நல்லவேளை கண்டு செல்லடி-நாடியென் சகி-(நல்ல)

வல்லவர் குறுக்குத்துறை யுள்ளவர் அருள்புரியும்

நல்லவர் திருக்குமரர் இல்லிலே நுழையும்போது(நல்ல)

திருவனந்தல் முதலாம் சேருமொன் பதுகாலச்

சிறப்புடைய பூஜையில் திரந்திர ளாகச்சூழ

வரும்அடியார் தமக்ககு வரமருளு மவ்வேளை

வகையறியா மற்சென்று வருத்தம் கொடுத்திடாமல்(நல்ல)

மாசித் திருநாளும் வைகாசி விசாகச் சாறும

வசந்த முடனே கந்த சஷ்டித் திருவிழாவும்

மாசக் கடை வெள்ளியும் மற்றும் விழாக்களிலும்

மறந்தெனினு முள்ளேநீ புகுந்திடாம லுணர்ந்து(நல்ல)

பக்தியுடன் ஆவடு துறையர்செய் வழிபாட்டைப்

பார்த்திடவே அடியார் பரவசமுடன் நாடி

மெத்தவு மாவதுடன் வீரவாகு தேவரின்

விழியருள் நோக்கி நிற்பர் வழிவகை நீயறிந்து(நல்ல)

அருணகிரியின் சந்தப் புகழுமந்தாதியும்

அமலன் குருபரன்செய் அரிய திருக்கலியும்

வருவினைதீர் கவசம் இவை முழக்கியடியார்

வழிபடுங் காலுரைப்ப தெளிதலவே உணர்ந்து(நல்ல)