாய் வள்ளிமுன்செல்

கோலா கலனே குறுக்குத் துறையானே.

பிறந்தநாட் கொண்டுனது பொற்பதமே போற்றுதற்கு

மறந்தநான் நின்னரிய மாணருளைக் கொள்வேனோ

இறந்துபோ மன்றேனும் என்பா லிரங்காயோ

குறந்தம ரானோய் குறுக்குத் துறையானே.

ஆட்டிவைத்த வாறடியேன் ஆடா திருப்பனோநீ

நாட்டிவைத்த வாறே நடந்திடுமென் றாலுமிடர்

ஒட்டிவைத்தா லாகாதோ உன்றன் திருவருளைக்

கூட்டிவைத்தா லுய்வேன் குறுக்குத் துறையானே.

புத்திவித்தை மாடுமனை பொன்பொருளிவ் வாறெதினுஞ்

சித்தியுற்று மென்னேசொல் சேதமவை யாகாவோ

பத்தியுற்று வாழ்வதுவே பண்பாம் கொடுந்துரைக்

குத்தியபொன் வேலோய் குறுக்குத் துறையானே.

கள்ளமனப் பேயேன் கதறித் துடித்துமுன்றன்

உள்ளமிரங் காதோ வுனதருளுங் கிட்டாதோ

வெள்ளமென நாடும் வியனடியார் தம்முளெனைக்

கொள்ளமனங் கொள்வாய் குறுக்குத் துறையானே

கிட்டும் வினையறியேன் கேடுவரும் போழ்தறியேன்

பட்டு முணர்வறியேன் பாழ்பணத்தின் பீடறியேன்

எட்டும் படியிருந்தும் ஏனோ வுனையறியேன்

கொட்டுங் கருணைக் குறுக்குத் துறையானே.

பொய்யை வளர்த்துப் பொறாமையை வாவளர்த்துக்

குய்யம் வளர்த்துக் கொடுஞ்சினமோ டென்னுடலாம்

மெய்யை வளர்த்தேன் முருகா இவையாவுங்

கொய்ய வரந்தா குறுக்குத் துறையானே.

மண்டுமிடி காமம் மயக்கம் மடிசெருக்கும்

உண்டுறங்கு மென்னை ஒழித்திடுமே நீவருமம்

கொண்டுருத்த லேனோ கொசுதனையி ழிக்கஅணுக்

குண்டுமெறி வாரோ குறுக்குத் துறையானே.

பாருக்குள் யான்படும் பாடுதனைப் பார்த்திருந்தும்

யாருக்கோ வந்தவிருந் தென்றிருப்ப தேனோநீ

பேருக்கோர் நன்றெனினும் பேதையெனக் கீந்திலையே

கூருக்கோர் வேலோய் குறுக்குத் துறையானே.

தொழுதேனுன் முன்னர்த் துடித்தே னிரங்கிலைநீ

பழுதால் வரும்படரும் பார்த்தழுதால் நீங்கிடுமோ

அழுதாலும் பிள்ளை அவள்தான் பெறவேண்டும்

கொழுகொம்பு நீயே குறுக்குத் துறையானே.

திருவினைக் காணேன் தினந்துயரே கொண்டுழன்றேன்

வருவினைகள் வந்தால் மடியேந்த வேண்டாமோ

ஒருவினையுந் தப்பிடுமோ உத்தமனே சங்கரர்க்குக்

குருவெனவு யர்ந்த குறுக்குத் துறையானே.

நெல்வா ளளவும் நிதிசேர்க்க மாட்டாமல்

வல்வாய் வறுமை வயப்பட் டுழல்வேற்கும்

இல்வாழ் வெதற்கோ இரும்பொருளைத் தாவலது

கொல்வா யெனையே குறுக்குத் துறையானே.

ஏயும் வினையால்யா னிவ்வுலகில் வந்துழன்றும்

போயும் பிறந்தும் பெருவாழ்வு வாழ்வதினால்

தாயும் எமனுஞ் சலித்தார்நீ யோசலியாய்

கோயும் பிளந்த குறுக்குத் துறையானே.

தின்றுகொழுத் தேன்யான் திரைப்படம் பார்த்தழிந்தேன்

ஒன்றுமிவை யல்லால் ஒருநற் பணிபுரியேன்

நின்றுனது பாதம் நினைந்தறியேன் பாழ்விருப்பைக்

கொன்றுவிடு வாய்நீ குறுக்குத் துறையானே.

