ஆழிமிசை ஆழியுடை ஆதவனங் - காலை

சூழமிருள் போக்கிஒளி தோன்றுதயம் - போலே,

மாழைமணி செவ்வொளியின் வண்ணமிளிர் - கோலா!

வாழி! கடல் நீலநிற மஞ்ஞையமர் - வேலா!

அற்புடையார் அறியாமை அகற்றுமுரத் தாளன்,

கற்புடையாள் தெய்வானை தழுவுகின்ற கேள்வன்,

மற்றுடைவாள் வீச்சன்ன மின்னிடித்துப் பெய்ய,

பொற்புடைமால் வட்டமலர் கொண்டிணைந்த மாலை

நிவந்தவேய் நிறைந்த வெற்பில் நிரல்மணி சதங்கை பூண்ட,

சிவந்தசீ றடிகள் கொண்ட, திரண்டமென் கால்அ மைந்த,

கவர்ந்தகோ டிடையும், மூங்கிற் கணுபருத் தன்ன தோளும்,

அவிர்ந்தசீர் சாயந் தோய்ந்த ஆடைகள் அணிந்த வாறும்,

விறன்மணி வடங்கள் கோத்த மேகலை அரையில் மின்ன,

திறன்மணிக் கரங்கொண் டாற்றாத் தென்னுறு நாவ லம்பொன்

நிறைவயங் கிழைய ணிந்த நீள்ஒளி பாய்மெய் யார்தம்

அறல்மய ஈரக் கூந்தல் அவிழ்த்துறச் சகிமார் கோதி.

செங்காம்பின் வெட்சிமலர் சீரிதழ்கள் சேர்த்தணைத்தும்

பைங்காம்பின் குவளைமலர் பட்டிதழ்கள் கிள்ளிவைத்தும்

தங்கநகை திருவுத்தி வலம்புரியும் தலைச்சூட்டி

பொங்குகுறா மீன்வாய்ப்பூண் பொட்டுநுதல் மிசைபடிய,

முடித்தபெருங் கொண்டையினில்

பிடித்தமலர் மருதிணரால்

எடுத்தசெய அரும்பிணைந்த

வடிப்பமவிர் பிண்டிதளிர்

தாங்கிய வைரம் பாய்ந்த சந்தனக் கட்டை தேய்த்தத்

தேங்கமழ் கலவை கொண்டு தெய்வந மகளிர் தம்மின்

கோங்கின தரும்பை யொக்கும் குவிந்திள முலைமீ திட்டு

வேங்கைமென் மலர்நுண் தாது மேலப்பி அழகு செய்தார்.

பயந்தரு அணங்கு மாதர் விளாத்தளிர் பறித்தோச் சாடிச்

செயந்தரு வீரக் கோழி திகழ்கொடி நீடு வாழ்க!

நயந்தென வாழ்த்தொ லிக்கும் நாதங்கள் மலைக ளெல்லாம்

உயர்ந்தெதி ரொலிக்கக் கூத்து உளங்கிளர்ந் தாடும் சோலை!

மந்தி ஏற ஒண்ணாத

மந்தி மொய்க்காத் தீவண்ண

சிந்தை மகிழ அணிந்தவனாய்,

சிந்தை அஞ்சப் புக்கசூரன்

வறண்டு காய்ந்த தலைமயிரும்

திறந்த, நாறும் பேழ்வாயும்,

செறிந்த அச்சம் தருநோக்கும்,

விறைந்த, பெரிய கொங்கைகளும்

வெருவத் தக்க நடையின்று

திருகித் தோண்டித் தின்றதினால்,

மெருகு வளையல் அணிகையால்

செருவைப் பாடித் தோளாட்டித்

இருவகை உருவில் தோன்றும் ஒருபெரும் யாக்கை சூரன்

வெருவிட நெருங்கிச் சென்று விறலினை அழியச் செய்வான்

மருமலர் இணர்கீழ் நோக்கும் மாமரத் தவுணன் தன்னைப்

பெரும்புகழ் சேரக் கொய்த பிறங்கிய ஒளிவேல் சேயோன்!

செவ்விய தாள்வ ணங்கும் திறந்த அன் பெழுச்சி கொண்டும்,

ஒவ்விய அறப்பண் போடும் உவந்துறை இடங்கள் தோறும்,

திவ்விய மாய்ப்போய் வேண்டின் திண்ணம்நின் விருப்பம் கூடும்!

எவ்வமின் றின்னே துய்ப்பாய் இனியநல் வினைஇன் பெல்லாம்!

செறுநரை அழைக்கும் செருக்கொடி பறக்கும்

தறுகண்மை அற்ற செருநர்பொ ராத

நிறைதிரு மங்கை நிலையுற வைக,

குறைவற நெடிய மாடங்கள் நிறைந்த

பொதும்பரின் பழனச் சேற்றிடை முளைத்துப்

விரும்பிய அரிகள் மொய்த்துற இராக்கண்

மிதம்விடி காலைப் பரிதிதொட் டவிழ்ப்ப,

ததும்பிய நெய்தல் மலர்மிசை ஆர்க்கும்