கார்பூத்த உடலுறுங் கரிமுகனின் பின்னவனே

நீர்பூத்த செஞ்சடையன் நுதல்விழிக்கண் வந்தவனே

பரணிதனக் கடுத்துளநற் பைங்கிளிமார் பேணிடவும்

சரவணமார் பொய்கையினில் தங்கிவளர்ந் தோங்கியவா

சக்தியருள் கொண்டுதிரு சண்முகமு மானவனே

பக்தியுடன் பணிவார்க்குப் பரிந்தருளைச் செய்பவனே

வடிவேலு மெடுத்தவனே வரைமுகட டுத்தவனே

கடிகடம்ப மாலையணி கந்தனெனுந் திருமுருகா

மண்ணகமும் விண்ணகமும் மருண்டுகுலை நடுங்கிடவே

எண்ணவொணா இன்னலெலாம் எத்தனையோ புரிந்தலைந்த

சூரபது மனையவனின் சுற்றமுடன் தொலைத்தழித்தும்

ஆரபரி வோடவனை அணிமயிலுஞ் சேவலுமாய்க்

கொண்டுமயி லேறியந்தக் குக்குடத்தைக் கொடியுயர்த்திக்

கண்டுமொழி மாதரிரு கவின்புறமும் நின்றிலங்க

அருள்வதனம் ஆறுடனே ஆறிரண்டு விழிகளுடன்

மருள்தவிர்த்து மாநிலத்தை வாழவைக்கும் மதலாய்கேள்

மூவருமாய் மூவருக்கும் முதல்வனுமாய் அண்டமெலாம்

யாவருமாய் யாவினுமாய் இலங்குசிவன் தனக்கிறைநீ

போதகுரு நாதனெனப் பொலிந்தவனே உன்றனிரு

பாதமல ரலதொருவர் பாலடையேன் தலைவணங்கேன்

விண்கொண்ட தேவதைகள் வேணவையுண் டாமெனினும்

கண்கண்ட தெய்வமுன்போல் கண்டதுண்டோ சுந்தரனே

அண்டமெலா மாக்கியரு ளளித்துபுரந் தழிப்பதுநீ

கண்டவிளை யாட்டெனின்யான் கழறுவதோ நின்பெருமை?

உலகுயிர்க ளனைத்தினுமே உள்ளவனாய் உள்நிறைந்தே

இலகிடுமுன் புகழ்தனையே எளியனெடுத் தோதுவதோ

அங்கிங்கென் னாதவிதம் எங்குமொளி வடிவினனாய்த்

தங்கியுள சண்முகநின் தாள்வணங்கி உய்ந்திடுவேன்.

உளனென இலனென உரைத்திட நிறைந்தனை

அளவருந் திருமறை அறிந்திட அரியைநீ

எவரெவர் தமதுளம் இசைவுறத் தொழுதிட

அவரவர் உளப்படி அருளுவை யுருவுடன்

நிலமெனப் புனலென நெருப்பெனச் செறிந்தஅ

நிலமென விசும்பென நிறைந்தருள் புரிந்தனை

அனலளி கதிரவன் அமுதளி மதியவன்

அளவில வுடுக்கண மனைத்தினும் நிறைந்தனை;

பிறந்திலைநீ யிறந்திலைநீ பெரியவன்நீ சிறியவன்நீ

துறந்திலையிவ் வுலகியல்நீ தொடருமொரு குணமிலைநீ

அண்டமெலாம் படைத்திடுவான் அயனென்பர் அவ்வயனோ

தண்டனையுன் பாலடைந்து தனிச்சிறையில் வாடியவன்

அழுகிவிழும் மாங்கனிக்காய் ஆண்டியெனச் சென்றையென்பர்

விழுக்கனியாம் ஞானமென மெய்யறிவர் அறியாரோ?

குன்றாத நித்தியனாம் குணக்கடலாம் நின்னையந்தோ

குன்றவனென் றோதுவதேன் குறைமதியர் காண்பாய்நீ.

இச்சையுங் கிரியையும் இருசா ரணிந்தனை

விச்சையும் ஞானமும் விரும்பி யளிப்பைநீ

இருவினை யுருவமும் இன்பமுந் துன்பமும்

திருவொடு வறுமையும் சேருவ துன்னருள்

அலைகடற் பதியி லமர்ந்தனை

அணிபரங் கிரியில் செறிந்தனை

ஆவிநன் குடியை அடைந்தனை

ஏரகம் நிறைந்து சிறந்தனை

பழமுதிர் சோலை படர்ந்தனை

குன்றுதோ றாடி மகிழ்ந்தனை

விண்ணில் பிறந்தனை

மண்ணில் உறைந்தனை

கண்ணில் நிறைந்தனை

பண்ணில் ஒளிர்ந்தனை

அசுரர் ஒழித்தனை

அமரர்க் கருளினை

அயிலும் எடுத்தனை

மயிலும் அடுத்தனை

அதுகண்டு