கனை கடல் உடுத்த புவி முழுவதும் நொடிப்பு அளவில்

கமல மலரில் குடிகொள் பிரமனை அடித்து உலகு

தனை அவிழ் கடப்ப மலர் குவளையொடு செச்சை புனை

நதி, அரவு, கொக்கு இறகு, பிறைமதி முடித்த சடை

வனை கழல் அரக்கரொடு மயல் புரி பொருப்பினையும்

மழையினொடு நல் தவள மதகரி மிசைக் குலவு

தினை வளர் புனத்து அருவி இழி தணிகை வெற்பு அரச!

திமிர மலம் அற்றவர்கள் தெளிய வரு சிற்சொரூப!

கொலை புரி தயித்தியர்கள் உடல் தலைகள் அற்று ஒழுகு

குறைபடும் உடற்கு நிகர் கரணமொடு சுற்றிவரு

மலை நிகர் பிணக்குவையின் உறுகுடர் புயத்து அணியும்

மருவு கழுமுள் படையை முறைமுறை திரித்து, வய

உலை உறு குடத்தினிடை வறைபடு தசைப் பொரியல்

உறு கழுகு, மைக் கொடிகள் வறுமை அற வெற்றி அயில்

சிலை மறவர் மொய்த்து வளர் தணிகை நகருக்கு அரச!

திமிர மலம் அற்றவர்கள் தெளியவரு சிற்சொரூப!

குறைவு அறு தவத்தை உறு கொடி இடை எயிற்றியர்கள்

குளிர்முகம் நிகர்ப்ப எழு சுனையிடை முளைத்த ஒரு

உறுதவம் இயற்றல் நிகர்தரு கமல மெத்தைமிசை

உயர் தவம் இயற்றி மகிழ்வொடு தழல் வளர்ப்பது என

மறு அறு கழைத்தலையில் மயிலினம் நடிக்க, அவர்

மறைதரு குயில் தொகுதி, முகிலினம் வர, கடிது

சிறு மிளகு வெற்றிலையின் ஒளிர் தணிகை வெற்பு இறைவ!

திமிர மலம் அற்றவர்கள் தெளியவரு சிற்சொரூப!

கழையின் உகு முத்தின் நிலவு ஒழுகும் ஒளியில் குவளை

கதிர் மணியினில் குமுதமுகை புரி முறுக்கு விரி

நுழை சிறு கயல் புகுதும் அளவில் எதிர் குத்தி இடை

நுகரும் முது கொக்கின் வளை மிடறு ஒடிதரச் சினவி,

மழை அகடு முட்டி, மிசை வரு கதிரை எட்டி, உயர்

மட நடையுடைக் கனக வன வளமுடைப் புவன

செழு மலர் மிசைத் துயிலும் உயர் தணிகை வெற்பு இறைவ!

திமிர மலம் அற்றவர்கள் தெளியவரு சிற்சொரூப!

நடம் இடு மயில் தொகுதி, இசை வளர் குயில் தொகுதி

நவில் இயல் தழைத்து இனிய மழலை மொழி கற்று இளைஞர்

தட வரை முடிக்கண் இவர்தரலுறு சுவர்க்கம் உறு

தலைமிசை நடிக்க எழு தகைமையை நிகர்க்கும் மழை

பட அர முடிக்கண் ஒளிர் மணி வெயில் எறிப்ப, இருள்

பயன் உறு கரிக்கணமும் அயல் உறும் அரிக்கணமும்

திடம் உள பொருப்பர் குடியிறு தணிகை வெற்பு இறைவ!

திமிர மலம் அற்றவர்கள் தெளிய வரு சிற்சொரூப!

வட வரை முகட்டில் உறு துருவனும், மகத்து இறையும்,

மதியமும், உடுக்குலமும், மலர்கதிரும், மைக்கடலும்,

பட அரவம் எட்டினொடு கட கரிகள் எட்டும் அவை

பயன் உறு தவத்தின் நிலை அழிவு அரிய சித்தரொடு

மட நடை எயிற்றியர்கள் இயல் உறும் மணிக் கலவ

மனம் மகிழ்தரக் குலவி, நடம் இடு சதிக்கு இசைய

திடம் உறு துகிற் கொடிகள் உயர் தணிகை வெற்பு இறைவ!

திமிர மலம் அற்றவர்கள் தெளியவரு சிற்சொரூப!

தழைத்திடு தமனியம் இழைத்திடு மணிவெயில்

சரித்திடு வனிதையர் முகத்து எழில் கவர்மதி

மழைக்குலம் அவர்குழல் வனப்பினை நனி கவர்

வருத்திடும் அவர் இடை எழில் கவர் தரு மினும்

செழித்திடு புரிசைகள் மிசைப்படு கொடி வளி

சிறப்பு உற வரு கதிர் இளைப்புறு துயர் தவிர்

முழைச் செவி மலை உடல் அரக்கரை அடு குக!

முழுத்திய மல இருள் ஒழித்திடு தினகர!

மலைச் சரிவினில் வளர் தினைக் கதிரினை நுகர்

மறத்தியர் அணி விரல் சுழற்றிய கவண் எறி

புலத்து உறு கடைசியர் களித்திடு குரவையின்

பொருக்கென விழ, முதிர் பழத் திரள் பல இரு

செலைத்தொடு கதலியின் குலைக்கனிகளும் எழில்

செறித்து அனுதினம் உழு வயல்தலை எரு இடு

முலைக் குவடு அசைதர, மறத்தியர் நகைசெய,

முழுத்திய மல இருள் ஒழித்திடு தினகர!

கடைப்படு பிறவியின் அகப்படும் இருவினை

கறைப்படு நரகொடு துறக்கமும் உழல்தரு

தடைப்படு மயலினை அறுத்து, இகல் அற ஒளிர்

சலிப்பு அறு பரசுக அளக்கரில் எனது உயிர்

குடத்தினை நிகர்தன மறத்தியர் இயல் மயில்

குறிச்சியில் உறு கணி மரத்தினில் அமர்தரு

முடக்கிய மணி விரல் பிடித்திடு குணில் கொடு

முழுத்திய மல இருள் ஒழித்திடு தினகர!

தகைத்திடு பொறிவழி உகைத்திடு புலனொடு

தவத்தினை அநுதினம் உஞற்றிய முனிவரர்

மிகுத்திடு நறை பொழி கடப்பலர் அணிதரு

விண்ணில் செறி பிடியொடு குறக்கொடி இருபுறம்

திகைத்திடு நிருதர்கள் பகைத்து எதிர் விடு கணை

செகுத்திடும் இலை அயில் பிடித்திடும் அறுமுக!

முகிழ்த்திடும் அணி விரல் பிணித்திடு குணில் கொடு

முழுத்திய மல இருள் ஒழித்திடு தினகர!