பைங்கொடி நறைக்கா யிடையிடுபு வேல

னம்பொதிப் புட்டில் விரைஇக் குளவியொடு

வெண்கூ தாளந் தொடுத்த கண்ணிய

னறுஞ்சாந் தணிந்த கேழ்கினர் மார்பிற்

கொடுந்தொழில் வல்விற் கொலைஇய கானவர்

⁠நீடமை விளைந்த தேக்கட் டேறற்

குன்றகச் சிறுகுடிக் கிளையுடன் மகிழ்ந்து

தொண்டகச் சிறுபறைக் குரவை யயர

விரலுனர்ப் பவிழ்ந்த வேறுபடு நறுங்காற்

குண்டுசுனை பூத்த வண்டுபடு கண்ணி

⁠இணைத்த கோதை யணைத்த கூந்தன்

முடித்த குல்லை யிலையுடை நறும்பூச்

செங்கான் மராஅத்த வாலிண ரிடையிடுபு

சுரும்புணத் தொடுத்த பெருந்தண் மாத்தழை

திருந்துகா ழல்கு றிளைப்ப வுடீஇ

⁠மயில்கண் டன்ன மடநடை மகளிரொடு

செய்யன் சிவந்த வாடையன் செவ்வரைச்

செயலைத் தண்டளிர் துயல்வருங் காதினன்

கச்சினன் கழலினன் செச்சைக் கண்ணியன்

குழலன் கோட்டன் குறும்பல் லியத்தன்

⁠தகரன் மஞ்ஞையன் புகரில் சேவலங்

கொடிய னெடியன் றொடியணி தோள

னரம்பார்த் தன்ன வின்குரற் றொகுதியொடு

குறும்பொறிக் கொண்ட நறுந்தண் சாயன்

மருங்கிற் கட்டிய நிலனேர்பு துகிலினன்

⁠முழவுறழ் தடக்கையி னியல வேந்தி

மென்றோட் பல்பிணை தழீஇத் தலைத்தந்து

குன்றுதே றாடலு நின்றதன் பண்பே யதாஅன்று.