க்ஷேத்திரக்கோவைப் பிள்ளைத்தமிழ்
காஞ்சிபுரம் சிதம்பரமுனிவர்
செங்கீரைப்பருவம்3 / 11
க்ஷேத்திரக்கோவைப் பிள்ளைத்தமிழ் · காஞ்சிபுரம் சிதம்பரமுனிவர்
செங்கீரைப்பருவம்
12திருவாரூர்✓
உன்கருணை மெய்யாட வுதயரவி யொளியாட
உபயசர ணங்களாட
உயர்நாத மானசபை யொலியாட விந்துவாம்
ஓங்குமிகு தண்டையாட
மின்குலவு நவரத்ன மகரகுண் டலமாட
மிகுகருணை வதனமாட
வெற்றிவேல் தாங்குசெங் கையாட அருளாட
விமலமலர் நயனமாட
என்கண்ணி னிற்குமருள் நகையாட நுதலாட
இட்டவெண் ணீறாடவே
ஏரார் விராட்புருட னாறுதா னத்தே
இலங்குமூ லாதாரமாம்
தென்கமலை நகர்மேவு தேவாதி தேவனே
செங்கீரை யாடியருளே
தியாகேச னுமைதவிசி னடனஞ்செய் கந்தனே
செங்கீரை யாடியருளே.
13இராமேச்சுரம்✓
சச்சிதா னந்தவ னந்தகல் யாணகுண
சருவக்கிய சூடாமணி
சருவபரி பூரண பரப்பிரம மேபெரிய
தற்பரஞ் சோதிவடிவே
அச்சமொன் றில்லா வசஞ்சல வமோகமே
அகண்டபர ஞானவொளியே
அறிவினுக் கறிவே யனாதிய களங்கமே
அமுதமதி கோடியொளியே
நிச்சய மகோதய அனந்தரவி சோதியே
நிர்க்குண நிராதாரமே
நிராமய புராதன நிரஞ்சன சுகாதீத
ஞேயமாம் அத்துவிதமே
செச்சைமலர் மாலையணி பன்னிரு புயாசலா
செங்கீரை யாடியருளே
சேதுரா மேசுரங் குடிகொண்ட முருகனே
செங்கீரை யாடியருளே.
14கதிர்காமம்✓
மாணிக்க நிறைகங்கை யாடியுன் னைப்பணிய
வந்திடும் பூதலத்தோர்
வாயுமர் பாடவும் குருடர்கண் பார்த்திடவும்
மலடிகள்பின் மைந்தர்பெறவும்
காணிற்கு மாரவே லாவென்னு மன்பரைக்
கரடிபுலி யானைசிங்கம்
காலிற்ப ணிந்தஞ்சி யோடவும் கந்தனே
கண்கண்ட தெய்வமெனவே
ஆணிப்பொன் முத்திமண் டபமேவு கச்சியினுள்
அடியேனை யாண்டுகொண்டென்
ஆகத்தில் வந்தபிணி தீர்ந்திடவு முன்னிற்கும்
ஆறுமுக மெய்த்தெய்வமே
சேணிற் புலோமசை வளர்த்தபெண் பிடிகணவ
செங்கீரை யாடியருளே
தேவரொடு மனிதர்பணி கதிர்காம வேலனே
செங்கீரை யாடியருளே.
15வேள்விமலை✓
முகமொன்று கண்டுதமை யாளவரு மாறுமுக
மூர்த்தியென் றறியாமலே
முகிலூர்ர்தி யாமிந்த்ரன் முதலான முப்பத்து
முக்கோடி யிமையோர்களும்
நகமென்ற மேருவினி லோர்வீர வாகுமுதல்
நவவீர ரோடுகூடி
நாதநீ விளையாடல் கண்டுபோர் புரியவரு
ஞானவா னந்தவடிவாய்
இகமொன்று பரமொன் றிரண்டும் கொடுக்கவே
இந்த்ரனிமை யோர்முனிவரர்
இணையடிகள் துதிசெய்து பூசித்து நின்றிட
இலங்குஞ் சராசரமொடு
செகதண்ட முழுதும்தன் வடிவென்று நின்றவா
செங்கீரை யாடியருளே
திகழ்வேள்வி மலைமேவு குமரகுரு நாதனே
செங்கீரை யாடியருளே.
16வள்ளியூர்✓
இருக்குமரி யச்சுத னோர்கார ணத்தால்
இலங்குகலை முனிவனாக
எழிற்றிரு மடந்தைபெண் மானாகி வரமகிழ்ந்
திருவருங் கூடவந்நாள்
உருக்கருணை யானவொரு பெண்பிள்ளை யாகமுன்
னொருகா ரணத்தால்வரும்
ஓராயி ரம்பணா முடியுரக சயனற்
குகந்தகண நாதன்வேடன்
பெருக்குமலை வாழ்குறவன் வள்ளியென் றேயருட்
பேரிட்டெ டுக்கமகளாய்ப்
பின்செந் தினைப்புனங் காத்துவிளை யாடிப்
பெருங்குறப் பெண்ணெணவளர்
திருக்குமரி தனைமணஞ் செய்குமர நாயகா
செங்கீரை யாடியருளே
தெள்ளுபுகழ் வள்ளியூர் வள்ளிமண வாளனே
செங்கீரை யாடியருளே.
