குறுக்குத்துறை குமரன் பிள்ளைத்தமிழ்
வித்துவான் தி. சு. ஆறுமுகம்
அம்புலிப்பருவம்8 / 11
குறுக்குத்துறை குமரன் பிள்ளைத்தமிழ் · வித்துவான் தி. சு. ஆறுமுகம்
அம்புலிப்பருவம்
66✓
அலைவாய் வந்தாய் நீயிவனும்
அலைவாய் வந்தான் கடல்சூழும்
அகிலஞ் சுற்று வாயிவனும்
அகிலஞ் சுற்றி னானறிவாய்
அலைவார் கங்கை யடுத்தாய்நீ
அடுத்தா னிவனுங் கங்கைதனை
ஆரு மிருளை யவிப்பாய் நீ
அகத்து விருளை யிவனவிப்பான்
தலையா றுடையான் தலைநின்றாய்
தலையா றுடையான் தலைநின்றான்
தாரம் பலவே நீகொண்டாய்
தாரம் பலவே யிவன்கொண்டான்
கலையார் நீவி ரிணையாதல்
கண்டே வருக அம்புலியே
கவினார் குறுக்குத் துறையானைக்
கலந்தா டிடவா அம்புலியே.
67✓
அடைந்தாய் முன்னாள் மலர்த்தாரை
அடைந்தா னிவனும் மலர்த்தாரை
அளியார் சோதி வடிவானாய்
அழியாச் சோதி வடிவானான்
மிடைந்தா யுன்னுள் கரிமானை
மிடைந்தா னிவனுங் கரிமானை
வெளியே வருவாய் மலையேறி
வேல னிவனும் மலையேறி
குடைந்தாய் வெண்மைப் பால்வாரி
குடித்தா னிவனும் பால்வாரி
குளித்தே வருவாய் திருசேரக்
குலவி வருவான் திருசேர
அடைந்தார் பாவம் அறுப்பானோ
டாட வாவே அம்புலியே
அணிசேர் குறுக்குத் துறையானோ
டாட வாவே அம்புலியே.
68✓
மீன ரும்மை விரும்பிடவே
மேவி யவர்பால் நீர்சென்று
மார்பி னணைப்புக் குள்ளாகி
மடியிற் கிடந்து கண்வளர்ந்தீர்
கான மளிக்கும் ஆம்பலையே
கரங்கொண் டணைத்து நகைகாட்டி
கலந்து மகிழ்ந்தே அவர்வதனம்
கவின்பெற் றலரச் செய்திடுவீர்
வான ருடனே குலவியுமவ்
வானின் வழியே நீர்வந்து
மாறு முகங்கள் தாம்கொண்டும்
மானு வீர்நீ ரிருவீரும்
ஆன படியா லிவனழைத்தான்
ஆட வாவே அம்புலியே
அணிசேர் குறுக்குத் துறையானோ
டாட வாவே அம்புலியே.
69✓
பொருந்து மன்பா லிவனுன்னைப்
பேணி யழைத்தான் புரிந்திலையோ
பேதை மதியே சிறிதேனும்
பெம்மா னிவனுக் கிணையோநீ
திருந்து கலைக ளறுபத்து
நான்குங் கொண்டான் இவன்நீயோ
சேருங் கலைகள் பதினாறே
சிதறும் பலநா ளவைதாமும்
பருந்து தாங்கும் மால்மருகன்
பழுதில் வடிவன் செம்மதியன்
பாராய் நீயோ குறைவடிவன்
படர்கொண் டுழலும் வெண்மதியன்
பொருந்திக் குறுக்குத் துறையானைப்
போற்றி வாவே அம்புலியே
பொலிவார் வேல னிவனோடு
பிணைந்தா டிடவா அம்புலியே.
