சீராருங் கந்தனுக்குச் செயமங்களம் எங்கள்

சிவசுப்ர மண்யனுக்குச் சுபமங்களம்

ஆதிதரும் பாலனுக்கும் ஆறுமுக வேலனுக்கும்

நீதிநிறை சீலனுக்கும் நேரரிய கோலனுக்கும். (சீ)

பத்தர்மனத் தையனுக்கும் மெய்யனுக்கும் மங்களம்

பங்கமிலாத் துய்யனுக்குஞ் செய்யனுக்கும் மங்களம்

அத்தியுடன் வந்தவற்கும் அசுரகுல வந்தகற்கும்

சத்தியுமை தந்தவற்கும் சரணார விந்தனுக்கும். (சீ)

புள்ளிமயில் வாகனனுக்கும் ஏகனுக்கும் மங்களம்

பொங்குமுப வீதனுக்கும் நாதனுக்கும் மங்களம்

வள்ளிமண வாளனுக்கும் மன்னுகுண வாளனுக்கும்

துள்ளுசுத ராளனுக்கும் தொங்குமலர்த் தோளனுக்கும். (சீ)

நன்மைதரு சித்தனுக்கும் முத்தனுக்கும் மங்களம்

நாரசிங்கன் மருகனுக்கும் முருகனுக்கும் மங்களம்

தன்மமறை யீசனுக்கும் தங்கியொளிர் தேசனுக்கும்

தென்மயிலை வாசனுக்கும் தெய்வானை நேசனுக்கும்.