புலனைந்தும் மீறித்தம் போக்கினிலே சென்றிருக்கப்

பலநைந்த பாழ்வழியிற் பாவிமனஞ் சென்றோடி

நலனின்றிக் கெட்டலையின் நாயடிய னுய்வேனோ

குலனொன்று தேவே குறுக்குத் துறையானே.

தேடிவைத்த ஒண்பொருளாய்த் தெள்ளமுதாய் நீயிருக்க

நாடிமெத்த நானலைந்தேன் நாசமுறும் பொன்பொருளை

பாடியத்த னுன்புகழைப் பாதமலர் பற்றிநின்று

கூடிநித்தம் வாழ்வேன் குறுக்குத் துறையானே.

அத்துணை நாடி அழிபொருளை யேவிரும்பின்

பித்தனிவ னென்றெனையே பேசாரோ மெய்யறிவர்

சித்தமதி லென்புன்மை தேர்ந்தேன் தெளிவடைந்தேன்

கொத்தடர்க டம்பா குறுக்குத் துறையானே.

துடியே ரிடையார் சுகம்நாடிப் பொன்நாடிப்

படிமே லலைந்து பதங்குலைந்த தின்றுணர்ந்தேன்

அடியே னினியுன் னடிமலர்கள் விட்டகலேன்

கொடியே னெனையாள் குறுக்குத் துறையானே.

பொழிகின்ற துன்பப் பெருங்கடல்விட் டேற்றியெனை

இழிகின்ற நற்புணையுன் னீரடிக ளென்றுணர்ந்தேன்

அழிகின்ற நெஞ்சத் தடியவர்பால் நற்கருணை

கொழிகுன்ற வாநற் குறுக்குத் துறையானே.

பாவையர் தாம்விரிக்கும் பாசவலை யாற்பெருகும்

நோவைய கற்றிலவுன் நேசவலை யுட்புகுந்தேன்

மாவைய றுத்து மயிற்சேவ லாக்கியணை

கோவைய றிந்தேன் குறுக்குத் துறையானே.

நெக்குருக நின்று நினைப்பணிந்துன் பாதநிழல்

புக்குமகிழ்ந் தாடியபின் பொன்னொடுபெண் ணாசையினால்

சிக்குவனோ பந்தமதில் சேரவெனைத் தள்ளுவையோ

கொக்குபடுத் தோனே குறுக்குத் துறையானே.

அப்பாவென் னாரமுதே ஆறுமுகச் செஞ்சுடரே

இப்பாரில் யானுழல எண்ணுவனோ நீகருணை

தப்பாதென் மேற்காட்டித் தாராயுன் னீழலுடற்

குப்பாயம் வேண்டேன் குறுக்குத் துறையானே.

இந்திரிய மைந்து மெனதுவச மாகாமல்

குந்தகமே செய்த கொடுவினையாற் பூவுலகப்

பந்தமதே கொண்டேன் பறித்தருளப் பாழ்வினையை

கொந்தலர்க டம்பா குறுக்குத் துறையானே.

சோதிமுரு காவுனது துய்யஅடி யார்காட்டும்

நீதிநெறி நின்றொழுகி நின்நாமச் சீர்பாடி

மேதினியி லுன்தொண்டு மேன்மையுடன் செய்பவருள்

கோதிலமு தானே குறுக்குத் துறையானே.

நாடுமெனக் குற்றபெரும் நற்றுணைநீ தானெனவே

ஈடுமில னாக இறுமாந் திருப்பனிவண்

தேடுமடி யார்தம் திருக்கொழித்தன் னாருளத்தே

கூடுமிறை யோனே குறுக்குத் துறையானே.

வேண்டேன் புகழே விரும்புகிலேன் மண்ணொடுபெண்

வேண்டேன் பொருளே விரும்புகிலேன் சூழ்தமரும்

ஆண்டே யுனைமறவா ஆசையுளேன் என்ஆவிக்

கூண்டே யொழிப்பாய் குறுக்குத் துறையானே.

வேண்டுவதும் நீயறிவாய் வேண்டுவஎல் லாந்தருவாய்

வேண்டுவதெ னக்கென்றே வேறுளதோ வுண்டுமெனின்

ஈண்டுவறி யேனெனையான் ஏந்தால் என்துயர்ப்புள்

கூண்டுவர லோய்ப்பாய் குறுக்குத் துறையானே.

