தேவர்கள் திருவேலை வாழ்த்தி வணங்குதல்

2✓

பூவுலகில் அடியார்க்குப்

போந்திட்ட குறைகளையும்

புனிதமிகும் திருவேல் போற்றி!

தேவர்தம் துயர்தீர்த்துச்

செகமெல்லாம் அருள்நாட்டும்

செவ்வேட்கை நெடுவேல் போற்றி!

3✓

உலகெல்லாம் படைத்தளித்

துயிரெல்லாம் புரந்தருளும்

உமையம்மை பெற்ற செல்வன்

கலையெல்லாம் ஒருருவாய்

உருவெடுத்த கந்தவேளின்

கையிருக்கும் நெடுவேல் வாழி!

4✓

மாறுபடு சூரனுடல்

கூறுசெய்தே ஈராக்கி

மயிலாக்கி கோழி யாக்கி,

நூறுகோடி அசுரசேனை

நூறிவாகை கொண்டவேல்

நுனிசிறந்து நீடு வாழி!

5✓

தஞ்சமெனத் தன்னுதவி

கெஞ்சிவரும் அடியார்கள்

அஞ்சிவரும் பகைகள் ஆங்கே

பஞ்சுபடத் தூள்படுத்தி

மிஞ்சுசுகம் பக்தருக்கீ

மேன்மைமிகும் திருவேல் போற்றி!

6✓

செல்வமெலாம் தந்தருளிப்

பல்வளங்கள் பலசுரக்க,

திருஅடியார்ச் கருளிச் செய்து

வல்வினையை வேரறுத்து

நல்லறத்தை நிலைநாட்டும்

வாகைமிகு திருவேல் வாழி!

7✓

தாயெனவே அன்புசெய்து

சேயனையே காக்கும்நல்வேல்

செகந்தன்னில் துணையா கும்வேல்!

மாயனாரின் மருகனாரின்

மணிக்கரத் திருக்கும்வேல்

வாழ்கநீ டூழி வாழி!

8✓

வைரத்தை உருக்கியே

வார்த்தெடுத் திட்டவேல்

வாகையே ஈயும் நல்வேல்

தைரியம் எமக்களித்துத்

தருமநெறி கடைப்பிடிக்க

சக்திதரும் திருவேல் வாழி!

9✓

வஞ்சகத்தார் அடியார்க்குப்

பகையாக வரும்போது

வதைத்துப்பகை நூறும் நல்வேல்

கொஞ்சுதமிழ்ப் பாமாலை

வேட்கையுறும் குமரேசன்

கையகத்துக் கூர்வேல் வாழி!

10✓

எவ்வரம் வேண்டினும்

அவ்வரம் எமக்கருளும்

ஈடற்ற காம தேனா

இவ்வுலகில் செல்வமெலாம்

செவ்வையுற ஈந்தருளும்

இணையற்ற நல்வேல் வாழி!

11✓

சூலக்கர சுந்தரியின்

பாலன்தே வர்பகைக்குக்

காலனென வந்து தித்த

சீலன்,திரு முருகன்றன்

கோலமிகு திருக்கரத்தின்

வேலதுகாண் வாழி! வாழி!

12✓

பதைபதை பதையெனப்

பதைத்தடி யார்வரின்

பகைத்தவனுக் கஞ்சி நொந்து

குதிகுதி குதியெனக்

குதித்துவந் தப்பகை

மிதித்திடு திருவேல் வாழி!

13✓

அச்சத்தைத் தவிர்ந்திந்த

அவனிதனில் அடியார்க்கே

அன்புசெயும் நல்வேல் வாழி!

இச்சைக்கு கந்தவரம்

எல்லாமே எமக்கருளும்

எனதையன் நல்வேல் வாழி!

14✓

மயில்வா கனத்தரசன்

மணிக்கரத் திருக்கும்வேல்

மரகத மணிவேல் வாழி!

குயில்மொழி யாளந்தக்

குறத்தியம்மை தனைநெஞ்சிற்

கொண்டவன் கைவேல் வாழி!

15✓

ஆறுபடை வீடுடைய

ஐயன்கை அழகுவேல்

அறிவுவடி வான நல்வேல்

வேறுபல அடியவர்க்

கருளும்வேல் பீடுபெற்றுப்

பிறங்குகின்ற திருவேல் வாழி!

16✓

உலகத்துச் சக்தியெலாம்

ஒருருவாய் உருவெடுத்தே

உயர்ந்தோன்கை யமர்ந்த நல்வேல்

நிலையுலகில் அறம்நாட்டி

கலைவளரச் செய்கின்ற

நிமலன்கை நெடுவேல் வாழி!

17✓

ஞானமே உருவெடுத்த

நல்வேல்இன் நானிலத்து

நான்மறையோர் துதிக்கும் ஓர்வேல்

வானதே வர்குறைகள்

வற்றச் செய்திட்டவேல்

வாழியே முருகன் கைவேல்!

