பருவத் துடிப்பிலொன்றிப் பரும னடர்த்திகொண்டு

படர்கச் சினைக்கிழிக்கும் கொங்கையாள்-எழில்

பழகும் வளைகொழிக்கும் செங்கையாள்-இந்தப்

பலரும் மயங்கப்பார்வை பேசுவாள்-தவித்

தலறிக் கலங்கச்சீர்கை வீசுவாள்

மருவத் துடிதுடிக்கும் மயிலாள் துடியிடைக்கு

மழையோ டொளிருமின்னல் தான்நிகர்-கண்கள்

மருள விழிப்பதும் பெண் மான்நிகர்-தவ

மையல் கொடுக்குமின்ப மூச்சினாள்-அந்தத்

தையல் மருந்தையொக்கும் பேச்சினாள்

பெருநத் தினைப்புனைந்து பொலிவார்ந் திடச்சிறந்து

பெரிதும் துடிதுடிக்கும் மூக்கினாள்-பெரும்

புலவர் வடித்தெடுத்த வாக்கினாள்-திருப்

புலம்பித் தவிக்கும் ரெண்டு தண்டையாள்-வண்டர்

புகுந்து மதுகுடிக்கும் கொண்டையாள்

உருவத் தினிற்சிறந்து ஒளிர்பாற் கடல்கடைந்து

உயருந் திருவமுத மேனியாள்-அவள்

உரையில் பெரிதினிக்கும் சீனியாள்-உள

ஒயிலாய் நடைபயின்று நாடினாள்-நாடி

மயிலாய்ப் பந்துபயின்றும் ஆடினாள்.