நாயினேன் என்பால்நீ நல்கிய பேரருளைப்

பேயினேன் எவ்வாறு பேசுவேன் பேச்சறுத்தேன்

வேயினேர் தோளிமண வாளா உவகையினாற்

கூயினேன் கோவே குறுக்குத் துறையானே.

தங்கமதால் நற்பயனத் தங்கமடைந் தார்க்குளதாம்

அங்கவரால் நன்மை அதற்குண்டோ? பேயனுக்கும்

புங்கவனே நின்னால் பெரும்பயனாம் நிற்குண்டோ?

கொங்கலர்க டம்பா குறுக்குத் துறையானே.

பிறவா திருக்கவரம் பெற்றேன் பிறந்தாலும்

இறவா திருக்கவழி யானறிவே னஃதுனடி

மறவா திருப்பதுவே மான்மகள்பால் மாலடர்ந்த

குறவா திருவார் குறுக்குத் துறையானே

ஒளிவளரு முன்வதனம் ஒராறும் தொண்டரிடம்

அளிபொழியுஞ் செவ்விழிகள் ஆறிரண்டு மஞ்சேலென்

றளிவகற்றும் நீள்கரங்கள் ஈராறும் போதடியும்

குளிசமெனக் காமே குறுக்குத் துறையானே.

நீத்துகந்தார் சாற்றும் நெறிநில்லேன் இல்லையென்பார்க்

கீத்துகந்தே னில்லை எனையும் மனமிரங்கிக்

காத்துகந்தாய் உன்றன் கருணைதனை யென்சொல்வேன்

கூத்துகந்தான் பிள்ளாய் குறுக்குத் துறையானே.

பற்றதிக மோடு பரவுமென் நெஞ்சமுனை

“நற்றவனே ஞானமிலா நான்முகனைச் சென்னிகுட்டிச்

செற்றவனே எங்குஞ் செறிந்தவனே யாவருக்கும்

கொற்றவனே” என்று குறுக்குத் துறையானே.

நிலையாப் பிறவி நெடுங்கடலுள் தள்ளுண்டிங்

கலையா திருக்க அருள்புரிவா யஃதுனக்கோர்

மலையா முருகா வடிவேற் கரத்திறைவா

குலையா வளமார் குறுக்குத் துறையானே.

அடலிழந்தேன் வீணாய் அலைந்தலைந்து பாரினிலென்

உடலகத்தே நீயிருக்கும் உண்மை யுணராமல்

கடலணிசெய் செந்திலவா காவாய் பருவரையின்

குடலடுத்த வேலோய் குறுக்குத் துறையானே.

தீதுகளை யாயெனினுஞ் சீறிவிழு வாயெனினும்

நீதுகளென் றென்னை நினைந்தொதுங்கிப் போயினുമുன்

போதுகளை விட்டே புறம்போகே னென்றென்றுங்

கோதுக ளற்ற குறுக்குத் துறையானே.

பிறப்பாய நோய்தீர் பெருமருந்தே தொண்டருக்குத்

திறப்பாய வீடே தெரிவரிய மெய்ப்பொருளே

சிறப்பாய வேதத் தெளிவே உனைப்பிரியேன்

குறப்பாவைக் கேள்வா குறுக்குத் துறையானே

தொண்டரெம் வாழ்வு துலங்கிடப்பொன் வாரியிட்டோ

பெண்டார் தமக்குப் பெரும்பணிகள் செய்தளித்தோ

பண்டார மாயினைநீ பண்ணவருந் தாட்பணிந்து

கொண்டாடுந் தேவே குறுக்குத் துறையானே.

அடியார்க் கரும்பே றளித்தருளு மாண்டியப்பா

நெடிதார் பிறப்பிறப்பு நேரா இளஞ்சேயே

குடிசேர் குலபேதங் கொள்ளாக் குறவனேமா

கொடியேற் கருள்வாய் குறுக்குத் துறையானே.

விட்டாவி செல்வதுவும் வெற்றுடலைச் சூழ்ந்தழுது

கொட்டார்ப்பக் கொண்டு கொளுத்துவதுங் கண்டிருந்தும்

மட்டார்ந்த இன்பமிந்த மாநிலவாழ் வென்றிருந்தேன்

கொட்டார்ந்த பூவார் குறுக்குத் துறையானே.

முப்பொழுதும் உண்டு முடம்போல் படுத்துறங்கித்

துப்புநிகர் செவ்விதழார்ச் சேர்ந்துமயற் கண்ணியிற்பட்

டெப்பொழுதும் பிறந்திறந்தா லென்றுனையான் வந்தடைவேன்

கொப்படரும் மாவார் குறுக்குத் துறையானே.