17பாவநாசம்✓
பொன்பரவு மிமையா சலத்தம்மை பால்வந்து
புகழ்திருக் கலியாணமுன்
பூரணன் செய்ததென வருளகத் தியர்தொழப்
பொழியநீ ரன்பொடிமவான்
இன்பமர் மறைச்சடங் கயன்வந்து செய்திடமுன்
இந்த்ராதி யோர்கள்வாழ்த்த
ஈரே ழெனும்புவன பாலிகையு ஞாயிரா
மிலங்குவித் தங்குரிக்க
வன்பான இருளறச் சந்த்ரது ரியரெலாம்
வளரொளி விளக்கெடுப்ப
மங்கைநா யகனருள் மணக்கோல மனுதினமும்
மகிழ்வுடன் காட்டிநிற்கும்
தென்பாவ நாசத்து ளன்பான வேலனே
செங்கீரை யாடியருளே
திண்பொதிய மலைமேவு கும்பமுனி குருநாத
செங்கீரை யாடியருளே.
18இலஞ்சி✓
குருவா யகத்திய ருன்னைப் பணிந்திடக்
கூடும்வை ணவர்நாணவே
குளிர்சித் திராநதிக் குற்றால மாகுதிரி
கூடாச லப்பதிக்குள்
மருவாய் துழாய்மௌலி யுஞ்சங்கு சக்கரமும்
மணிவண்ண முங்காணவே
வளர்நெடிய மால்வடிவு குறுகுகுறு கென்றே
மகாலிங்க வடிவமாக்கிப்
பெருவான மதிநதி முடிக்குஞ் சடாடவிப்
பெம்மானை யம்மானிடம்
பிரியாத எந்தைதனை ஐந்தான னத்தனைப்
பெருமானை யர்ச்சியென்றே
திருவாய் மலர்ந்தருள்செய் தென்னிலஞ் சிக்குமர
செங்கீரை யாடியருளே
சிறியனே னறிவினுட் குடிகொண்ட தெய்வமே
செங்கீரை யாடியருளே.
19திருமலை✓
உம்பர்க்கும் விறல்வச்ர பாணிக்கும் அயனுக்கும்
உள்ளந் தெளிந்துதேற
உம்பர்நா யகனான சிவனுக்கும் அம்மைக்கும்
உள்ளமொடு கண்கள்குளிர
வம்பர்க்கு முதன்மையாம் அவுணர்க்கும் அவுணர்குல
மன்னர்க்கு முளநடுங்க
வந்துதன் னோடுவிளை யாடிடு மகாவீர
வாகுமுதல் வீரர்புகழ
வெம்பொற் கொடுங்களாம் வாயாயி ரம்பொழிய
மிகுசேட னொருசாட்டையாய்
மேன்மே லுறச்சுற்றி யொருசெங் கரங்கொண்டு
மேதினியில் மேருகிரியாம்
செம்பொற் சிலம்புபம் பரமென்ன ஆட்டினோய்
செங்கீரை யாடியருளே
திருமலை யெனுங்காவி தருமலைக் குமரனே
செங்கீரை யாடியருளே.
20திருநெல்வேலி✓
உட்டிரு விளக்கான அகரமு கரம்மகரம்
ஒளிர்விந்து நாதவடிவாய்
உயர்மந்த்ர பதவன்ன புவனதத் துவகலைகள்
ஓராறி னுக்குமுதலாம்
மட்டில்கு டிலைப்பொரு ணிரையுமுறை யுஞ்சொல்ல
மாட்டாத படியினாலே
மனத்தெழு மகந்தையா னானென்னும் வறுமைதனை
மாற்றியருள் வாழ்வுதரவே
எட்டிருங் கைக்கமல னைக்குட்டி யேபின்
இருஞ்சிறையி லிட்டுவைத்தே
இருநூ றெனுங்கணக் கோடுநா லாறாம்
எனும்புவன மண்டகோடி
சிட்டியுஞ் செய்துபின் அயன்சிறை விடுத்தவா
செங்கீரை யாடியருளே
செல்வந் தழைத்துவளர் நெல்வேலி வாழ்செட்டி
செங்கீரை யாடியருளே.
21கழுகுமலை✓
கடலேழை யும்பழைய கங்கைப் பெருக்கெனக்
காலிலொரு சிறுவிரலினால்
கடலொன் றெனச்செய்து கடையுகத் தேபுறக்
கடனீரை யுள்ளடக்கும்
வடவா முகாக்கினியை யுள்ளடக் கிப்பின்பு
வடவையை யெழுப்பியந்த
வாரிநீ ரைப்பெருக வைத்துவிளை யாடநீ
வானவர்கள் கண்டஞ்சியே
இடர்தீர அருளென் றிரப்பவே முன்போல
எழுகடலும் வடவையனலும்
இருந்தபடி யேயிருந் திடவைத்து வீரருடன்
எண்டிசையும் விளையாடல்செய்
திடமான அதிபல மகாவீர முருகனே
செங்கீரை யாடியருளே
தென்கழுகு மலைமேவு மின்குலவு வேலனே
செங்கீரை யாடியருளே.