பொங்குஅரவம் கந்தரம்கார் புல்லுமைபஞ் சானனத்தால்

சங்கரனை ஒப்பாம் தணிகையே — தங்கும்

அமரகோட் டத்தானத் துஅம்பொன் முடிசேர்

குமரகோட் டத்தான் குடி.

பூங்கமல உந்திமணி பொன்திகிரி கோடுவனம்

தாங்குதலால் மால்ஆம் தணிகையே — ஓங்குதண்டைச்

சேவடியான் நான்இமலம் சேரா துஅருள்கச்சி

மாவடிஆ னான்நிமலன் வைப்பு.

நால்வாய்கா யத்திரிமான் நண்ணமரை மேவுபெருஞ்

சால்பால் விதிஆம் தணிகையே — நூல்வாய்ந்த

வெள்ளிமலை வேங்கைஆன் வீடுஉடைஊர் திச்சிவன்சேய்

வள்ளிமலை வேங்கையான் வாழ்வு.

மந்திரிகூ டத்தலைமை மன்னி மலைஅரசாய்

தந்திரிகூ டம்சேர் தணிகையே — சிந்துமுரசு

எண்திக்கு அதிர்காமன் எண்ணுமுறை மைத்துனன்ஆம்

கண்டிக் கதிர்காமன் காப்பு.

கொங்குஆர் மலர்ச்சுனையும் கோவேடர் கைச்சிலையும்

சங்காரம் செய்யும் தணிகையே — தெங்குஆரும்

செங்கோடைக் கண்யான் சேவிப்ப வீற்றிருக்கும்

செங்கோடைக் கண்ணியான் சேர்வு.

கோங்குதலை வாய்மலரும் கோதையர்கள் வாய்மலரும்

தாங்குதலை மாறாத் தணிகையே — ஓங்கும்

பரங்குன் றுஅலைவாயான் பாலன்அல்லார் தேக

பரம்குன் றலைவாயான் பற்று.

காமமயல் உற்றவரும் காசுஅகலும் பூசுரரும்

சாமமறை கூறும் தணிகையே — தேமருவும்

செய்ஆவி நன்குடிஆன் செல்வம்மணி மாடமும்சேர்

மெய்ஆவி னன்குடியான் வெற்பு.

கார்அங்க வேடர் கரத்தினும்மீ வானத்தும்

சாரங்கம் தாவும் தணிகையே — சீர்தங்கும்

ஏரகம்இ டைக்கழியான் என்றும்இரு தாள்வணங்கு

வார்அகமி டைக்கழியான் வைப்பு.

சூழும்முழை யும்சவரர் துன்னும்உழை யும்புத்தேள்

தாழும் தவர்சேர் தணிகையே — நீள்கழலை

ஒன்றுதோ றுஆடலினான் உற்றுஅகலான் தொண்டர்உளம்

குன்றுதோ றுஆடலினான் குன்று.

வித்தியஏ னல்குரலும் வேடமட வார்குரலும்

தத்தைகவர்ந் துஏகும் தணிகையே — பத்தர்தொழும்

சோலைமலை வாய்நிலையார் தொண்டர்உளத் துஅன்புஅகலுங்

காலைமாலை வாய்நிலையார் காப்பு.

பங்கயக்கண் மால்விண்டும் பைஞ்சாரல் சூழ்விண்டும்

சங்கமுடன் தாழும் தணிகையே — கொங்குஉலவு

கல்லாரம் பூண்உரத்தான் காழ்வயிரம் மாணிக்கக்

கல்ஆரம் பூண்உரத்தான் காப்பு.

சந்தனமும் ஏனல் தனைக்காக்கும் தையலார்

தம்தனமும் வம்புஆர் தணிகையே — முந்தும்

அறுமீன் அருட்குஅளியான் அம்கமலத் தாட்குஅன்பு

அறும்ஈனர் உள்களியான் ஆர்வு.

ஊனத்தை நீக்குநரும் ஊசல்மட வாரும்அன

தானத்தை ஏயும் தணிகையே — வானத்து

இரும்கற் பகமாய்த்தான் ஈவான்கை வேலால்

பெரும்கல் பகமாய்த்தான் பெட்பு.

பஞ்சவனத் தையலரும் பஞ்சவனத் துஜஅலரும்

தஞ்சவனம் சாரும் தணிகையே — அஞ்சலிசெய்

தாரதுஇன் னாஇரித்தான் சாற்றஅரும்வே தாந்தம்எலாம்

தாசரதி நாவிரித்தான் சார்பு.

ஏமம் சரிகளினும் எல்ஆர்பைங் காவினும்போ

தாமஞ் சரியார் தணிகையே — வாம்உழையின்

போய்ஆவி சாகத்தான் பொற்கணைதொட் டான்மருகன்

மாயா விசாகத்தான் வாழ்வு.

செந்தினைகள் வித்துநரும் தேவியரோ டுஊடுநரும்

சந்தினைமுன் போக்கும் தணிகையே — தந்துநலம்

வண்டோ தரிக்குஉவந்தான் மைந்தன்முனம் தானவர்செய்

வண்டுஓ துஅரிக்குவந்தான் வாழ்வு.

கார்அணிசெய் கொன்றைகளும் கண்டு தொழு வோர்களும்பூத்

தாரணியை ஆளும் தணிகையே — சூரனும்முன்

பூட்டியகோல் அஞ்சிவந்தார் பொன்றாமல் காத்துஅவர்க்குக்

காட்டியகோ லம்சிவந்தார் காப்பு.

பாமறையோர் அம்மனையும் பாவையர்கை அம்மனையும்

தாமகமே நண்ணும் தணிகையே — தூமதியின்

மீதான யோகத்தார் மெய்யறிவில் காணும்மயில்

மீதான யோகத்தார் வெற்பு.