18✓

வேதத்தின் முதலாக

விளங்குகின்ற நாயகியே

வேலாக வந்தா ளம்மா!

ஆதியந்தம் இல்லாத

அந்தணன்தன் தேவியவள்

அறிவான அருள்வேல் வாழி!

19✓

எந்தஇடம் நினைத்தாலும்

அந்தஇடம் வந்தருளும்

கந்தன்கைத் திருவேல் வாழி!

நொந்திருக்கும் அடியவர்தம்

சிந்தையது மகிழுமாறு

செந்தேன்பெய் திருவேல் வாழி!

20✓

நினைக்கும் அடியவர்

மனத்தில் அருள்தனைக்

கணத்தில் அருளும் கந்தன்

கனக மணிநிகர்

கரத்தி லிருந்திடும்

கவினார் கதிர்வேல் வாழி!

21✓

நெஞ்சம் நினைக்கவும்

அஞ்சேல் எனஉவந்து

அடியவர் துன்பம் நீக்கும்

மிஞ்சும் ஒளிமிகு

கந்தன் கரத்தமர்

மிடுக்குடை நெடுவேல் வாழி!

22✓

கலியுகத்தில் அறம்நாட்டி

கருணைவழி முறைசெய்து

காக்கவந்த நெடுவேல் வாழி!

வலிமைதனை அறத்தார்க்கு

வழங்கியருள் வடிவேலன்

வண்கையின் திருவேல் வாழி!

23✓

பொங்கிஎழும் கடல்தன்னைப்

பூரித்தே ஆர்த்தெழுந்து

புறந்தன்னில் ஓட்டிவிட்டே

இங்குலகில் அமைதிதனை

எமக்கருள் எம்இறைவன்

இருங்கையார் எழில்வேல் வாழி!

24✓

அருளொழுகும் ஈராறாம்

அழகுமிகும் நயனங்கள்

அறுமுகன் அங்கை நிற்கும்

கருணைமிகு கதிர்வேல்தம்

அடியவர் துயர்களெல்லாம்

கணத்தினில் நீக்கும் நல்வேல்!

25✓

மங்காத ஒளிசேரும்

மாத்தமிழ்க் கருள்கூறும்

மாணிக்கத் திருவேல் போற்றி!

இங்குலகில் அடியவர்தம்

இன்னலெலாம் தீர்த்தருளும்

இலைநெடுவேல் போற்றி போற்றி!

26✓

அம்மைதிரு பராசக்தி

அருள்வடி வானமேல்

அறம்பிழைத்தோர் தம்மை மாய்த்துச்

செம்மைதனை வையத்தில்

சேர்ப்பிக்கும் திருமிகுவேல்

சிறந்தெங்கும் நீடு வாழி!

27✓

வாகையே தருகின்ற

வண்ணமிகு திருவேலை

வணங்கியே வாழு கின்றேன்

தோகைமேல் உலவுகின்ற

சுந்தரனே எம்தலைவன்

சுடர்வேல்நின் நாமம் போற்றி!

28✓

கலியுகம் தன்னிலறம்

காத்திட வந்திட்ட

கற்பகவேல் போற்றி போற்றி

வலியோ ரிடமிருந்தே

எளியோரைக் காப்பாற்ற

வந்தருள்செய் திருவேல் போற்றி!

29✓

எந்தநிலை வந்தாலும்

ஈடில்லா அறநெறியை

இம்மியும் பிறழா மற்கா

கந்தன்கை திருநல்வேல்

கனகமணி எழில்நெடுவேல்

காலமெலாம் வாழி வாழி!

30✓

கடமைசெயும் அடியாரைக்

காத்தருளும் கதிர்நெடுவேல்

கருணைசேர் கந்தன் கைமேல்

தடம்புவியில் அடியவரைத்

தருணத்தில் காக்கும்வேல்

தமிழ்போன்று நீடு வாழி!

31✓

தமிழ்ப்பாடி யாருள்ளம்

தடுமாறும் தருணத்தில்

தடுத்தாட்கொள் சக்தி வேலே!

கமழ்மணஞ்சேர் அறம்வளர்த்து

மறம்மாய்த்துக் காத்தருளும்

கந்தன்கை கருணை வேலே!

32✓

வையத்தில் சைவநெறி

வளரத்துணை செய்யும்வேல்

வாகையே ஈயும் நல்வேல்

ஐயமிலா மல்உதவி

அடியவர்க்கே அருளும்வேல்

அணிநெடுவேல் போற்றி போற்றி!

33✓

ஞானமெனும் விண்பறந்து

நற்சோதி தனைக்காண

நன்கெனக் குதவும் நல்வேல்

கானமிகும் தமிழ்ப்பாடற்கு

அருள்செய்து எனைக்காக்கும்

கந்தன்கை திருவேல் வாழி!

முந்தையகாப்பு அடுத்ததிருவேல் எழுந்தருளல்