வழுத்திடுவேன் விருப்புடன்நீ கேட்டிடுவாய் கண்ணே

தண்பொருநை நாடாமென் தண்டமிழ்சேர் நாட்டில்

நெருங்கிவரு வார்க்கருளும் நின்மலர்செவ் வேளர்

வண்பொதிகை மலையதுநான் வதியுமலை யம்மே.

அங்குறைதல் தரமலவென்றடி பணிந்து மீண்டேன்

இருந்திடவு மெண்ணாமல் நடந்துவழி கொண்டேன்

நகரிமலை கண்டதனை யகன்றுவழி கொண்டேன்

தரம்பெரிய தூங்கலென இறங்கிவந்தே னம்மே.

மேவுதிரி கூடமுங்குற் றாலமலை யம்மே

குடியிருக்க எண்ணாத படிவிடுத்தேன் அம்மே

பழனிமலை சுவாமிமலை பரங்கிரிதா மெல்லாம்

திரும்பவுமே உரிமைகொள்ள விரும்பவிலை யம்மே.

பேசிடுவேன் கேளாயோ மாசிரியும் அம்மே

மாலாடையு மென்றதாலப் பாலடைந்தே னம்மே

இங்கடைந்து பொதியமலை தங்கியுளே னம்மே

புகன்றிடுத லரிதெனினும் புகன்றிடுவே னம்மே.

நனியகிலுஞ் சந்தனமும் மணம்பெருக்கு மம்மே

பொலிவுடனே வான்தடவிப் புதரடரு மம்மே

அணியணியாய் மணங்கமழ அலர்ந்திருக்கு மம்மே

வண்டமிழ்சேர் பொதியமலை கொண்டகுடி யம்மே.

பெருமலைக ளெனக்கரிகள் திரிந்துலவு மம்மே

படர்முகிலைக் கண்டுமயில் நடமிகவே ஆடும்

உழுவைமுத லாயவிலங் கழுவமுறச் சாடும்

கடலிவரும் பொதியமென்றன் குடியறிவா யம்மே.

காத்திரமாய்க் கல்யாணித் தீர்த்தமெனச் சாடும்

சிலையெனவே நின்றுபுலி நிலைகுலைந்தே ஓடும்

நுடங்குபல குழைதழைகள் நடம்பயின்றே குதிக்கும்

தேயமுறும் பொதியமெனக் காயகுடி யம்மே.

காண்மலைநெல் வரையரிசி வேணவைதாம் பெறுவோம்

கும்பகரிக் கொம்பதனால் கம்புதினை யிடிப்போம்

விழுமருவி நுழைந்தாடிச் செழுஞ்சுனைநீர் குடிப்போம்

செலுத்தாணை சேர்பொதிகை நிலைத்தகுடி யம்மே.