விண்ணவரின் தன்மையுடன் விரதங் கொள்ளக்

குன்றிலருள் பெய்துதுவக் குடிகொள் வாயே

நன்மைதரும் நல்வழியை நாளும் உன்னி

நல்லூரான் கொடியேற்றம் நாளை என்றே!

மிகுதோர ணங்களெழில் விளக்குக் கும்பம்

காட்சிபல கலைஞர்களின் மாட்சி கூறும்

தக்கவழி காட்டிநலத் தன்மை யூட்டி

மயிலோனின் கொடியேற்றம் மறுநாள் என்றே!

கூற்றாகிக் கொடுமைகளைக் கொல்லும் நின்னைப்

பருகிடுவர் பதறிடுவர் பத்தி முத்தி

அலறிடுவர் குளறிடுவர் ஆவல் மீறி

வாழ்வுநலம் நல்லூரான் வைப்பா னென்றே!

தன்னாலே ஊரோங்கத் தரணி யோங்க

இருள்மாளும் ஒளிவீச ஏற வென்றே

தேர்வைத்துக் கொடிக்கான சேலை ஈய

பொருந்தவுயர் பொழுதுகொடி போற்றி ஏறும்!

சிறந்துய்யும் வழிதன்னைத் தெரிக வென்றே

பார்த்துள்ளம் பழுத்தூறப் பத்தாம் நாளில்

மூண்டுள்ள தீவினைகள் முடித்தே நன்றாய்

ஏற்றவே போற்றவே எழுவாய் நீயே!

வாழ்வாங்கு வாழ்கென்று வாழ்த்தி நல்ல

துன்பங்கள் துன்புற்றுத் துவண்டே மாள

நல்லூரி னருள்திக்கு நாலும் பாயப்

பனிப்பூச்சப் பரம்மீது பவனி கொள்வாய்!

திடங்கொண்ட செயல்வீரன் திறமை காட்ட

அடித்தோடிப் பெருக்காகி யழித்த கங்கை

மிதித்துள்ள திறமைக்கு விதித்தே யெல்லை

ஈர்க்கும்பத் தொன்பதினில் எங்கள் நெஞ்சே!

ஆள்கின்ற அடியாரின் அமிழ்தக் குன்றம்

மேல்வாங்கும் கண்ணோடு மெய்ம றந்தே

பார்த்தொன்றிப் பருகிடுவர் பாரி லோங்க

மேலான எழிற்காட்சி வேறெங் குண்டோ?

தனியழகுச் கோலமதைத் தாங்கி வந்தே

போற்றியுனைப் பாடியுளம் பொலிவார் பொன்னாய்

மாண்கதையின் உட்பொருளை மனத்தே கொள்ள

இருபத்தி ரண்டதனி லியம்பா நிற்பாய்!

நீங்காத பேரன்பில் நீந்த மக்கள்

வேலான மேலான மெய்நாங் காண

ஆடைகளும் நீக்கிநிலை அழகைக் காட்டிப்

புரியாத பொருளுக்குப் புதல்வ னென்றே!

தெரிந்தின்பப் பயனுறுதித் திளைத்தே பூக்கும்

பேசாத வாயெல்லாம் பேசும் நாளை

தேங்கிவந் தடியார்கள் திரள்வா ரன்றே

ஊர்கூடும் வெள்ளத்துக் குவமை யுண்டோ?

மன்றங்கள் பந்தல்கள் மாடி வீடு

அந்தரக் குடிசைகள் அண்டி யுள்ள

வீதிகள் பாதைகள் மிஞ்சி யுள்ள

ஊரெல்லாம் உறைவரே உருகி மக்கள்!

விரைந்தோடிக் கடல்நல்லூர் விம்மிக் கூடும்

பிறைகொண்ட சடையானின் பிள்ளை யன்புக்

அலைமோத அழிவாக வலைக்கும் அல்லல்

விரைந்துண்மை விளக்கத்தில் வியர்த்தே வீழ்வார்!

அடிக்கமணி எட்டழகி லாறு கூடும்

தீபங்கள் சின்னங்கள் சீராய்ச் சூழ

இருகைகள் தலைக்கேற இணையி லின்ப

வெல்லழகிற் பல்லழகிற் சொல்ல வொண்ணாப் -

ஊர்மயிலிற் சேர்கொடியு முற்ற வேலும்

வார்கருணை முறுவலுடன் வடிவி லோங்குந்

செல்லுகையிற் கொல்லுதுயர் வெல்லு கின்ற

அரகரவோ அரகரவோ அமிழ்தக் காட்சி!

பன்னியெழுந் துச்சிகொளப் பாங்கர் நீங்க

யருமையோ வருமையென் றாடிப் பாடி

வடிவேலன் வழங்கவே வாழ்வின் பேற்றை

வேண்டுவன வேண்டாது வேண்டிக் கொள்வார்!

கண்பெற்ற முகம்போல ஒளிப்பார் பல்லோர்

நிகரற்ற நூல்செய்து நிலைப்பார் பல்லோர்

பைந்தமிழெச் சுவைத்தினிது பயின்றோர் பல்லோர்

உண்டிங்கு பெற்றுள்ள உரிமை உய்வார்!

வாழ்நாளை வளமாக்கும் மனங்கொள் காட்சி

பயனொன்று வேறில்லைப் பன்னீர்க் காட்சி

நெஞ்சம்நெக் குருகிவிழும் நீர்க்கண் காட்சி

தீர்த்தம்வேல் ஆடவரும் திருப்பொற் காட்சி!

அல்லலுமட் டூழியமும் அழியுங் காட்சி

விண்டமிழின் அமுதமணம் வீசுங் காட்சி

முத்தமிழர் ஆட்சியினை நுகருங் காட்சி

ஐவர்களும் தூநீரில் ஆடுங் காட்சி!

உண்மையினை உணர்ந்தவர்கள் உருகுங் காட்சி

அடியவர்கள் வீட்டுப்பே றடையுங் காட்சி

புடைசூழ்ந்த அடியார்கள் பூக்க முக்கண்

உளமாடி நீராட உலகம் உய்யும்!