நல்லையை உகந்த கந்தப் பெருமான்

நல்லூர்க் கந்தன் திருப்புகழ்

க. சொக்கன் (சொக்கலிங்கம்)

நல்லையை உகந்த கந்தப் பெருமான்6 / 8

நல்லூர்க் கந்தன் திருப்புகழ் · க. சொக்கன் (சொக்கலிங்கம்)

✓

கரையி லாதுல கந்தனி லாசைகள்

கனக்க வாகிட நாள்தோறும் தீமைகள்

கதித்தெ ழுந்தன மாந்தரி லேபலர் கடையோராய்க்

கடுத்த சொற்களும் எந்தவோர் போதிலும்

கணக்கி லாதபொ றாமையும் பொய்களும்

கலக்க அஞ்சுதல் அற்றிடு பேய்களாய்க் கதிகாணார்

✓

இரையெ னச்சிறி யோர்களை நாள்தொறும்

இழித்து மேகொலும் காலர்க ளாகியே

இகந்த னைநர காக்குதல் சாலுமோ? இவராலே

இளைத்த பேர்களும் நல்லவர் தாமுமின்

றிடர்கள் பெற்றுவ ருந்துவ துன்விழிக்

கிலக்க தாகுதல் இல்லையோ சொல்லுவாய் இளையோனே

✓

புரைக ளால்நிறைந் தின்றைய வாழ்வுதான்

பொருள தற்றதாய் மாறிய தாலினிப்

புலமை யாளருக் கிங்கிட மில்லையாம் புகழ்வேலா

புதுமை செய்திடத் தீமையைக் காய்ந்திடப்

புலைமை கொன்றிட வேற்படை கொண்டுநீ

புவியி லேயொரு கால்வர வேண்டுவோம்புலவோனே

✓

வரையி லேகதித் தாடுதல் விட்டுநீ

மண்ணி லேபதம் வைத்துமே வந்துமே

மாய்த்தி டுந்தீமை தீய்த்திடு வாய்ஐயா மயில்வீரா

வனிதை தெய்வவத குஞ்சரி வள்ளியாம்

மங்கை மாரிரு பங்கை உகந்திட

மாட்சி சால்நல்லை நீயுகந் தாய்கந்தப் பெருமானே