70✓
தக்க னென்னும் நின்மாமன்
தனக்கே நீயும் அஞ்சிடுவை
தக்கன் தாதை பிரமனையே
தலையிற் குட்டும் பெரியனிவன்
அக்க ரங்கள் ஆறுடையான்
அகளங் கன்நீ யோகளங்கன்
அகத்தி னிருளை யவன்மான
அகற்ற வொண்ணாய் நீசிறிதும்
பக்க முனக்குச் சிறுமானே
பாங்க ரிவர்க்குப் பெருமானே
பால னிவனும் பெருமானே
பாரா யிவையெ லாமுணர்ந்தே
இக்க ணமேநீ யிவனுடனே
இணைந்தா டிடவா அம்புலியே
எழிலார் குறுக்குத் துறையனுடன்
இனிதா டிடவா அம்புலியே.
71வேறு✓
கூனலிளம் பிறைமதியே குமரனிவன் முன்னர்
கூறுதிரு ஞானமுறு குரவனெனத் தோன்றி
மீனவனின் கூனலுடன் மனவிருளும் போக்கி
மீட்டரனின் பாதமலர் மேவியுறச் செய்தான்
ஈனமுறும் பிறவிதனை எளிதெரிக்கு மிவன்முன்
என்புரியும் நின்வருத்தும் எளியசில நோய்தாம்
ஆனனமா றன்முருகன் அணிபொருநைத் துறையன்
அம்பரனோ டாடிடவே அம்புலிநீ வாவே.
72✓
எடுத்துனையே விழுங்கியுமிழ் எரிவிடஞ்சேர் பாம்பும்
எண்ணிடுமோ இவனமரும் எழின்மயில்முன் நாட
அடுத்துவருங் குருமனையைக் கெடுத்ததினால் நீயே
அடைந்த பெருஞ் சாபமதைக் கடிந்திடுவான் கண்டாய்
தொடுத்துரைசெய் தேவதைகள் தோன்றிடினும் பலவே
தொன்மையனிச் சண்முகன்போல் தேவரில ருண்மை
அடுத்தவரை யாள்முருகன் அணிபொருநைத் துறையன்
அம்பரனோ டாடிடவே அம்புலிநீ வாவே.
73✓
மாதமொரு முறைபிறந்து மாண்டிடுவாய் நீயே
மாறிமாறி பிறந்திறத்தல் மாட்சிமையோ சொல்வாய்
பேதமெது மெண்ணிடாது போதமுடன் நண்ணிப்
பிறவியெனும் நோய்தவிர வருகஇவன் பாலே
ஏதமொடு வேதனைகொண் டெத்தனை நாள் திரிவாய்
ஏனிதனை யுணரவிலை யின்னுமட மதியே
ஆதமுறு வான்முருகன் அணிபொருநைத் துறையன்
அம்பரனோ டாடிடவே அம்புலிநீ வாவே.
74✓
கூறுமொழி நின்செவியி லேறவிலை யோசொல்
கோபமிவன் கொள்ளமனத் தாபமடை வாய்நீ
சேருமரன் திருமுடிமீ தேறியிவன் நின்னைச்
சேர்த்திடுவ னங்குறையுஞ் சீறரவின் வாயுள்
மீறுமொளி கூர்வடிவேல் முன்னரன்று சூரன்
மேவுகதி காணிலையோ தாவிடுமுன் பாலே
ஆறுமுகன் சீறுமுன்னே அணிபொருநைத் துறையன்
அம்பரனோ டாடிடவே அம்புலிநீ வாவே.
75✓
பூதலமெ லாம்படைக்கும் வேதனாமே முன்னர்
பெற்றவிடர் கண்டுமுனக் குற்றதிடம் யாதே
ஓதலரி தாம்புகழன் ஒண்கரமார் சேவல்
ஒலிக்குடையும் நீயிவனின் வலிக்கெதிரா வாயோ
காதலதி கம்இவன்பால் கொண்டநவ வீரர்
கதமுறுவ ராயினும்நீ வதமுறுவாய் கண்டாய்
ஆதலினால் போதமுடன் அணிபொருநைத் துறையன்
அம்பரனோ டாடிடவே அம்புலிநீ வாவே.