உலக முவப்ப வலனேர் பென்றாற்குப்
பொலங்குழை யணிந்தவோ ரிலங்குசெவி யீந்தும்
முத்தைத் தருபத்தி யென்ற றைந்த
அரும்பெரும் புலவற் கொருசெவி யளித்தும்
திகட சக்கர செம்முக மென்ற
செஞ்சொல் முனிவற்கொ ரஞ்செவி யளித்தும்
கலிவெண் பாவைக் கழறிய பொருட்கும்
பொலிவிடை செவியி லொன்றனைக் கொடுத்தும்
அரனடி மறவா சரணா லயற்குச்
சுருதி மகிழுமோர் சுரோத்திர மீந்தும்
முருகா என்ற முருகுடை மகட்குன்
அருமைச் செவியி லொன்றனை யளித்தும்
செகத்தின் கண்ணே செந்தமிழ் பரப்பிய
அகத்திய முனிக்கோ ரஞ்செவி யீந்தும்
கிரியா சத்தியாம் கிளர்மணிப் பூணாள்
வழுத்துஞ் சொற்கோர் வான்செவி யருளியும்
இச்சா சத்தியா மின்ப வள்ளிக்கும்
விச்சையில் வல்லரும் விமல யோகரும்
போதரு மேத்துமோர்க் காதினை யீந்தும்
வள்ளலார் கனிந்த வண்கவிக் காக
உள்ள செவிகளி லொன்றனை யீந்தும்
மாலு மயனும் மனத்தி னிடத்தே
நாளு மேத்தி நாவினாற் புகழும்
அன்புடைச் சொற்கு னிருசெவி யளித்தும்
அறுபடை வீட்டிலு மமர்ந்த வேலோய்
சிறியேன் கவிக்குச் செவியிலை யென்று
அருளா திருத்த லழகிய தன்றே
அதனால்,
ஐம்முகத் தானரு ளாறு முகாவும்
பைம்முகத் தொளியைப் பார்ப்பான் வேண்டித்
தாயது வரவைத் தேடுஞ்
சேயதைப் போலத் தியங்கு கின்றேனே.