சாமமறை யோதுஞ் சதாசிவவோம் சுப்ரமண்ய

நாமமுட னாயிரநன் னாமத்தான் - ஏமமலை

தன்னைச் சிலையாய்த் தரித்துப் புரமெரித்த

முன்னவன் வைத்த முழுக்கருணை - தன்னால்

திருவுருவாய் நின்ற சிவகிரியா னன்பு

பெருகுளத்திற் றன்கருணை பெட்டப் - பெருகிவரு

விண்முகத்தார் மண்ணோர் வியனகர் மூழ்குபுனற்

சண்முகத்தா றோங்கு தவப்பயன்போல் - மண்ணின்மேல்

வேண்டு நலமீயும் மேன்மைவரத் தாறுடையான்

ஈண்டுபுகழ் நல்லா வினன்குடியான் - மண்டபுகழ்க்

கன்மாப் பலகை கவினுறுமேல் வீற்றிருந்த

பன்மாப் புலவர்சொல் பாமாலை - தன்னோடு

பண்கடப் பின்றிப் பமர வினமுரலுந்

தண்கடப்ப மார்பணிந்த தாரினான் - விண்கடந்து

நாகருல கங்கடந்து நாடிநொடிப் போதில்வருந்

தோகைமயில் வேகத் துரகத்தான் - மாகம்

அளவுங் கயிலை யணிநடைபெற் றென்ன

வளர்மும் மதகரியான் வையம் - தளருமல

ஆரிருளி னீங்கி யருட்சோதி பெற்றுய்யச்

சீரினொடு கூவுகொடிச் சேவலான் - யாரெனினும்

தன்னடைந்தார்க் கின்பங்கள் தந்தருளுங் கந்தனிவன்

முன்னடைவிர் என்றறையு மும்முரசான் - மென்மலர்வாழ்

முந்தை மறையோன் முதலோராற் றோற்றமுதல்

ஐந்தொழிலுஞ் செய்விக்கு மாணையான் - எந்தை

இவனென் றொருசிலர்க ளேத்த வொருபால்.