சிங்கன் கூற்று

குறுக்குத்துறைக் குறவஞ்சி

தி.சு. ஆறுமுகம்

சிங்கன் கூற்று77 / 96

குறுக்குத்துறைக் குறவஞ்சி · தி.சு. ஆறுமுகம்

இசைப்பாட்டு

இராகம்: புன்னாகவராளி தாளம்: ஆதி

(எடுப்பு)✓

சாடுதடையே - பறவைகள் - சாடுதடையே (சாடு)

(தொடுப்பு)✓

கூடுபுகழ்குறுக் குத்துறை வேலவர்

கோலத்திருவடி கூடிய தொண்டரை

நாடுமருள்வெள்ளம் போலவே புள்ளினம்

நானாதிசையினும் தானாய்த் திரண்டிவண்(சாடு)

(முடிப்பு)✓

நாரை வருகுது நன்மயின் கூடுது

நாகண வாய்க்குலம் நாடி வருகுது

காரை வலியனுங் காக்கையும் நாடுது

காடை வருகுது கம்புளுஞ் சேருது

வாரை யுடன்கில் வானுயர் தேக்கடர்

வண்பொதி யந்தனில் விண்கருத் தேமுகில்

தாரை பொழிந்திடத் தாமிர பன்னியில்

சாடும் பெரும்புனற் கூடக் குறைவெனச்-(சாடு)

✓

கொக்கினங் கூடுது வக்காவும் நாடுது

கூழைக் கடாபல தாழக் குதிக்குது

வக்கணை யாய்க்கிளி பக்கங் குவியுது

வாலாட்டிப் புட்களும் ஆலாவுஞ் சாயுது

திக்கெலாம் போற்றிடுந் தெய்வக் குறள்தனைத்

தெள்ளத் தெளிவுடன் தேர்ந்து படித்தவர்

தக்க முறைப்படிச் சாற்றிடப் பேருரை

தட்டில தாய்வெளிப்பட்ட பொருளெனச்-(சாடு)

✓

உள்ளான் வருகுது ஊர்க்குரு வித்திரள்

ஓடி வருகுது சாடுது மீன் குத்தி

கள்ளத் தனமிகுங் காக்கை வருகுது

காந்திரி கோழிகள் தாம்பல மேவுது

தள்ளிக் குதித்துமே தாரா குவியுது

தவிட்டுப் புறாபல தங்கி நிறையுது

அள்ளக் குறைவில தாய ருணகிரி

ஆக்கு திருப்புகழ் வாக்கினைப் போலவே (சாடு)

✓

ஆறு முகன்றனக் காவணி மாதத்தில்

அமிர்தலால் கேசவ ஜோஷி நடத்திடும்

சீருஞ் சிறப்புஞ் செறிந்திலங் குகின்ற

தெப்பத் திருவிழா தன்னைக்கா ணத்திரள்

சேருந் தகவினிற் செங்கா லனங்களுஞ்

சிட்டுக் குருவியுஞ் சிம்புட் பறவையும்

மீறுந் திறமிகு செம்போத்துக் கூட்டமும்

மேன்மை மிகுகுறுக் குத்துறை நாடியே (சாடு)

முந்தையகவியின் கூற்று அடுத்தகவியின் கூற்று