இடும்புடையேன் வம்புரைக்கும் ஈனமுளேன் காமுகனாய்

நெடும்பனைபோல் நின்றழிந்தேன் நீர்மூட னாய்ப்பிறர்பால்

கடும்புதமே கூறிடுமிக் காதகன்யா னுய்வேனோ

கொடும்பவமே செய்தேன் குறுக்குத் துறையானே.

போற்றி வணங்கிடும்யான் பொல்லாதா னாயிடினும்

ஏற்று நினதருளை யீவாய் எனதுதவம்

ஆற்றிற் கரைத்தபுளி ஆகாமல் ஆதரிப்பின்

கூற்றிற் கயரேன் குறுக்குத் துறையானே.

உண்டெனவே போற்றுபவர்க் குள்ளவனா யில்லையெனும்

வண்டருக்கோ இல்லானாய் வாய்த்த சராசரமாய்த்

தொண்டருக்கோ எட்டுந் தொலைவினனாய் நின்றொளிர்சீர்

கொண்டவனே கோதிற் குறுக்குத் துறையானே.

பலிகழுகு நாய்நரிகள் பைசாச மென்னுமிவை

கலித்தெழுந்து சுற்றுமிந்தக் காயம் சதமாமோ

ஒலிகடல்சூழ் பாரில் உனையே சரணடைந்தேன்

குலிசனிடர் தீர்த்தோய் குறுக்குத் துறையானே.

காடுமலைப் பள்ளம் கடற்கரை சொந்தமிலா

வீடுபுறத் திண்ணை வெளியிடம்மற் றெவ்விடமென்

கூடுவிழு மோநீ குதித்தன்று வந்தாள்வாய்

கோடுபடர் மாவார் குறுக்குத் துறையானே.

தொழுதறியே னின்றுவரை துள்ளுமயி லோனுனையே

பழுததிகஞ் செய்தேனுன் பன்னரிய பீடறியேன்

கழுதையறி தற்கொணுமோ கந்தப் பொடிமணமே

கொழுதருவார் காதுழ் குறுக்குத் துறையானே.

வேதாந்த னேயென் வெருள்மனத்தே நின்றொளிரும்

போதாந்த னேயிப் புவிமயக்கி யுள்ளடக்குங்

கீதாந்த னேயிக் கெடுமதியேன் பாற்படருங்

கோதாந்த மாக்குங் குறுக்குத் துறையானே.

பூமாலை நாலுகின்ற பொற்புயமுந் தொண்டரணி

பாமாலை யார்த்திடுமுன் பாதமிரண் டல்லதென்றன்

நாமாலைக் கொண்டுபிறர் நாமந் துதித்திடுமோ

கோமானே கந்தா குறுக்குத் துறையானே.

தென்றலுடன் சாந்தம் திசையனைத்து மோச்சுமணம்

ஒன்றரிய தென்மலையி னோங்கியெழுந் தோடிவரும்

பொன்றலிலா நீர்சேர் பொருநைக் கரையுமேவுங்

குன்றவநிற் சார்ந்தேன் குறுக்குத் துறையானே

கார்த்திகைநற் பெண்டிர் கரமலரார் தேனேவிண்

பார்த்திபனின் வஞ்சி படர்ந்தணையும் வேற்கொம்பே

ஆர்த்திடுமெய்த் தொண்ட ரணிதனிலே நாயெனையும்

கோர்த்திடுவாய் நாதா குறுக்குத் துறையானே.

அரவணியன் பிள்ளாய்வே ளாறுமுகா காங்கேயா

சரவணப வாகடம்பா சாமியெனும் வேல்முருகா

கரவடரும் நெஞ்சனெனக் கைவிடுதல் நீதியன்று

குரவனெனுந் தூயா குறுக்குத் துறையானே.

திருவுரு மாமலையாம் சீர்குமரக் கோட்டமிதில்

உருவெடுத்துச் செந்தி லுறைபவனே நின்னடைந்தார்

கருவடைத லுண்டாமோ கண்ணுதலான் போற்றியசற்

குருவெனுமெய்த் தேவே குறுக்குத் துறையானே.

பலகலைநூற் கல்லான் பதமறியான் ஆயினுமிச்

சிலகவிகள் சொன்னான் சிவதாசன் ஆறுமுகன்

உலகனைத்தும் பாடி யுனதருள்பெற் றுய்யவென்றே

குலவுபதம் போற்றி குறுக்குத் துறையானே.