கார்மலிந்துயர் தேன்பொருள்தினை

ஏர்மலிந்தலர் தாதவிழ்தொடை

கூர்வலப்படை ஆணவத்தலை

ஆர்வலர்தொழு தர்ச்சனைசெய

பெம்மான்சிவன் புதல்வன்பிறங் கதிகன்குகப் - பெருமான்,

அம்மான்எழில் அரிநாரணன் அவனின்திற - மருமான்

செம்மான்அருங் கொடிவள்ளிகண் செறிந்தோன் அருள் நிறைந்தோன்

அம்மா!இவன் அருளென்பதை அடையார்உயல் - அடையார்!

முருகன்திரு கரவேற்கிரு முதன்மைத்தொழில் - உளவாம்!

ஒருவந்தனக் குறுமும்மலம் ஒறுக்கும் அருட்-செயலாம்,

பெருமம்மரை அறுத்தேபெரு ஞானந்தரும் - செயலாம்!

அருமைத்தனிச் சுடர்வேலதன் அறனோச்சிடும் - அரசாம்!

‘மறவேல்’என உரைக்கும்மறம் மடிக்கும்வய - மறவேல்!

‘திறவேல்பழி சொலும்வாய்’எனத் திருத்தும்நயத் - திறவேல்!

‘கரவேல்’எனக் கயமைக்குணம் கடிந்தேதறும் - கரவேல்!

‘அறவேல்’என அனைவர்க்கடி அபயந்தரும் - அறவேல்!

நாலாயிரம் பேர்ஏத்துவர் நாளாலயம் - முன்னால்,

சீலா!உத வாய்நூபுரத் தாளாம்புசச் - சேயா!

பாலா!இதம் ஆற்றாய்நிறை பாலாபிசெ - கா!வா!

வேலாயுத! கோலாகல வேளாசலத் - தேவா!

சிலைநோக்கினில் உனைநோக்கிடும் சிறுநோக்குநர் - எனினும்

கலைநோக்கினில் திறனோக்கியும் கருத்தோருநர் - எனினும்

பலநோக்கொடு விழிநோக்கிடப் புலனாற்றுநர் - எனினும்

நலநோக்கிவந் தடிதண்டனிட் டவர்க்கேற்றருள் - தனிவேல்!

சூழ்ந்துநிற்கும் துன்பம்,தெவ்வர் தூள்செய் கூரி-ரும்புவேல்!

வீழ்த்தநிற்கும் அச்சம்நோய்கள் வேரறுக்கும் - வெள்ளிவேல்!

தாழ்த்தவைக்கும் காமம்கோபம் சாய்த்துயர்த்தும் - தங்கவேல்!

வாழ்த்தவைக்கும் பக்திஅன்பு மல்லல்சேர்க்கும் - வஜ்ரவேல்!

தண்டங்கொண்டு சூரன் கீழ்த்தத் தாங்கிக்கொண்ட - தண்மையால்,

தண்டமாக மஞ்ஞை ஊர்தி, சேவற்கொடியும் - தாங்கினாய்!

தண்டமூன்றிக் கிழவ னாகத் தையல் வேட்ட - சாகசா!

தண்டபாணி தெய்வ மெங்கள் சாதுசெட்டி - ஆண்டியே!

வேலைமிசை காலைக்கதிர் அன்ன குகன் - காணாய்!

வேலையென வேள்புகழின் வேறெதுகொல்? - ஓதாய்!

வேலையனின் தாளிணைவி ழைந்துகைவ - ணங்காய்!

வேலைபொழு தென்பதெது வாழ்விலுய - வேண்டாய்!

மூதண்டப் புவனங்கள் முழுதாளும் - முதல்வா!

பேர்தண்டம் கரத்தீந்த பெருமாட்டி - புதல்வா!

சாதண்டக் கதிபோதும் தகைவாழ்வு - தருவேல்!

வேதண்ட மெனுமுள்ள மிசையாடும் - கதிர்வேல்!

விரைவாக எம்முன்னர் விரும்போடி - வருக

நிரைவாக நும்முன்னர் நின்றேங்கி - உருக

திருஞான வேல்ஓச்சி சிறுநெஞ்சம் - தெறுக!

கரைஏற வைத்தெம்மைக் காத்தோம்பு - முருகா!

ஆதிசுயம் பானபடை - வஜ்ரவேல்!

சோதிமய மானஅயில் - வஜ்ரவேல்

நீதிவடி வானகலம் - வஜ்ரவேல்

நாதன்திருக் கையில்திகழ் - வஜ்ரவேல்

வந்தனைகள் செய்பவரை - வாழ்த்துவேல்

நிந்தனைகள் ஏசுவரை - வீழ்த்துவேல்

சிந்தனையர் ஞானக்கடல் - ஆழ்த்துவேல்

கந்தனிடம் தண்டனிடக் - காக்குவேல்

தேவர்வசு ஏத்தவருள் - உம்பர்வேல்

மேவிஇந்தி ராதிசுரர் - மீட்டவேல்

மூவர்தொழு மூர்த்திகுகன் - மூலவேல்!

காவலிருந் தோம்புதனிக் - காவல்வேல்!

அரவணி பவனவன் திருமகன்

வரமணிப் படையினன் வரமருட்

சிரம்வணங் கடிதொழச் செழுமைகள்

சரவண பவனிவன் சரிகம

தொன்றுதொட்டு மாற்றமின்றித் தோன்றுகின்ற - இளைஞனாய்!

