மருவியென ஞானமத மார்த்திழியுஞ் சோதிக்

கரிமுகவொற் றைக்கொம்பர்க் கண்டு - திருவடியில்

தெண்டனிட்டுக் குட்டிட்டுத் தொப்பணமிட் டுச்சிரசிற்

கொண்டுகரங் கும்பிட்டுக் கோதில்பல - தொண்டர்குழு

மொட்டையிட்டு மேனி முழுதுந்தூ நீறணிந்து

சிட்டமுடன் காவடிதோட் சேர்த்தியியங் - கொட்ட

உருகா தரத்தா லுடல்புளக மெய்தி

முருகா முருகா முருகா - அருள்பொழியும்

ஆறுமுகம் ஆறுமுகம் ஆறுமுகம் யாவரினும்

வீறுசிவ சுப்பிரமண்ய வேலவா - தேறுமவர்

அஞ்சுதலை நீக்கியுளத் தாறுதலை யீயவென

மஞ்சுதலை சூழ்பழனி மாமலைவாழ் - விஞ்சுபுகழ்

ஆண்டவா வோமரஹ ராவென்று வான்பரவ

நீண்டபே ரோசை நிகழ்த்திடவும் - ஈண்டுசிலர்

தங்கள் வறுமைச் சலதி கடத்தினதும்

பொங்கு துயர்நோயைப் போக்கியதும் - மங்கலஞ்சேர்

இல்லாட் புணர்த்தியது மின்மகவை ஈந்ததுவும்

பொல்லா எதிரிகளைப் போக்கியதும் - நல்ல

கலைஞானங் கைகூடக் காட்டியதுஞ் சிந்தை

யலையாத நிட்டை யளித்துத் - தொலையாத

பேரின்ப மூட்டியதும் பின்னும் பலபலவாம்

சீரருள்கள் பேசியன்பாற் செல்வாரும் பாரின்கண்

எண்ணரிய கேத்திரங்க ளெத்தனையோ மூர்த்தங்கள்

புண்ணியநற் றீர்த்தம் பொருந்திடினும் - உண்மையினில்

தென்பழனி மாமலைக்கும் தெண்டா யுதக்குழகும்

நன்புனல்சேர் ஷண்முகப்பேர் நன்னதிக்கும் - பன்னிடவோர்

ஒப்பில்லை யில்லையென வோதிப் புகழ்வாரும்

கப்பூரந் தேங்காய் கதலிபலம் - திப்பியம்ஆம்

பஞ்சாமிர் தங்கூட்டுப் பண்டங்கள் ஆனைந்து

விஞ்சுமுழக் காட்டவுள வேறுபொருள் - நெஞ்சினில்முன்

நேர்ந்த கடன்கள் நிரைநிரையாய்க் கொண்டுசெல்வோர்

ஆர்ந்தபதி னெண்டேயத் தன்பர்குழாம் - சேர்ந்துநிறைந்

தெண்ணு ளடங்காதார் ஏறிமலை மீதுசெலக்

கண்ணு மனமுங் களிகூர - நண்ணி

இடும்பன் றிருமுன்னின் றேத்தியருள் பெற்று

நடந்து மலையுச்சி நண்ணி - இடம்பரவு

கோயில்வலம் வந்து கொடிமரமுன் றண்டனிட்டு

வாயில் நுழைந்தேன் மகிழ்வோடும் - ஆயிடைச்செஞ்