ஆசிலாப் பதியாம் நல்லூர் அமைந்திடும் கோயில் முன்னால்

பாசமாய்த் தொழுது பண்ணாய்ப் பாடிடும் அன்பர்க் காக;

மாசறு மணிகள், தங்கம், மாணிக்கம் கோத்த மாலை

வாசனை மலர்கள் சூடி வருகிறான் தேரில் கந்தன்!

தாரணி துதிக்குந் தேரைச் சைக்கினிற் பார்க்க வந்தார்,

காரினில் வந்தார், மாட்டுக் கரத்தையில் வந்தார், மற்றும்

வீரர்போல் லொறியில், பஸ்ஸில், விமானத்தில் வந்தார், மற்றும்

சூரிய வெப்பந் தாங்கித் துள்ளியும் நடந்தும் வந்தார்.

கண்களிற் சுரக்கக் கண்ணீர், காதினில் வேதம் கேட்கப்

பண்ணுடன் வாய்கள் பாடப் பலமலர் மூக்கில் நாற,

விண்ணுறை முருகன் வள்ளி மெல்லிடை தெய்வ யானை

வண்ணமாய்த் தேரில் வந்தார் மண்ணினோர் மகிழ்ச்சி யெய்த!

வாரிதி நிகர்த்த கூட்டம், வானொலிச் சேவை யாளர்,

கூரிய வேலை நோக்கிக் கும்பிடு போடும் பெண்கள்,

பேரிசை மேள தாளம் பிரதிட்டை செய்வோர் சூழத்

தேரினில் முருகன் வந்தான் தெய்வானை வள்ளி யோடே!

நாவலர் வதிந்த நல்லூர் நற்பதி முருகா வா!வா!

காவலர் இருந்த நல்லூர்க் கார்த்திகைக் குமாரா வா!வா!

சேவலின் கொடியாய் வா!வா! செந்தில்வேற் கந்தா வா!வா

தேவனே மயிலில் வா!வா! தேரிலே பவனி வா!வா!