எங்கெங்கும் பைஞ்சோலை எழிலான திருவீதி

அங்கங்கும் சுறுசுறுப்புக் காளான மக்கள்சூழ்

பொங்கிவரும் வளமான பொன்னான சிங்கைநகர்

தங்கியுள்ள தண்டபாணி தலைப்படுத்த வருவாயே.

அந்நாளில் நகரத்தார் ஆக்கமதைத் தேடுதற்குத்

தென்னாடு தனிலிருந்து திருநாடாம் சிங்கைக்குப்

பொன்காசு கொண்டுவந்து பொருளீட்டுந் தொழிலுக்கே

எந்நாளும் தண்டபாணி இன்துணையாய் வருவாயே.

அறிவுக்கே அறிகுறியாம் அருள்வேலை அந்நாளில்

பரிவோடு சிங்கையிலே பரவிவந்து, பின்னாளில்

விரிவாக நகரத்தார் விளைவித்த திருக்கோயில்

தரித்திருக்கும் தண்டபாணி தமிழ்தரவே வருவாயே.

தங்கமணி முடியோடு தகதகக்கும் முத்தாரம்

பொங்குமொளிக் குண்டலமும் பொன்னான கூர்வேலும்

அங்கமதில் பட்டாடை அணிந்துவரும் அழகுதிகழ்

சிங்கைநகர் தண்டபாணி சிந்தைகுகை வருவாயே.

கொண்டாடும் நாட்களிலே கொள்ளும்பல் கோலமதில்

வெண்ணீறுக் காப்புடைய வியனான கோவணஞ்சால்

பண்டாரக் கோலத்தில் பாரிக்குஞ் சிங்கைநகர்

தண்டபாணித் தெய்வமே தலையளிக்க வருவாயே.

மாறாத இளமையொடு மங்காத எழிலோடு

தீராத நறுமணமும் தெவிட்டாத இனிமையுடன்

கூரார்ந்த கடவுளியல் கொண்டருளும் சிங்கைநகர்

சீரார்ந்த தண்டபாணிச் சிவனேநீ வருவாயே.

உனக்கென்று வைக்காமல் உன்னடியார்க் கீந்திடவே

உனதுசுக போகமெல்லாம் உகத்துறந்தே ஆண்டியெனும்

இனியவடி வாலெம்மை என்றென்றுஞ் சிங்கைநகர்

கனிவான தண்டபாணி காத்தருள வருவாயே.

நெஞ்சிலுள்ள கவலையெல்லாம் நேர்ந்துள்ள பாவமெல்லாம்

வஞ்சகரின் சூழ்ச்சியெலாம் வாட்டும்நோய்த் துன்பமெலாம்

“அஞ்சாதே” எனஅருளி அகற்றிடவே சிங்கைநகர்

தஞ்சங்கொள் தண்டபாணி சடுதியில்நீ வருவாயே.

பிள்ளையின்பம் இல்லாமல் பெருங்கவலை கொள்வோர்க்குக்

கொள்ளையின்பம் கூட்டுகின்ற குலம்வாழும் குழவிபெற

வள்ளிதெய்வ யானையுடன் வரமருளச் சிங்கைநகர்

புள்ளிமயில் தண்டபாணி புறப்பட்டு வருவாயே.

அன்பறமும் அறிவுயர்வும் ஆக்கநிறை வளமைகளும்

இன்புகளும் பண்புகளும் ஏற்றம்நீள் ஆயுளொடு

நன்புகளும் என்வாழ்வில் நல்கிடவே சிங்கைநகர்

அன்புடனே தண்டபாணி அடிபணிந்தேன் வருவாயே.

தண்டபாணித் தெய்வமே

தண்ணருளைச் செய்வையே

தண்டபாணித் திருவடி வாழ்க.