பூதத்தால் நக்கீரன் பொன்றுங்கால் தன்னுயிரை

ஆதரவாய்க் காத்தே அருள்புரிய — போதமுள்ள

ஆற்றுப் படைநூலை ஆக்கிப் பரங்குன்றில்

போற்றினான் வேலனடிப் போது.

சூரனை வென்றதோர் சோபனத்தைக் கொண்டாட

வீர முருகனுக்கு வெற்றிவிழா — ஆரணங்கள்

ஆர்ப்பொலிக்கச் செந்தூரில் ஆற்றியவான் தேவரைக்

கார்த்திகையன் காத்தான் கனிந்து.

மாங்கனியைத் தந்தைபால் வாங்க இயலாமல்

ஏங்கிப் பழநிமலை ஏற்றுறையும் — காங்கேயன்

பத்மபதம் சிந்தித்தால் பாவமெலாம் நீங்கிப்பின்

இத்தரையில் உய்வோம் இனிது.

ஓங்காரத் துட்பொருளை ஓராசான் போலிருந்து

பாங்காய்ச் சிவன்பால் பகர்ந்ததால் — ஓங்கும்

திருவே ரகத்துவாழ் சேய்சாமி நாதன்

திருப்பெயர் பூண்டான் சிறந்து.

சுவையார் பழமுதிர் சோலைமலை வாழும்

சிவனார் அருளொளிகூர் சேய்நம் — நவையனைத்தும்

நீக்கித் திருவருளால் நீடூழி வாழவைப்பான்

ஊக்கமுடன் போற்றிவரின் ஓர்ந்து.

குன்றுதோ றாடலெனும் குன்றெல்லாம் கோயிலாய்

என்றுமே கொண்டான் எழில்முருகன் — என்றாலும்

செவ்வேள் துதிப்பார்க்குச் சீரருளைப் பெய்துநலம்

ஓவ்வும் தணிகை உயர்வு.