நன்றியற்கை குன்றலின்றி நாறுகின்ற - மனத்தனாய்!

என்றுமுள்ள பொன்றலின்றி ஈருகின்ற - அழகனாய்!

நின்றியங்கும் தெய்வத்தன்மை, நீழல்செய்யும் - முருகையா!

சீர்த்தியரயும் உம்பர்வல்லி தெய்வயானை - நேயனே!

கீர்த்திமேவும் இம்பர்வள்ளி கேண்மைகொள்காங் - கேயனே!

மூர்த்தியாக வந்துகாக்கும் முத்தன்சக்தி - சேயனே!

கார்த்திகேய பாலதண்ட பாணிகதிரின் - தேயனே!

மருளுகின்ற உள்ளங்கொண்டு மாளுகின்ற - பொய்யனேன்!

இருளுகின்ற உள்ளஞ்சொல்லும் ஈனச்செய்கை - கையனேன்!

அருளுகின்ற உள்ளங்கொண்டு ஆதரிக்க - வருகையா!

தெருளுகின்ற உள்ளம்அருளித் தெய்வக்காட்சி - தருகையா!

முந்திவலம் வந்திடவும் முன்னவன்கண் - முன்னோன்,

தந்தபழம் கண்டுசினம் கொண்டுதனி - சென்றோர்,

சொந்ததலம் நின்றுகொடு தோல்விகெட - வென்றோய்!

மந்தமதி நல்கிகதி வந்தருளும் - கந்தா!

ஆறுபடை வீடுதொறும் ஆடிவரும் - பாலா!

வீறுமதி ஒளவை, யயன், வெண்மையழி - சீலா!

மாறுமனம் வேறசெயல் வல்லவுணர் - காலா!

ஊறுதரு ஆணவமொ ழித்திடுவி - சாகா!

அப்புதலை அப்பனிடம் அப்பொருளின் - உண்மை,

செப்புதலை மேற்கொடு,மை தீர்த்தகுரு - வையா!

இப்புவியும் அப்புவியும் எப்புவியும் - வாழ்த்த

அற்புதனல் பொற்புடைய அரிவைமண - வாளா!

வீரமருள் விள்ளுமுரு காற்றுப்படை - சொன்னோன்

கீரன்பிணி கேட்டிடரை நீக்கியருள் - தந்தாய்!

சூரன்உடல் கீழ்த்திமயில், சேவற்கொடி - கொண்டோய்!

ஈரமதை ஏழைமிசை ஈந்தருளும் - குமரா!

காதலுனை மேவஅடு காமமறு - வித்து,

மேதகுநின் நற்கருணை மேன்மைதிறம் - பாடி,

ஓதுமறை வேதமதை ஓதருண - கிரியை

தீதகலும் பொன்னடிகள் சேர்த்தபெரு - மாளே!

கந்தமுடை காமர்மலர் சாத்திமகிழ் - வோர்க்கும்,

பந்தமிக உண்ணெகிழ்ப் பாதம்பணி - வோர்க்கும்,

பைந்தமிழின் பாமாலை சாற்றிமகிழ் - வோர்க்கும்

சிந்தைஉவந் துன்றனருட் சித்திதர - வருவாய்!

செந்தமிழ் போன்றவன் செவ்வேள் - தொல்

பைந்தமிழ் ஆன்றவன் எல்லே - பக்தர்

பத்தொடி ரண்டுகை ஒப்பே - தமிழ்

பத்திரு நான்குமெய் யெழுத்தும் - முருகன்

புள்ளிஎன் றாயுதம் ஒன்றே - வேலன்

மெய்யுயிர் எழுத்துகள் ஈடாய் - கந்தன்

மெல்லினம் இடையும்வல் லினமு - நேர்

மெல்,இடை என்றுயிர்க் கருளல் - ஆம்

ஆறுமு கங்களின் பண்பாய் - தமிழ்

கந்தர் அலங்காரம் கந்தர் அனுபூதி நூல்கள் - அவை

கந்தர் கலிவெண்பா கந்தர் திருப்பாடல் நூல்கள் - அவை

கந்தர் மேல்வகுப்பு கந்தர் அருட்காதை நூல்கள் - அவை

கந்தர் சரணப்பத் தென்னும் துதிபாடல் நூல்கள் - அவை

பெரும்புலவன் நக்கீரன் பிழைக்காக - ஏத்த,

பரவுதிரு முருகாற்றுப் படைநூலும் - வேள்சொல்!

அருணகிரி தேன்குழைத்து அள்ளுறிப் - போற்ற

தெருளளிக்கும் திருப்புகழும், அருட்பாவும் - வேள்சொல்!

செந்தமிழின் சீர்மைஎனச் செவ்விசெறி - வுள்ளோன்

பைந்தமிழின் பான்மையெனப் பாலன்குழை - வுள்ளோன்

தண்டமிழின் நீர்மையெனத் தண்ணருளக் கன்னோன்

தொன்மைத்தமிழ்த் தன்மையெனத் தோற்றநிலை - முன்னோன்.

தமிழாலே வைதாலும் தாங்கிக்கொள் - இறையோய்!

அமுதான தமிழன்ன அழியாத - அழகோய்!

குமரேசன் தமிழ்போலக் குன்றாத - இளையோய்!

தமிழ்ப்பண்பு மணம்வீசும் தமிழ்த் தெய்வம் - முருகா!