கோபுரம்சேர் கோபுரமும் கோடரம்சேர் கோடரமும்

தாபரமும் மஞ்சுஆர் தணிகையே — நீபம்அணி

வேலா யுதத்துவசன் மெய்யடியா ருக்குஅருளும்

காலாயு தத்துவசன் காப்பு.

ஏழு சுனையும் எயிலும் இரும்பொழிலும்

தாழு மரவங்கு.ர் தணிகையே — வாழுமனை

காட்டும்மறி வென்றுவிண்டான் காதல்மரு கன்வீட்டில்

நாட்டும்அறி வுஎன்று விண்டான் நாடு.

தேக்கும்மலர் ஓடைகளும் சீயம்எதிர் பாய்கரியும்

தாக்கணங்கை மன்னும் தணிகையே — வீக்குசடை

ஆறு முடிக்கும்அரன் ஆதரவி னால்அளித்த

ஆறு முடிக்குமரன் ஆர்வு.

பண்அடைவில் பாடுநரும் பைந்தருவும் அந்தணரும்

தண்ணடையை ஓவாத் தணிகையே — மண்ணிடம்சேர்

மாலான ஏலான் மலர்த்தா மரைக்கரத்தின்

மேலான வேலான் விழைவு.

மெத்துசுனை ஓர்ஏழும் வேட்டுவரும் பாய்அரிமாச்

சத்தமும்நம் பாயும் தணிகையே — மொய்த்தகர

பங்கயக்கன் றுகிளைஆர் பண்மொழியாள் பாகன்அருள்

வெம்கயக்கன் றுக்குஇளையார் வெற்பு.

வாரம்உறும் ஜவனமும் மைவேடர் கைவில்லும்

சாரலும்சங் கேசூழ் தணிகையே — ஆருயிர்நோய்

துய்யவா நைத்துஅலைவன் சோகம்உறா துஆள்குமரன்

தெய்வயா னைத்தலைவன் சேர்வு.

வானவர்சூழ் ஆலயமும் மங்கையர்கை யும்கரியின்

தானமும்வண் டார்க்கும் தணிகையே — ஈனம்உறும்

நானா பதிதன்ஒரு நன்குஇல் எனைப்புரந்த

சேனா பதிதன் சிலம்பு.

தண்டலையும் பங்கயமும் தன்நிழலைப் பாய்கரிபோம்

தண்டமும் கோடுஏந்தும் தணிகையே — தொண்டருக்கு

நாக்குஇரவும் சங்கடம்தான் நண்ணும்மிடி யும்கெடுத்தான்

மாக்கிரவுஞ் சம்கடந்தான் வைப்பு.

யாகநிலத் தும்தேற் றிறாலிடத்தும் மேகத்தும்

சாகம் நிலையாகும் தணிகையே — மோகம்அறும்

சாத்துவிதத் தான்அகிலன் தண்காந்தள் வெட்சிமராச்

சாத்துவிதத் தான்அகிலன் சார்பு.

வீறுமணி வீதிகளும் மென்கரும்பும் பைங்கமுகும்

சாறுமிகுந் துஓங்கும் தணிகையே — ஏறிஇழி

சாரலைவாய் யாளிதிரி தண்மலைவாய் எங்கும்நின்றான்

சீர்அலைவாய் ஆளி சிலம்பு.