சென்னி குளநகர் வாசன்—தமிழ்

தேறும்அண் ணாமலைத் தாசன்—செப்பும்

செகம்மெச்சிய மதுரக்கவி

யதனைப்புய வரையிற்புனை தீரன்

அயில் வீரன்

வன்ன மயில்முரு கேசன்—குற

வள்ளி பதம்பணி நேசன்—உறை

வரமேதரு கழுகாசல

பதிகோயிலின் வளம்நான்மற வாதே

சொல்வென் மாதே.

கோபுரத் துத்தங்கத் தூவி—தேவர்

கோபுரத் துக்கப்பால் மேவி—கண்கள்

கூசப்பிர காசத்தொளி

மாசற்றுவி சாலத்தொடு குலவும்

புவி பலவும்

நூபுரத் துத்தொனி வெடிக்கும்—பத

நுண்ணிடை மாதர்கள் நடிக்கும்—அங்கே

நுழைவார்இடு முழவோசைகள்

திசைமாசணம் இடியோஎன நோக்கும்

படி தாக்கும்

சந்நிதி யில்துஜஸ் தம்பம்—விண்ணில்

தாவி வருகின்ற கும்பம்—எனும்

சலராசியை வடிவார்பல

கொடிசூடிய முடிமீதிலே தாங்கும்

உயர்ந் தோங்கும்

உன்னத மாகிய இஞ்சி—பொன்னாட்

டும்பர் நகருக்கு மிஞ்சி—மிக

உயர்வானது பெறலால்அதில்

அதிசீதள புயல்சாலவும் உறங்கும்

மின்னிக் கறங்கும்

அருண கிரிநாவில் பழக்கம்—தரும்

அந்தத் திருப்புகழ் முழக்கம்—பல

அடியார்கணம் மொழிபோதினில்

அமராவதி இமையோர்செவி அடைக்கும்

அண்டம் உடைக்கும்

கருணை முருகனைப் போற்றி—தங்கக்

காவடி தோளின்மேல் ஏற்றி—கொழுங்

கனல்ஏறிய மெழுகாய்வரு

பவரேவரும் இகமேகதி காண்பார்

இன்பம் பூண்பார்