தண்ணீர்மலைத் தண்டாயுதன் பாதம்

தண்டனிட்டே ஓதிடுவோம் கீதம்

எண்ணத்தில் அவனுருவைக் கண்டு

இயற்றிடுவோம் எந்நாளும் தொண்டு தண்ணீர்

பாலமுரு கன்மீதில் பக்தி

பண்ணுவோம் அவனணியும் சக்தி

வேலின் பெரும்புகழைப் பாடி

வேண்டுவோம் அவனருளை நாடி தண்ணீர்

சீர்மல்கும் பினாங்குநகர் தன்னில்

சிங்காரப் பூமலையின் அருகில்

பார்புகழும் தண்ணீர்மலை யதனில்

பாங்காக வீற்றிருக்கும் வேலன் தண்ணீர்

ஆனைமுகனுக் கிளைய தம்பி

அழகே உருக்கொண்ட நம்பி

ஞானம் நமக்கருள வேண்டி

நயந்து கேட்டிடுவோம் ஈண்டி தண்ணீர்